د افغانستان ولسي جرګه وايي، په ننګرهار کې د داعش پر مرکز د امریکا له لورې د بم غورځولو مسئله دې د حکومت او ولسي جرګې د ګډ پلاوي له لوري وڅېړل شي.
د ولسي جرګې رئیس د دغه مطلب په څرګندولو سره وویل چې د ګډ پلاوي له څېړونو مخکې په دې اړه بحث کول به له وخته وړاندې وي.
د ولسي جرګې د یو شمېر غړیو له وړاندیز وروسته عبدالروف ابراهیمي وویل چې د ولسي جرګې او حکومت ګډ پلاوی دې ننګرهار ته ولاړ شي او له نېږدې دې دغه موضوع وڅېړي.
نوموړي زیاته کړه:
"د ننګرهار په اچین ولسوالۍ کې د داعش او د ترهګرو پر مرکز د امریکا د برید په اړه د یو پلاوي د لېږولو په اړه ستاسو وړاندیز دقیق دی، د حکومت او ملي شورا څخه یو ګډ پلاوی باید لاړ شي او د دغه پېښې د جانبي زیانونو، مرګ ژوبلې، اغیز او ټولو مسایلو په اړه دې څېړنې وکړي."
د ننګرهار په اچین ولسوالۍ کې د داعش پر مرکز د امریکا له لوري غیري هستوي خو د ستر بم غورځولو بېلابېل غبرګونونه هم درلودل.
تر دې دمه د ننګرهار په اچین ولسوالۍ کې د غورځول شوي بم له کبله د ۹۴ داعشیانو وژل کېدل د افغانستان دفاع وزارت له لورې تائید شوي دي.
د دغه وزارت ویاند دولت وزیري وايي چې د یاد برید په نتیجه کې په اچین کې د داعش څو تونلونه هم ویجاړ شوي دي.
افغان حکومت وايي چې دغه برید له دوی سره په همغږۍ شوی دی.
د دغه برید په اړه د ولسي جرګې د ځینو غړیو له مخالف نظر سره ـ سره د جرګې ډېر شمېر غړي بیا په اچین کې د داعش پر مرکز د امریکا له برید څخه هرکلی کوي.
د ولسي جرګې غړی عبدالستار درزابي وايي چې د امریکا دغه برید هغو هېوادونو ته واضح پیغام درلود چې له ترهګرو ملاتړ کوي.
نوموړي زیاته کړه:
"امریکا نن پاکستان، ایران او ان روسیې ته واضح پیغام ورکړ چې که په افغانستان کې څه وشي له دې هم پورته پېښه کېدای شي."
د ولسي جرګې یو بل غړی عبدالروف انعامي بیا وايي امریکا په دغه برید سره د سیمې هېوادونو ته د خپل قدرت توان وروښود.
نوموړي زیاته کړه:
"زما په نظر دا تر ډېره نړیوال اړخ لري او سیمه ییزو قدرتونو ته د زور ښودل دي هغه قدرتونه چې یو وخت یې افغانستان اشغال کړی و او دوی یې مخه ونیوله، اوس غواړي چې په دا ډول عکس العملونو سره دا وښي چې تاسو زموږ د مزاحمت توان نه لرئ."
د ولسي جرګې یو شمېر زیات غړي د ننګرهار په اچین ولسوالۍ کې د داعش د مرکزونو د لمنځه وړلو لپاره د لوی بم کارونه پرځای ګڼي وايي چې په دغه برید کې ګڼو داعشیانو ته مرګ ژوبله اوښتې ده.
د ولسي جرګې غړیو همدا راز د دغه پېښې په اړه د حکومت له دریځه د ملاتړ ترڅنګ وویل چې امریکا باید د افغانستان له پولو اخوا هم د ترهګرو مزکزونه په نښه او لمنځه یوسي.
راپور: محمد حدیث پردېس
