د جرمني پولیس وايي، د دغه هېواد په لوېدیځ کې پر یوه ایراني نارینه د څو تنو نورو ایرانیانو ډله‌ییز جنسي تېری احتمالاً په سیاسي انګېزه شوی دی.

د جرمني د هاګن پولیسو پرون دوشنبې وویل چې په دې تړاو یې څلور تنه مشکوک کسان نیولي او دوه تنه لا هم تر تعقیب لاندې دي.

له بلې خوا شپېګل خپرونې راپور ورکړ چې نیول شوي کسان د ایران د اسلامي جمهوریت پلویان دي.

پولیسو په دې اړه په زغرده څه نه دي ویلي، خو یادونه یې کړې چې څلور تنه نیول شوي او له دې کبله چې ممکن دا جرم په سیاسي انګېزه شوی وي، دوسیه د جرمني استخباراتي ادارې ته سپارل شوې ده.

په ویتنام کې د یاګي توپان لږ تر لږه ۳۵ کسان مړه کړي او ۲۴ نور لادرکه دي.

یاګي توپان په شمالي ویتنام کې ګڼ مالي تاوانونه هم اړولي.

راپورونه وايي، ګڼې مرګ‌ژوبلې او تاوانونه د توپانو له کبله د ځمکې د ښووېدو او د سېلونو د بهېدو په خاطر اوښتي.

دا توپان له شنبې ورځې پیل شوی او لا هم چلیږي، چې له امله یې د لا زیاتو بارانونو او سېلونو د راوتلو خبرداری ورکړل شوی.

د میلیونو کورونو برېښنا پرې شوې او په لویو لارو د اوبو د ډنډېدو په سبب ټرافیک له خنډ سره مخ شوی.

په سوریه کې د اسراییلو د پرون ناوخته برید په نتیجه کې لږ تر لږه ۱۴ کسان وژل شوي او تر ۴۰ زیات نور ټپیان دي.

دا خبره د سوریې دولتي خبري اژانس سنا نن سهار وختي کړې.

د یوه روغتون مشر فیصل حیدر ویلي، د ۱۴ کسانو مړي ور وړل شوي او ۴۳ نور ژوبل دي.

په لندن کې مېشت د سوریې د بشري حقونو څارونکې ډلې ویلي، په وژل شویو کې لږ تر لږه څلور ملکیان شامل دي.

د راپورونو له‌مخې اسراییلو پرون ناوخته د سوریې په مرکزي برخو بریدونه کړي، چې په پاسنۍ مرګ‌ژوبلې سربېره په حما ولایت کې یوه لویه لار هم تخریب شوې ده.

اسراییل په وروستیو کلونو کې د سوریې دننه بریدونه کوي او اکثر د سوریې پوځیان یا د ایران ملاتړي ګروپونه په نښه کوي، خو ډېر کم د خپلو دغو بریدونو یا عملیاتو په اړه خبرې کوي.

د وینزویلا د حکومت سیاسي‌ مخالف ګونزالیز اوروتیا (Gonzalez Urrutia) چې ځان د جولای د اته ویشتمې نېټې په ولسمشریزو ټاکنو کې بریالی بولي، اسپانیې ته تښتیدلی دی.

فرانس پریس اژانس لیکلي، چې نوموړی پرون یک‌شنبه مادرید ته رسېدلی او ژمنه یې کړې چې له همغه ځایه به د وینزویلا (د ازادۍ او ډیموکراسۍ) لپاره خپلې مبارزې ته دوام ورکړي.

په وینزویلا کې چې د جنوبي امریکا یو هېواد دی، تر وروستیو ولسمشریزو ټاکنو وروسته وضعیت کړکېچن شوی او دغه سیاسي مشر یې په پټه مبارزې پلانولې.

په هغو ټاکنو کې نیکولاس مادورو چې برحاله ولسمشر و، بریالی شوی دی، خو مخالفان یې د هغه بریا نه مني.

