د افغانستان د سولې عالي شورا د اجرائیه رئیس له هغه دریځ سره مخالفات وکړ چې ویلي، یو شمېر طالب مشران دې د ملګرو ملتونو د بندیزونو په لېست کې شامل شي.
دغه شورا ټينګار کوي چې د ملګرو ملتونو د بندیزونو په لېست کې د وسلهوالو طالبانو د مشرانو د شاملېدو پلوي نهدي.
د دغې شورا مرستیال حاجي عزیز الله دین محمد د دوشنبې په ورځ «۱۳۹۶ کال د لړم ۰۸» ازادي راډيو ته وویل، د حکومت په پرېکړه ډېره تبصره نهلري، خو هیلهیې څرګنده کړه چې د بندیزونو په لېست کې د طالب مشرانو تر شاملېدو دمخه دوی له دغې ډلې سره یوې نتیجې ته ورسېږي.
نوموړی وايي:
"د سولې عالي شورا د غړي په توګه د ملګرو ملتونو د بندیزونو په لېست کې د نویو کسانو د ورشاملېدو پلوي نهیو، خو بیا هم دا د حکومت نظر دی."
دا په داسې حال کې ده چې د حکومت اجرائیه رئیس عبدالله عبدالله د ملګرو ملتونو د امنیت شورا د بندیزونو د کمېټې له مشر سره په لیدنه کې ویلي چې وسلهوال طالبان د افغان ملکیانو د وژنې عاملین دي او ملګري ملتونه باید د دې ډلې مشران د بندیزونو په لېست کې شامل کړي.
د حکومت یوې سرچینې د نوم نهاخیستلو په شرط ازادي راډیو ته ویلي چې د ملګرو ملتونو د امنیت شورا د بندیزونو کمېټې مشر غیرت عمروف اجرائیه رئیس عبدالله عبدالله ته ډاډ ورکړی چې د هر هغه طالب مشر نوم به د بندیزونو لېست ته ورزیات شي چې افغان حکومتیې غواړي.
یو کال وړاندې ولسمشر محمد اشرف غني هم له ملګرو ملتونو غوښتي و چې د طالبانو د مشر ملا هبتالله نوم د ملګرو ملتونو په تور لېست کې شامل کړي.
دا په داسې حال کې ده چې حکومت د بندیزونو تر څنګ د سولې په خبرو اترو هم ټينګار کړی.
افغان حکومت بیا په دې نظر دی چې د بندیزونو وضع کول کولای شي له یوې خوا وسلهوال طالبان کمزوري کړي او بلخوا د سولې د خبرو اترو زمینه هم برابره شي.
خو د افغانستان د مشرانو جرګې غړي له دې ډلې زلمی زابلي په دې برخه کې د حکومت په دوه ګوني چلند انتقاد کوي او دا یې ناکامي ګڼي.
ښاغلی زابلی وايي:
"د وسلهوالو طالبانو په وړاندې د حکومت دوه ګونې پالېسي ناکامه ده، تر اوسه پورې، د سولې د خبرو اترو دروازه په بشپړه توګه تړلې نهده چې حکومت دا ډول اقدام کوي."
ښاغلي زابلي دغهشان وویل، د حکومت دا پرېکړه طالبانو او د هغو ملاتړو ته پلمه په لاس ورکوي چې جګړې ته دوام ورکړي.
نوموړی ټينګار کوي چې د سولې د بهیر د بریالیتوب لپاره د خبرو اترو لار تر ټولو غوره لاره ده.
راپور: ناجیه ساپۍ
