د امريکا ولسمشر ډونالد ټرمپ پر دې غور کوي چې بيتالمقدس ته د امريکا د سفارت انتقال به د فلسطينيانو او اسرائيل تر منځ د سولې پر پروسه څه اغېز وکړي.
د امريکا د بهرنیو چارو وزير رکس ټېلرسن د يکشنبې په ورځ له «اېن. بي. سي» ټلوېزيون سره په مرکه کې وويل، ټرمپ په دې اړه له احتیاطه کار اخلي چې د سفارت د انتقال په اړه د ده پرېکړه به د سولې پر پروسه څه اغېز وکړي.
ټېلرسن دا څرګندونې څو ورځې مخکې له هغه کوي چې ټرمپ خپل لومړی بهرنی رسمي سفر پيلوي چې په ترڅ کې بهيې د اسرائيل او فلسطیني ادارې له مشرانو سره هم وویني.
د بیتالمقدس موقف په روان کړکېچ کې تر ټولو حساسه مسئله ده.
فلسطينیان بيتالمقدس د خپل راتلونکي دولت پلازمېنه ګڼي.
اسرائيل د بيتالمقدس ختيځ جلا کړی او ټول ښار يې د خپلې پلازمېنې په توګه اعلان کړی خو د اسرائيل دا اقدام د نړيوالې ټولنې لهخوا په رسميت نهدی پېژندل شوی.
د ولسمشرۍ د کمپاین پر مهال ډونالد ټرمپ ژمنه کړې وه چې بيتالمقدس به د اسرائيل د پلازمېنې په توګه په رسميت وپېژني او سفارت به هلته انتقال کړي.
دغو خبرو فلسطينيان او د هغوی متحدان په غُصه کړل او ټرمپ له هغه راهيسې له دې خبرې پر شا شوی دی.
ټېلرسن ويلي چې د ټرمپ پرېکړه به د معلوماتو له مخې وي او په مذاکراتو کې د ټولو ښکېلو خواوو څخه به په دې اړه مشوره غواړي.
په ځانګړې توګه د اسرائيل نظر به پوښتي چې ايا دا کار به د سولې له پروسې سره مرسته وکړي که به ښايي پام ورڅخه واړوي.
د اسرائيل صدراعظم بنيامن نتانياهو د امریکا اندېښنې رد کړې.
د نتانياهو دفتر په يوه اعلاميه کې ويلي چې بيتالمقدس ته د سفارت انتقال به د ضرر پر ځای د سولې له پروسې سره مرسته وکړي، يوه تاریخي تېروتنه به سمه کړي او د فلسطينيانو له ذهنه به وباسي چې وايي، بيتالمقدس د اسرائيل پلازمېنه نهدی.