د بشري حقونو د څار ادارې "HRW" د جرمني له صدراعظم اولف شولڅ څخه وغوښتل چې، د منځنۍ اسیا د پنځو هېوادونو له ولسمشرانو سره په کتنه کې په خپلو هېوادونو کې بشري حقونه دود او پیاوړي کړي.

د ازادي راډیو د خبر د مرکزي څانګې د راپور له‌مخې، شولڅ به په‌دې اوونۍ کې د منځنۍ اسیا د پنځو هېوادونو له ولسمشرانو سره په ناسته کې برخه واخلي.

اولاف شولڅ به نن یک‌شنبې په درې ورځني سفر ازبکستان ته روان شي.

هغه به سبا، دوشنبې او بل سبا، سه‌شنبې، په قزاقستان کې د منځنۍ اسیا د فارمټ په دوهمه غونډه کې ګډون وکړي.

د دغه کنفرانس لومړۍ غونډه تېر کال په برلین کې جوړه شوې وه.

د بشری حقونو د څار سازمان وایي، د جرمني حکومت په دغو هېوادونو کې د بشري حقونو په برخه کې له پرمختګ پرته له هغو سره نژدې اړیکې ټینګولی نه‌‌‌شي.

شولڅ به د خپل سفر په لومړي ټپال کې په تاشکند کې د ازبکستان له ولسمشر شوکت میرضیایف سره وګوري او له ازبکستان څخه جرمني ته به د ماهرو کارګرو د انتقال په اړه یوه موافقه لاسلیک کړي.

نوموړی به راتلونکې اوونۍ د قزاقستان، قرغیزستان، تاجکستان او ترکمنستان له مشرانو سره په یوه غونډه کې ګډون وکړي.

ټاکل شوې ده چې د افغانستان د فوټسال ملي لوبډله د نړیوال جام په لړ کې نن په خپله لومړنۍ سیالي کې له انګولا سره مخامخ شي.

د افغانستان د فوټبال فدراسیون په یوه خبرپاڼه کې ویلي، دا لوبه نن مازیګر د کابل په وخت ۵:۰۰ بجې ترسره کېږي.

د ۲۰۲۴ د فوټسال نړیوال جام پرون شنبه په ازبکستان کې پیل شو او په لومړۍ مسابقه کې تایلنډ دوه پر یو کرویشیا ته ماته ورکړه او په دوهمه لوبه کې بیا برازیل ۱۰ پر صفر کیوبا ته ستره ماته ورکړه.

لږ تر لږه اته کسان هغه مهال مړه شول چې، د غیرقانوني کډوالو یوه وړه بېړۍ د بریتانیا او فرانسې ترمنځ په اوبو کې ډوبه شوه.

دا پېښه نن یک‌شنبې سهار وختي هغه مهال وشوه چې، کډوالو غوښتل له فرانسې څخه په کښتۍ کې بریتانیا ته ولاړ شي.

دوه اوونۍ د مخه، د شپږو ماشومانو او یوې امیندوارې مېرمنې په ګډون دوولس کسان په ورته پېښه کې مړه شول، چې دا د روان ۲۰۲۴ کې تر ټولو وژونکې پېښه وه.

د بریتانیا او فرانسې د بېړۍ چلونې د ادارو د مسوولانو او ساحل ساتونکو په وینا، په وروستیو ورځو کې له‌دې خطرناکو او سړو اوبو څخه د تېرېدو لپاره د ناقانونه کډوالو هڅې زیاتې شوي دي او یوازې د شنبې د ورځې تر پایه په ۲۴ ساعتونو کې ۲۰۰ کډوال له کوچنیو بېړیو څخه ژغورل شوي دي.

په افغانستان کې د کډوالو لپاره د ملګروملتونو لویې کمېشنرۍ "یو‌این‌ایچ‌سي‌ار" د مېندو او ماشومانو د مړینو د کمولو لپاره په بامیان کې د قابله‌ګانو د روزنې پروګرام د فارغانو دوهم پړاو اعلان کړ.

د ملګروملتو دې ادارې پرون شنبې پر خپله ایکس‌پاڼه (پخواني ټویټر) ولیکل چې، د قابله‌ګۍ د زده‌کړې پروګرام یې د اروپايي اتحادیې او همکارو مؤسسو په مالي مرسته اجرا کړی دی.

د کډوالو لپاره د ملګروملتونو د لویې کمېشنرۍ په وینا، دا قابلې هڅه کوي چې په افغانستان کې د مېندو او ماشومانو د مړینو کچه راټیټه کړي.

