په کابل د شیعهګانو د یو مسجد په ګډون په څو بېلابېلو ځایونو له خونړیو حملو وروسته پهدغه ښار کې یو شمېر سُني او شیعه عالمانو په یوه خبري غونډه کې د یو بل لاسونه پورته کړل او ويې ښوده چې په افغانستان کې د شیعه او سني ترمنځ هېڅ اختلاف وجود نهلري.
د افغانستان د علماو د سرتاسري شورا رئیس قیام الدین کشاف په دې خبري غونډه کې وویل چې افغانستان د مذهبونو د یووالي په برخه کې په نړۍ کې بې ساری دی.
د هغه په خبره د افغانستان دښمنان هېڅ دین او قانون ته ژمن نهدي او غواړي چې په افغانستان کې د شیعه او سُني ترمنځ نفاق راپیدا کړي او په دغه هېواد کې د مذهبي جنګونو د پیلولو هڅې نتیجه نه ورکوي.
هغه ډاډ څرګند کړو چې د دولت وسلهوال مخالفین به په دې برخه کې خپل ارمان ته ونه رسېږي.
نوموړی وايي:
"زه خپلو ګرانو هېوادوالو ته ډاډ او دښمنانو ته خبرداری ورکوم چې په افغانستان کې د شیعه او سُني ترمنځ اختلاف وجود نهلري، او ویلای شم چې په افغانستان کې د شیعه او سُني یووالی دښمن خپل هغه هدف ته چې د سُني او شیعه ترمنځ نفاق راپیدا کړي نه رسېږي."
دا څرګندونې وروسته له هغې کېږي چې د تېرې جمعې په شپه د کابل په لویدیځ کې د شیعهګانو په یو مسجد دوه تنه وسلهوالو حمله وکړه چې له امله يې لږ تر لږه پنځه تنه ووژل شول او تر لسو نور ټپيان شول.
د الزهرا په نوم په دغه مسجد د حملې مسؤلیت داعش وسلهوالې ډلې په غاړه واخېست.
دې وسلهوالې ډلې له دې وړاندې هم په شیعهګانو د بېلابېلو حملو مسؤلیت منلی دی.
د کابل د کارته سخي او باقر العلوم په مسجدونو د حملو له امله هم یو شمېر کسانو ته مرګ ژوبله رسېدلې وه.
یو شمېر علماؤ چې د یکشنبې ورځې په خبري غونډه کې یې حاضر وو دا ډول اعمال د اسلامي ارزښتونو سره په ټکر کې وبلل.
شعیه عالم واعظ زاده بهسودي وویل چې د افغانستان شیعهګان او سُنیان سره ورونه دي او هېڅکله به یې تر منځ نفاق رامنځته نهشي.
د نوموړي په خبره د دولت د وسلهوالو مخالفینو کړنلارې د علماو او شریعت څخه پاکوالی وړی دی.
ده وسلهوالو مخالفینو ته په خطاب کې وویل:
"تاسو په خپلو کړنو د اسلام، شریعت، دين او علماوو ابرو لهمنځه وړې، د طالب کلېمه مقدسه ده، طلب کول د انبیاو دنده وه، تاسو په خپلو اعمالو سره پاکوالی له هره ځایه له منځه وړی دی، تقدس مو له دیني عالم، مسجد، شریعت او ټولو ځایونو څخه له منځه وړي دي."
یو شمېر عالمانو په خپلو خبرو کې همدا راز له ګاونډیو هېوادونو څخه وغوښتل چې د افغانستان د خلکو او د مذهب ترمنځ د نفاق اچولو څخه لاس واخلي.
د افغانستان د علماو سرتاسري شورا مشر قیام الدین کشاف د پاکستان د علماو شورا مشر ته په چې ویلي وو، په افغانستان کې جهاد روا دی وویل چې پاکستان ځینې وخت خپل عملي موقف په پام کې نه نیسي.
راپور : اکرام الله اکرام
