د افغانستان د سرحدي پولیسو چارواکې وايي چې تېره شپه د پکتیکا د برمل ولسوالۍ د انګور اډې په سیمه کې د دوی پر دوو پوستو د پاکستان د سرحدي ملېشو لهخوا برید شوی دی.
نن د جمعې په ورځ د سویل ختیځ زون د سرحدي پولیسو قوماندان مل پاسوال رازمحمد مندوزي د ازادي راډیو مشال څانګې ته وویل چې برید د پاکستانیو ملېشو له خوا پیل شو چې د شپې د اتو بجو څخه يې تر دولسو بجو دوام وکړ، خو افغان سرحدي پولیسو ته په کې کومه مرګ ژوبله نهده اوښتې.
ښاغلي مندوزي زیاته کړه، پاکستاني ملېشو د زاوه په غر کې له خپلو نوې ۲۷ نمبر پوستې څخه د افغان سرحدي ځواکونو په میوند او میوند یو پوستو د سپکو او درنو وسلو ډزې پیل کړي چې بیا وروسته افغان ځواکونو هم پرې ځوابي برید وکړ.
ده وویل، د برمل په انګور اډه کې افغان او پاکستاني سرحدي ساتونکې له یو بل سره په پنځه سوه مترۍ کې پراته دي او افغان سرحدي ځواکونو د برید سیمه لیدله.
نوموړي زیاته کړه چې اوسمهال د برید په سیمه کې حالات عادي شوي، خو دوی نه پوهېږي چې پاکستانیو سرحدي ملېشو ولې د افغان سرحدي پولیسو پر پوستو برید وکړ.
د سویل ختیځ زون د سرحدي پولیسو قوماندان وویل، پاکستاني لوري ورته د برید په باب د خبرو اترو وړاندیز کړی، خو دوی ورته ویلي چې موضوع دې له اسلام اباد سره شریکه کړي تر څو دواړه لوري پهدې اړه رسمي خبرې اترې وکړي.
چارواکې وايي، د برمل د زاوه غر پر سر نوې پوستې څو میاشتې وړاندې د پاکستان د سرحدي ملیشو لهخوا جوړې شوي دي.
پکتیکا د پاکستان له قبایلي سیمو او بلوچستان ایالت سره ۳۶۵ کېلومتره ګډه سرحدي پوله لري.
نجیب الله الوخېل