د لاسرسي لېنکونه

د افغانستان د بندونو به اړه د ایران د ولسمشر څرګندونو غبرګونونه زیات کړل


د کجکي بند

د افغانستان د اوبو د بندونو په اړه د ایران د ولسمشر حسن روحاني څرګندونو په افغانستان کې بېلابېل غبرګونونه راپارولي او یو شمېر حقوقي او مدني فعالان په دې نظر دي چې افغان حکومت باید په دې اړه د خپل اعتراض غږ پورته کړي.

دوی په حکومت غږ کوي چې د افغانستان د اوبو د بندونو په تړاو د ایران د ولسمشر حسن روحاني د وروستیو څرګندونو په اړه چوپ پاتې نه‌شي.

د افغانستان د ډموکراتو حقوق‌پوهانو د ټولنې رئیس کبیر رنجبر د پنجشنبې په ورځ په دې اړه له ازادي راډیو سره په خبرو کې د ښاغلي روحاني یادې وروستۍ څرګندونې د افغانستان په چارو کې د هغه هېواد ښکاره لاسوهنه وګنله.

د ډیموکراټو حقوق پوهانو د ټولنې رئیس کبیر رنجبر
د ډیموکراټو حقوق پوهانو د ټولنې رئیس کبیر رنجبر

نوموړي وویل:

"زموږ دولت باید جدي برخورد وکړي، اعتراض وکړي او چوپ پاتې نه‎شي، ځکه که چوپ پاتې کېږي دوی بیا خپلو تېریو ته ادامه ورکوي او زه فکر کوم چې دا د افغانستان په چارو کې ښکاره مداخله ده او دې ته باید نه دولت، نه مدني ټولنه او نه د افغانستان خلک اجازه ورکړي."

په ورته وخت کې مدني فعال نعیم افضلي هم ورته نظر لري او وايي:

"زما په نظر دا مهمه ده او هیله ده چې افغان حکومت له هرې ممکنې لارې چې وکولای شي دا موضوع مطرح او د افغانستان له ګټو دفاع وکړي."

د ایران ولسمشر حسن روحاني د سې شنبې په ورځ په تهران کې په یوه ناسته کې ویلي چې د کمال خان، کجکي او سلما بندونو د جوړېدو پر وړاندې بې‌تفاوته نه‎شي پاتې کېدای.

د افغانستان ولسي جرګې د ښاغلي روحاني دغه څرګندونې حساسیت پارونکې بللي او په کابل کې د ځوانانو یو شمېر مدني ټولنې هم د پنجشنبې په ورځ په دې اړه په بېلابېلو غونډو کې د افغانستان د اوبو په اړه د نوموړي وروستۍ خبرې غندلې دي.

په ورته وخت کې د افغانستان جمهوري ریاست وايي چې افغانستان د خپلو اوبو قانوني مدیریت کوي او که ایراني چارواکو بیا ځلې په دې اړه څرګندونې وکړې غبرګون به وښيي.

د ولسمشر مرستیال ویاند نجیب‎الله ازاد
د ولسمشر مرستیال ویاند نجیب‎الله ازاد

د ولسمشر د ویاند مرستیال نجیب‌الله ازاد وايي:

"که ده په دې اړه نور څه وویل او یا هم پوه شو چې د افغانستان په چارو کې لاسوهنه کوي نو افغان حکومت به هېڅکله هم غلی پاتې نه‎شي."

د یادونې وړ ده چې د تېر کوچني اختر په لومړۍ شپه ناپېژانده وسله‎‎والو د سلمان بند لس ساتونکي ووژل، خو چا یې مسؤلیت په غاړه وانه‎خېست.

د ټولنیزو رسنیو، فېس‎بوک او ټویټر یو شمېر کارونکو هم په دې اړه غبرګون ښودلی او د یادې موضوع تر څنګ‌یې د اوبو د دغو بندونو په امنیت ټینګار کړی کوم چې د ایران ولسمشر یې اندېښمن کړی دی.

راپور: اجمل تورمان

XS
SM
MD
LG