د وینزویلا د اپوزیسیون مشرې ماریا کورینا مچادو ویلي، اوروتیا ځکه له وینزویلا جلا وطنه شو چې هلته یې ژوند په خطر کې و.

اولاف شولڅ له زي دي اف رسنۍ سره په مرکه کې چې پرون خپره شوې ویلي، اوس یې وخت دی چې د اوسنيو جنګي حالاتو پر ځای سولې ته د رسېدو په اړه بحث وشي.

هغه ویلي دي، د اوکراین ولسمشر ولودومیر زیلينسکي په وروستۍ لیدنه کې په‌دې سلا وو چې د روسیې په ګډون د سولې یو کنفرانس باید جوړ شي.

اولاف شولڅ په کور دننه تر انتخاباتو د مخه له فشارونو سره مخ دی، ځکه د هغه ملاتړو ګوندونو د هغو ګوندونو په وړاندې سختې ماتې خوړلي چې له مسکو سره د ښو اړیکو په لټه کې دي.

د جرمني صدراعظم داسې وخت د اوکراین د سولې لپاره په نویو هڅو ټینګار کړی، چې په اوکراین د روسیې بې درېغه بریدونه لا هم دوام لري.

پاکستان د تحریک انصاف (پي‌ټي‌ای) ګوند پلویانو له اسلام‌اباد سره نژدې په غونډه کې د خپل زنداني رهبر عمران خان د خوشې کولو غوښتنه کړې ده.

دا اعتراضي ناسته په‌داسې وخت کې کېږي، چې مرکزي حکومت بې له اجازې په پلازمېنه کې د لویو غونډو جوړوونکو ته د سزا ورکولو مقرره تصویب کړې ده.

حکومت اسلام‌اباد ته تلونکې لویې لارې په کانټینرونو تړلې دي، خو پي‌ټي‌ای ته له پلازمېنې بهر د دې ناستې اجازه ورکړل شوې وه.

د تحریک انصاف یو سیاستوال حماد اظهر جلسې ته په وینا کې وویل، چې خلک په هېواد کې د "قانون واکمنۍ او د ایین سرلوړۍ" لپاره ورغونډ شوي دي.

عمران خان د دولتي رازونو افشا کولو او د بهرنیو هېوادونو د مشرانو ډالیو خرڅولو په ګډون په یوشمېر قضيو کې د راولپېنډۍ د اډیالې په زندان کې بندي دی.

خو د هغه ګوند وايي، چې د عمران خان پر ضد جوړې شوې قضیې سیاسي دي.

اسراييلي رسنيو د دغه هېواد په بېلابېلو ښارونو کې د حکومت پر ضد د لويو لاريونونو خبر ورکړی او ویلي چې لاريون کوونکو د غزې په تړانګه کې د پاتې يرغمل شويو کسانو د خوشې کېدو لپاره د سمدستي جوړجاړي غوښتنه کړې ده.

دا لاریونونه تېر ماښام وشول چې د اسراييل پر جنوبي سيمه د حماس د افراطي ډلې د بريد د ۱۱مې میاشتې له پوره کېدو سره برابره وه.

حماس، چې امریکا او اروپايي اتحادیه یې تروریستي ډله ګڼي، د تېر کال د اکټوبر په اتمه نېټه پر اسراییل برید وکړ.

د لاریون تنظیموونکو په تل‌ابیب کې د لاریونوالو شمېر شاوخوا ۵۰۰زره اټکل کړی، خو د ښار پولیسو د لاریون د برخوالو د شمېر په اړه څه نه دي ویلي.

د تل‌ابیب، بیت المقدس او کرمیګات په ګډون په ځینو ښارونو کې په مظاهرو کې د یرغمل شویو کسانو د کورنیو غړو ویناوې وکړې.

په همدې حال کې د تل‌ابیب پولیسو د یو شمېر لاریونوالو له لوري د یوې لویې لارې د بندولو هڅې ته په اشارې ویلي چې پنځه تنه یې په دې تړاو نیولي دي.

