د لاسرسي لېنکونه

پنجشنبه ۲۳ لیندۍ ۱۳۹۶ کابل ۰۴:۰۹

سرچینه: د کابل دشت برچي حمله کې قومي مشر رمضان حسین زاده او یو پولیس افسر وژل شوي


یوې باوري سرچینې د نوم ښودلو په شرط ازادي راډیو ته وویل چې د کابل ښار د دشت برچي سیمې انتحاري حمله کې د حاجي رمضان حسین زاده په نوم قومي مشر تر ټپي کېدو وروسته په روغتون کې ساه ورکړې ده.

یادې سرچینې زیاته کړه چې په یاده پېښه کې د کابل ښار د شپږمې امنیتي حوزې مرستیال هم وژل شوی دی.

سرچینه وايي چې د حمله کوونکو شمېر درې تنه وو چې دوه تنه یې له پولیسو سره نښته کې وژل شوي او یوه بل انتحاري د جومات په اشپږ خانه کې ځان ته چاودنه ورکړې ده.

که څه هم د کره مرګ ژوبلې په اړه تر دامهاله معلومات نه دي ورکړل شوي خو راپورونه وايي چې په یاده پېښه کې د پولیسو په ګډون یو شمېر لمونځ کوونکي مړه او ټپیان شوي دي.

  • پخواني معلومات

د افغانستان د کورنیو چارو وزارت وايي چې د کابل ښار په دشت برچي سیمه کې د دنن شپې په انتحاري حمله کې یو پولیس او یو ملکي وګړی وژل شوی دی.

د کورنیو چارو وزارت د ویندوی د دفتر سرپرست نجیب دانش پر خپل فیس بوک پاڼه لیکلي چې په یاده پېښه کې درې پولیس او څلور ملکي وګړي ټپیان شوي هم دي.

پخواني معلومات

د کابل ښار د دشت برچي په سیمه کې د «الزهرا» په نوم جومات کې چاودنه شوې ده.

پېښه نن شپه اته بجې او پنځه څلوېښت رامنځته شوې ده.

د افغانستان د کورنیو چارو وزارت د ویندوی د فتر سرپرست نجیب دانش ازادي راډیو ته وویل چې یاده چاودنه چې کېداشي انتحاري حمله وي د ماسختن د لمانځه پر مهال رامنځته شوې ده.

ښاغلي دانش زیاته کړه چې د پېښې ځای ته امنیتي ځواکونه رسېدلي دي.

بلخوا ویل کېږي چې د پېښې په ځای کې د ډزو غږونه هم اورېدل کېږي.

تر دامهاله د یادې چاودنې د تلفاتو په اړه څه نه دي ویل شوي.

تر دامهاله ددې چاودنې مسؤلیت کومې وسله والې ډلې په غاړه نه دی اخیستی.

XS
SM
MD
LG