د امریکا ولسمشر چین تورن کړ چې د واشنګټن او شمالي کوریا د لانجې د حللپاره يې هېڅ مرسته نهده کړې او دا وضعیت باید دوام ونهکړي.
ډونالد ټرمپ خپلې دغه څرګندونې پرون د ټویټر په یوه پیغام کې وروسته لهدې وکړې چې شمالي کوریا د جمعې په ورځ داسې یو توغندۍ وازمایه چې له یوې لويې وچې بلې ته مزل کولی شي او ويې ویل چې دغه توغندۍ د اټمي امکاناتو سره امریکا په نښه کولی شي.
د امریکا د ولسمشر له دغو څرګندونو څو ساعته وروسته د امریکا هوايي ځواکونو نن وویل چې دوه B-1Bبمبارد کوونکو الوتکو يې د شمالي کوریا د توغندي د ازمیښت په ځواب کې د کوریا د ټاپو وزمې لهپاسه الوتې دي.
د جنوبي کوریا او جاپان الوتکو هم دغه امریکايي الوتکۍ بدرګه کړي دي، ۱۷ ساعته يې د کوریا د ټاپو وزمې لهپاسه تمرینات کړي دي.
د امریکا ولسمشر په خپل پیغام کې د امریکا په پخوانیو حکومتونو هم انتقاد وکړ چې ولې يې چین ته د میلیاردو ډالرو د سوداګري اجازه ورکړې؟ سره لهدې چې چین د شمالي کوریا د لانجې په حل کې مرسته نهده کړې.
تېر کال د امریکا او چین ترمنځ سوداګري کسر ۳۰۹ میلیارډه ډالر وو.
ډونالد ټرمپ او د نړۍ نورو مشرانو څو ځلي په چین غږ کړی دی چې د شمالي کوریا د اټمي او بالسټیکي توغندیو د پروګرامونوله کبله په دغه هېواد باندې فشار روالي.
ملګرو ملتونو هم دغه پروګرامونو منع کړي دي.
چین د شمالی کوریا مهم ملاتړی هېواد دی او پخوانۍ اړیکې ورسره پالي.
دغه راز چین د شمالي کوریا تر ټولو لوی تجارتي شریک او د خوراکي موادو او انرژي منبع ګڼل کېږي.
د چین بهرنیو چارو وزارت پرون وویل چې دوی هم د شمالي کوریا د ازمیښتونو ځکه مخالفت کوي چې د ملګرو ملتونو د پریکړو او د نړیوالې ټولنې د غوښتنو خلاف کار دی.
په عین وخت کې چین هیله څرګنده کړې چې تول اړخونه له احتیاطه کار واخلي، د کړکېچ د زیاتېدو مخنیوی او د سیمهییزې سولې او ثبات ملاتړ وکړي.
