په افغانستان کې د ملګرو ملتونو مرستندویه دفتر یا یوناما له افغان مېرمنو سره د مشورتي ناستو په دوام وايي چې د پخوا په پرتله په ملي پروسو کې د افغان مېرمنو ونډه کمه شوې ده.
د ښځو په برخه کې د دغه دفتر مشرې ربکا ریکمان توارس"Rebecca Reichmann Tavares" د چهارشنبې په ورځ «۱۳۹۶ کال د لیندۍ ۰۱» د ښځو یوې مشورتي غونډې ته وویل، حکومت باید په ملي پروسو کې د مېرمنو د مهمې ونډې لپاره ټول امکانات برابر کړي.
د اغلې توارس په خبره ټولنیز محدویتونه، زدهکړو او عامه ځایونو ته د مېرمنو کم لاسرسی او په ټوله کې نا امنیو د مېرمنو مخه ډب کړې ده.
نوموړې وویل:
"ټولنیز محدویتونه د دې لامل شوي چې مېرمنې تحرک ونهلري او همداراز زدهکړو ته نهلاسرسی بله ستونزه ده، موږ په افغانستان کې یوازې ۱۷ فیصده با سواده مېرمنې لرو او همداراز په هېواد کې ۶۳ فیصده مېرمنې رسمي اسناد نهلري چې دا ټول په ملي پروسو او په ځانګړي توګه په انتخاباتو کې د مېرمنو د ګډون پر وړاندې لویې ننګونې دي."
په ورته وخت کې په کابل کې د ملګرو ملتونو ځانګړي استازي چې هغه هم په دغې ناسته کې ګډون کړی وو، په ملي پروسو او په ځانګړې توګه په انتخاباتو کې د مېرمنو پر فعاله ونډې ټینګار وکړ.
تدامیچي یاماموتو همداراز وویل چې په راتلونکو انتخاباتو کې باید د مېرمنو د بشپړې ونډې د ډاډمن کېدو لپاره جدي ګامونه پورته شي.
دا څرګندونې په داسې حال کې کېږي چې ځینې افغان مېرمنو هم تل په حکومت په ملي پروسو کې دوی ته د فعاله ونډې د نهورکړې له کبله انتقادونه کړي دي.
جمهوري ریاست بیا دا نهمني چې ګواکې په ملي پروسو کې افغان مېرمنو ته لازمه ونډه نهده ورکړل شوې.
د جمهوري ریاست د ویاند مرستیال دوا خان مینهپال د چهارشنبې په ورځ په دې اړه ازادي راډیو ته وویل:
"ټول هغه خنډونه چې د مېرمنو د مشارکت پر وړاندې موجود دي، د افغانستان حکومت هغه لیرې کوي او دوی ته د دې زمینه برابروي چې په ټولو چارو کې فعاله ونډه ولري."
د ولسي جرګې پخوانۍ غړې او مدني فعاله مریم بارکزۍ بیا د ښځو پر وړاندې د موجوده ستونزو د نهحل د ملامتۍ ګوته تر ډېره حکومت او د یوناما په ګډون اړوند بنسټونو ته نیسي.
د اغلې بارکزۍ په خبره د حکومت له هغو ادعاو سره سره چې په ملي پروسو کې به افغان مېرمنو ته فعاله ونډه ورکوي بیا هم ورځ تر بلې د مېرمنو ونډه کمېږي چې ښه بېلګهيې د یوناما تازه اندېښنې دي.
راپور: محمد حدیث پردېس
