سلګونه زره کسانو د اسپانیې په بارسلونا ښار کې چې د کاتالونیا سیمې پلازمېنه ده د اسپانیې د ځمکنۍ بشپړتیا په ملاتړ لاریون وکړ.
دا لاریون دوه ورځې وروسته له هغه وشو چې د اسپانیا حکومت د کاتالونیا خپلواکي وروسته له هغه لغوه کړه چې د دې سیمې پارلمان د کاتالونیا خپلواکي اعلان کړه.
پروني لاریونونه چې د اسپانیې د ځمکنۍ بشپړتیا د ملاتړو مدني ډلو لهخوا د کاتالونیا د جلا غوښتنې د مخالفو ګوندونو په ملاتړ وشول له غرمې پیل او څو ساعتهیې دوام وکړ.
ټولو شعار ورکاوه چې:
"موږ ټول کاتالونیایان یو، اسپانویان یو او غواړو له یو بل سره واوسو."
د لاریون یوه ګډونوال انتونیو د قانوني چلند غوښتنه وکړه.
دی وايي:
"تر کومه ځایه چې زه پوهېږم حکومت باید د اساسي قانون ۱۵۵ ماده تطبیق کړي. په دې سره به د قانون د تطبیق زمینه برابره شي."
د اسپانیې په اساسي قانون کې ۱۵۵مه ماده د کاتالونیا د خپلواکۍ د ځنډولو لپاره وضع شوې ده.
په دې لاریون کې چې تر ډېرهیې د جشن بڼه درلوده او د اسپانیې بیرغونه رپول کېدل، ګڼو سیاستوالو هم برخه اخیستې وه.
د اکټوبر په اتمه هم یوه ورته مظاهره شوې وه.
وروسته له هغه چې د اکټوبر په ۲۷مه د کاتالونیا سیمهییز پارلمان په ۷۰ موافقو او لسو مخالفو رأیو د کاتالونیا خپلواکي اعلان کړه، د دې پرېکړې په خوشحالۍ هم زرګونه کسانو لاریون وکړ.
د اسپانیې سنا جرګې د کاتالونیا تر دې پرېکړې وروسته د کاتالونیا د خپلواکۍ د ځنډولو لپاره بېړنۍ رأیه اچونه وکړه چې ۲۱۴ سناتورانو موافقه او ۴۷ مخالفه رأیه ورکړه.
په دې ترتیب سره د اسپانیا صدراعظم ماریانو رخوي اعلان وکړ چې حکومتیې د کاتالونیا چارې په لاس کې نیولي او سیمهییز حکومتیې منحل کړی دی.
اسپانیې د سیمهییزو انتخاباتو لپاره هم د ډسمبر ۲۱مه نېټه په ډاګه کړه.
په کاتالونیا کې د خپلواکۍ په پار د اکټوبر په لومړۍ نېټه غیر الزامي ټولپوښتنه وشوه چې اکثرو ګډونوالو یې مثبته رأیه ورکړه، خو تر هغه وروسته د اسپانیې له مرکزي حکومت سره په لویې لانجې واوښتل.
راپور: صفيالله ستانکزی