تر دې مخکې د روغتیا نړیوال سازمان په افغانستان کې د روغتیايي خدمتونو د وضعیت په اړه اندېښنه ښودلې وه او ویلي وو، چې هره ورځ په افغانستان کې په‌داسې ناروغیو چې تداوي کېدای شي ۲۴ مېندې او ۱۶۷ ماشومان مړه کېږي.
دغه سازمان خبرداری ورکړی، په ښوونځیو او پوهنتونونو کې د نجونو پر زده‌کړو بندیز په افغانستان کې د ښځو وضعیت لا پسې خراب کړی او د راتلونکي لپاره د کادرونو د روزلو هیله يې له‌منځه وړې ده.

په میدان وردګ او فراه ولایتونو کې په دوو ترافیکي پېښو کې لږ تر لږه ۵ تنه مړه او ۹ نور ټپیان شوي دي.

د طالبانو د میدان وردګ ولایت د اطلاعاتو او کلتور رياست په یوه خبرپاڼه کې ویلي، نن یک‌شنبه د دغه ولایت په مرکز میدان‌ښار کې د سپرلیو له یوه موټر سره د باروړونکې لارۍ د ټکر په نتیجه کې د یوې کورنۍ ۳ غړي مړه او ۳ نور سخت ټپیان شوي دي.

له بلې خوا د فراه ولایت په بالابلوک ولسوالي کې پرون (شنبې) د سپرلیو د یوه موټر د چپه کېدو په پېښه کې دوه تنه مړه او ۶ نور ټپیان شوي دي.

د تېرې اوونۍ د سه‌شنبې په ورځ د طالبانو د ترافیکو عمومي ريیس وویل، په تېرو شپږ میاشتو کې په افغانستان کې ۱۲۰۰ تنه په ترافیکي پېښو کې مړه شوي دي.

د اکثرو پېښو علت د موټرچلوونکو بې‌احتیاطي، د لارو خرابوالی او زیات سرعت بلل کېږي.

د نړۍ د اووه سترو صنعتي هېوادونو د بهرنیو چارو وزیرانو په یوه ګډ بیان کې د ایران له لوري روسیې ته د بالستیک توغندیو لېږل غندلي دي.

د کاناډا، فرانسې، جرمني، ایټالیا، جاپان، بریتانیا او متحده‌ایالتونو د بهرنیو چارو وزیرانو او د اروپایي اتحادیې لوی استازي پرون (شنبې) په یوه بیان کې اعلان وکړ، چې دوی د ایران له‌خوا د بالستیک توغندیو صادرات او د روسیې له‌خوا د هغو پېرودل په کلکه غندي او په‌دې برخه کې به ځانګړي اقدامات وکړي.

شواهد ښیي چې ایران د نړیوالو له بیا بیا غوښتنو سره - سره روسیې ته د وسلو له لېږد لاس نه‌دي اخیستي.

د جي۷ یا اووه سترو صنعتي هېوادونو د بهرنیو چارو وزیرانو زیاته کړه چې، روسیه د بې‌پیلوټه الوتکو په ګډون له ایراني وسلو څخه د اوکرایني ملکیانو د وژلو او د دې هېواد په مهمو زېربناوو باندې د برید لپاره کار اخیستی دی.

دوی په عین جال کې د روسیې تېری د ملګروملتونو د منشور په ګډون د نړیوالو قوانینو څرګنده سرغړونه بللې ده.

دوی په خپل ګډ بیان کې له ایرانه غوښتي چې د اوکراین خلاف د روسیې د نامنصفانه او غیرقانوني جګړې ملاتړ سمدستي پای ته ورسوي او روسیې ته بالستیک توغندي او بې‌پېلوټه الوتکې ونه لېږي.

پنځه تنه افغانان، چې د پاکستان د بلوچستان ایالت د سکرو په یوه کان کې یې کار کاوه، په کان کې د ګازو د خپرېدو له کبله مړه شوي دي.

پاکستاني رسنیو نن راپور ورکړ چې دا پېښه پرون (شنبه) د هرنايي ولسوالۍ په شاراګ کان کې وشوه.

ځايي چارواکو ویلي، چې یوه خصوصي کان ته ۶ کارګر ننوتل او د سکرو کېندنه یې پیل کړه، وروسته پنځه تنه د میتان ګاز له کبله مړه او شپږم چې سخت بې هوښه شوی و، وژغورل شو.