په لسګونو زره کسانو پرون په تل‌ابیب او د اسراییل په نورو ښارونو کې د لاریون پر مهال د داسې موافقې غوښتنه وکړه چې د حماس له بنده د پاتې سلو یرغمل شویو د خلاصون سبب شي.

د امریکا متحد ایالتونه او اروپايي ټولنه حماس ډله یو تروریستي سازمان ګڼي.

حماس او د فلسطینیانو نورو افراطي ډلو د اکټوبر میاشتې پر ۷مه پر اسرائیل په ناڅاپي حملې سره ۱۲۰۰ کسان ووژل او شاوخوا ۲۵۰ نور یرغمل کړل چې دا موضوع په غزه کې د جګړې د پیل سبب شوه.

اسراییل وايي، له حماس ډلې سره لا هم ۱۰۱ کسان یرغمل دي، خو دا معلومه نه ده چې د دوی له ډلې څو کسان لا ژوندي دي.

په همدې حال کې له څو میاشتو د پاتې یرغمل شویو د خلاصون لپاره د امریکا د متحدو ایالتونو، مصر او قطر په منځګړیتوب غیرمستقیمې مذاکرې روانې دي.

د بریتانیا او امریکا د بهرنیو استخباراتي ادارو مشرانو د روسیې په خاوره کې د اوکرایني ځواکونو پرمختګ ستایلی دی.

د بریتانیا د ایم آی سکس ادارې مشر ریچارډ مور پرون وویل چې په تېره اګست میاشت کې د روسیې په کورسک سیمه کې د اوکرایني ځواکونو ناڅاپي عملیاتو او د سیمو لاندې کول یو ډېر زړور اقدام و چې د جګړې لوری بدلولای شي.

هغه دا څرګندونې پرون د سي‌آی‌اې له مشر ویلیم برنز سره په لندن کې د لیدنې پر مهال وکړې.

برنز د اوکرایني ځواکونو عملیات لویه لاسته راوړنه وبلله چې د ده په وینا د روسیې د پوځ له کمزورتیاوو څخه یې پرده لیرې کړه.

برنز وویل چې لویدیځ باید د جګړې د پراختیا مخه ونیسي، خو ده زیاته کړه چې د اوکراین متحدان دې د روسیې له بېځایه ګواښونو څخه هم نه وېرېږي.

د لبنان د روغتیا وزارت وايي، د اسراییلو په هوايي برید کې درې تنه روغتیاپالان وژل شوي او دوه نور ټپیان دي.

د دې وزارت ویاند پرون ناوخته وویل چې اسراییلو دا برید په جنوبي ښار فارون کې هغه مهال وکړ چې د لبنان د ملکي دفاع کارکوونکو د اسراییلي پوځ د یوه مخکېني برید په پایله کې د لګېدلي اور د وژنې هڅه کوله.

لبنان دا پر خپلو رسمي کارکوونکو برید بللی او غندلی یې دی.

د لبناني چارواکو په وینا، اسراییلو له ۱۲ ساعتونو په لږه موده کې د دوهم ځل لپاره د لبنان د بېړنیو خدماتو پر یوه ډله برید وکړ.

د اسراییلو پوځ سمدستي د دې ادعا په اړه څه نه دي ویلي.

په عین حال کې د لبنان حزب‌الله ډلې بېګا ناوخته په یوه بیان کې وویل چې دوی د دې حملو په ځواب کې د اسراییلو پر یوه پوځي قطعه د توغندیو حمله وکړه.

د حزب‌الله او اسراییلو ترمنځ د حملو دا لړۍ د ۲۰۲۳ کال د اکټوبر په اوومه وروسته له هغه پیل شوه چې حماس ډلې پر اسراییلو برید وکړ، نژدې ۱۲ سوه کسان یې ووژل او ۲۵۰ نور یې برمته کړل او اسراییلو د حماس پر ضد چې امریکا او اروپایي ټولنه یې تروریستي ډله بولي په غزه کې عملیات پیل کړل.