د نړۍ د شل سترو اقتصادي قدرتونو د مشرانو غونډه چې د جرمني په هامبورګ ښارکې جوړه شوې وه، پرون شنبه پای ته ورسېده.
خو د غونډې ګډونوال ونه توانېدل چې د اقلیمي بدلون په اړه د پاریس له تړون سره د امریکا د جمهور رئيس ډونالد ټرمپ موافقه رایه واخلي او د هغه نظر بدل کړي.
د جرمني صدراعظمې انګلا مېرکل د دې دوه ورځنۍ سرمشریزي د پای په وینا کې، وویل چې له امریکا پرته، د نوولس سترو اقتصادي قدرتونو مشرانو د اقلیمي بدلون په اړه د پاریس موافقه تائید کړه.
انګلا مېرکل وویل:
"زه خوشاله یم چې د دې ډلې نورو مشرانو د پاریس موافقه ومنله او نه بدلېدونکې یې وبلله، هغوی ومنله چې د پاریس د موافقې پراساس، باید ژر تر ژره خپل مسئولیتونه سر ته ورسوو، موږ د انرژۍ او اقلیمي بدلون په اړه د هامبورګ کاري پروګرام جوړ کړ."
د اقلیمي بدلون په اړه د پاریس موافقه په ۲۰۱۵میلادي کال کې شوې وه چې د امریکا د متحدو ایالاتو ولسمشر یوه میاشت مخکې له هغې د وتلو اعلان وکړ.
د فرانسې ولسمشر ویلي چې هېواد به یې د روان کال د ډسمبر میاشتې په دوولسمه، د پاریس د موافقې د عملي کولو او د زیات پرمختګ په اړه یوه نړیواله غونډه، بحث ته را وبولي.
د رپوټونو په حواله، د فرانسې ولسمشر هیله څرګنده کړې چې د امریکا د جمهور رئيس ډونالد ټرمپ په هڅولو به بریالی شي او د دې موافقې په اړه د هغه نظر به بدل کړي.
د هامبورګ د سرمشریزي په څنډه کې، د امریکا ولسمشر ډونالد ټرمپ د روسیې له جمهور رئيس ولادیمیر پوتین سره وکتل او تر دوو ساعتونو زیاتې خبرې یې ورسره وکړې.
رپوټونه وايي چې دواړو مشرانو په سوریه کې د جګړې په اړه ځیني موافقې هم کړې دي.
په هامبورګ کې ددوه ورځنۍ سرمشريزي پرمهال، د سرمایه داري نظام یوشمېر مخالفو ډلو لاریونونه وکړل، موټرو ته یې اورونه واچول او په ځیني سیمو کې یې له پولیسو سره نښتې هم کړې دي.
د جرمني چارواکو ویلي چې په دې نښتو کې تر ۲۰۰زیات پولیس زخمیان شوي او لږترلږه ۲۰۰مظاهره چیان او اعتراض کوونکي نیول شوي دي.