پرون د اسرايیل په عمده ښارونو کې یو وار بیا په زرګونو کسان په اعتراض لارو سړکونو ته راووتل چې پر خپل حکومت فشار زیات کړي، ترڅو په غزې د پاتې یرغمل شویو د خلاصون لپاره زمینه برابره کړي.

حماس ډلې چې د امریکا متحده‌ایالتونه او اروپايي ټولنه یې تروریستي سازمان ګڼي د اکتوبر میاشتې پر اوومه پر اسرايیل په حملې سره ۱۲۰۰ کسان ووژل او ۲۵۱ نور یرغمل کړل.

ویل کېږي له‌دې شمېر ۹۷ به لا هم د حماس په بند کې وي.

د اسرايیل پوځ ویلي، په دغه شمېر کې به ۳۳ کسان مړه وي.

په اسرايیل کې هره اوونۍ پر حکومت د فشار راوستلو لپاره مظاهرې کېږي او برخه‌وال یې د داسې موافقې غوښتونکي دي، چې په مرسته یې پاتې یرغمل شوي کسان خوشې شي.

د بریتانیا څو پخوانیو دفاع وزیرانو او پخواني صدراعظم له اوسني صدراعظم کییر سټارمر غوښتنه کړې چې، اوکراین ته زمینه برابره کړي، څو د امریکا د متحده‌ایالتونو له ملاتړ پرته هم، د روسیې په خاوره کې دننه ليرې واټنه میزاییل وکارولی شي.

په‌دې اړه سنډې ټایمز پرون شنبه راپور ورکړ.

په راپور کې ویل شوي چې د بریتانیا پخوانیو دفاع وزیرانو ګرانټ شاپس، بن والاس، ګوین ویلیامسن، پني موردانت او لیام فاکس او پخواني صدراعظم بوریس جانسن دا غوښتنه مطرح کړې ده.

دغو پخوانیو سیاستوالو خبرداری ورکړی، چې په‌دې برخه کې هر ډول ځنډ به د روسیې ولسمشر ولادمیر پوتین لا زړور کړي.

د اوکراین ولسمشر ولودمیر زيلینسکي له میاشتو راهیسې له متحدانو سره یوځای غوښتنه لري، چې اوکراین ته باید اجازه ورکړل شي، څو غربي میزاییل او په امریکا کې د جوړو شویو لیرواټنه اتاکمس (ATACMS) او په بریتانیا کې د سټورم شډوز (Storm Shadows) په نوم جوړ شوي توغندي د روسیې په خاوره کې دننه وکارول شي، چې له‌دې سره د نورو حملو لپاره د مسکو ظرفیت محدود شي.

تېره جمعه د امریکا ولسمشر جو بایډن په واشنګټن کې د بریتانیا له صدراعظم کییر سټارمر سره کییف ته په روسیه کې دننه پر ځینو اهدافو د حملو لپاره د لیرې واټنه میزاییلو د کارونې د اجازې په اړه خبرې وکړې، خو کومه پرېکړه اعلان نه‌شوه.

ځینو امریکايي چارواکو په‌دې اړه شک ښوولی چې، د دغسې میزاییلو د کارونې لپاره د زمینې برابرول دې د روسیې د اشغالګرو په وړاندې په مبارزه کې د کییف جګړه کې کوم بدلون راولي.

د پاکستان په بلوچستان ایالت کې د یوه مسافر وړونکي بس د چپه کېدو په پېښه کې لږ تر لږه پنځه کسان مړه شوي او شاوخوا شل تنه نور ژوبل دي.

پېښه پرون د شیراني ضلعې په دانه سر سیمه کې شوې.

د ژوب د ملکي روغتون مشر ډاکټر اختر محمد د ازادي راډیو مشال څانګې ته ویلي چې، ځینې مړي او ژوبل کسان روغتون ته وروړل شوي دي.

بس له اسلام‌اباد څخه کوټې ته د ډېره اسماعیل خان په لویه لاره روان وو چې کندې ته ولوېد.

د بلوچستان حکومت ویاند شاهد رند له رسنیو سره په خبرو کې ویلي، د پېښې ټول اړخونه معلوموي او ټول ژوبل کسان د لیویز او پولیسو په موټرو کې ژوب روغتون ته وړل شوي دي.

په پاکستان کې ټرافیکي پېښې زیاتره د قوانینو نه عملي کېدو، د سړکونو خرابوالي، د ډرېورانو بې احتیاطۍ، او د موټرو پر ټاکلي وخت د سرویس او معاینې نه کولو له وجې کېږي، چې په‌کې ګڼو کسانو ته مرګ‌ژوبله اوړي.