د لاسرسۍ وړ لېنکونه

تازه خبر
یکشنبه ۶ سلواغه ۱۳۹۸ کابل ۰۴:۲۹

بلوچستان کې د يوې ښځې په ګډون ۴ هزاره‎ توکمه کسان وژل شوي


د چهارشنبې په سهار په يوه موټر کې سپاره مسافر له کوټې کراچۍ ته روان وو چې له کوټې ښاره د ۵۰ کېلو مترو په فاصله په مستونګ سيمه کې ناڅرګندو وسله‎والو يې پر موټر ډزې وکړې او د پېښې له ځايه وتښتېدل.

د مستونګ پوليس چارواکي وايي، په موټر کې د يوې ښځې په شمول يو ډرېور او څلور مسافر سپاره وو چې د ډزو په نتيجه کې ښځه او درې نور کسان ځاى پر ځاى وژل شوي او موټر چلوونکى سخت ټپي شوى.

په پېښه کې د وژل شويو کسانو جسدونه او ټپي کس د کوټې دولتي روغتون ته راوړل شوي دي.

د پوليسو په وينا په پېښه کې وژل شوي کسان هزاره توکمه شيعه‎ګان دي.

دوی دغه‌راز وايي داسې څرګندېږي چې وسله‎والو مخکې له مخکې کمين ورته نيولى او په هدفي توګه‌يې وژلي دي.

د دې بريد مسؤليت تر اوسه کومې وسله‎والې ډلې نه‌دى منلى، خو تر دې پخوا چې په بلوچستان کې پر هزاره توکمه شيعه‎ګانو کوم ترورېستي بريدونه شوي دي، مسؤليت‌يې اکثر سُني وسله‎والې ډلې لښکرِ جنګوي پر غاړه اخېستى دى.

د بلوچستان اعلى وزير نواب ثناءالله زيهري دا پېښه په کلکه غندلې او امنيتي ادارو ته‌يې په وسله‎والو پسې د بېړنۍ پلټنې امر کړى دى.

د کورنيو چارو ايالتي وزير مير سرفراز بګټي هم دا پېښه غندلې او ويلي يې دي چې ښځه وژل د بلوچستان د خلکو د کلتور ضد عمل دى.

د کورنيو چارو ايالتي وزير مير سرفراز بګټی
د کورنيو چارو ايالتي وزير مير سرفراز بګټی

هزاره ډموکراتيک ګوند او مجلس وحدتِ مسلمين ګوند هم د مستونګ پېښه په کلکه غندلې او د احتجاجي مظاهرو اعلان‌يې کړى دى.

د هزاره ډموکراتيک ګوند د مشرانو په وينا په تېرو ۱۵ کلونو کې يې په بېلابېلو بمي چاودنو، ځان‎وژونکو بريدونو او هدفي پېښو کې شااوخوا ۱۲ سوه کسان وژل شوي او په زرګونو ټپيان شوي دي چې له کبله‌يې د دوى زيات شمېر خلک د پاکستان نورو ښارونو او يا هم بهرنيو هېوادونو ته کډه شوي دي.

د بلوچستان اوسنى حکومت ادعا کوي چې په تېرو څلورو کلونو کې پر هزاره توکمه شيعه‎ګانو تر پخوا وسله‎وال بريدونه کم شوي دي، خو د دوى د وژنې لړۍ يو ځل بيا پيل شوې او په تېر جون مياشت کې هم په کوټه ښار کې د يوې ښځې په شمول دوه هزاره‎ګان د ناڅرګندو کسانو په ډزو وژل شوي وو.

رپوټ: بارکوال مياخېل

XS
SM
MD
LG