سره لهدې چې داعش ډلې کابل کې د سردار محمد داوود خان په پوځي روغتون د تیرې چهارشنبې د ورځې حیرانوونکي خونړي برید مسؤلیت په غاړه واخېسته خو چارواکي او کارپوهان په دې باور دي چې په دغه برید کې د طالبانو د ورته بریدونو نښې تر سترګو کېږي.
څو ساعته وروسته لهدې چې طالبانو د چهارشنبې د ورځې د خونړي برید مسؤلیت په غاړه وانهخېست، اسلامي دولت یا داعش ډلې د خپل تبلیغاتي ویبسایټ اعماق له لارې ادعا وکړه چې جنګیالیو یې چې د ډاکټرانو جامې اغوستې وې کابل کې تر ټولو لوی پوځي روغتون ته لاره پرانیستې.
وروستیو رپوتونه وویل چې د سردار محمد داوود خان په روغتون برید کې شاوخوا ۵۰ کسه وژل شوي دي.
خو چارواکو په دې کې شک څرګند کړ چې دغه برید به د داعش لهخوا شوی وي.
دغه ډله چې غواړي افغانستان کې ځان ته د پښې ځای پیدا کړي د امریکايي ځواکونو د سختو هوايي او افغان قواوو ځمکنیو بریدونو سره مخامخ ده.
یوه لوړ رتبه چارواکي د فرانسې خبري اژانس ته ویلي چې موږ داسې نښې او دلایل ترلاسه کړي چې د اسلامي دولت ډلې یا داعش ادعا ماتوي.
دغه چارواکي چې نوم يې نهدی اخېستل شوی ویلي چې داعش ډلې ته درانه زیانونه اوښتي او د دغسې پیچلو بریدونو توان يې له لاسه ورکړی دی او داسې نښې شته چې برید د طالبانو د حقاني شبکې لهخوا شوی دی.
خو د افغانستان د دفاع وزارت مرستیال ویاند جنرال محمد رادمنش پرته له نور تفصیله ازادي راډیو ته وویل چې دغه برید هغو پخوانیو بریدونو ته چې ولسي خلک يي په نښه کړي ورته دی.
ښاغلي رادمنش زیاته کړه:
"په هر صورت دا یو تروریستی فعالیت وو او هغو پخوانیو فعالیتونو ته ورته دی چې مخکې تردې یې د افغانستان جوماتونو او منبرونو کې ولسي خلک په نښه کړي، خو په یوې ډېرې پیاوړې لوبې ترسره شو. موږ باید منتظر پاتې شو څو تحقیقات تر هغه څه هم اوچت وضاحت وړاندې کړي چې موږ يې فکر کوو."
بلخوا پوځي کارپوه جنرال عتیق الله امرخېل په دې باور دی چې دغه برید کې د طالبانو لاس ښکاري او پاکستان کې تنظیم شوی دی.
نوموړی وايي:
"حقیقت کې خبره دا ده چې دا برید نورو خلکو کړی یا خپله طالبان دي یا د حقاني ډله ده یا بله، اما داعش دومره قدرت نهلري چې شپږمه حوزه کې او بیا د سردار داوود خان روغتون کې برید وکړي."
جنرال امرخېل زیاتوي کله چې طالبان او حقاني شبکه د کوم برید مسؤلیت چې ولسي خلک په کې وژل شوي وي په غاړه وانهخلي نو بیا داعش ډله له فرصته په استفاده يې ادعا کوي څو وښيي چې د افغان حکومت او امریکایانو د ادعا خلاف دوی افغانستان کې دومره ځپل شوي نهدي او په هر ځای کې چې وغواړي برید کولای شي.
بلخوا د افغانستان د ملي امنیت مشاور حنیف اتمر ټایمز اف انډیا ته ویلي چې دا نظر چې داعش او طالبان یو بل سره مخالفت لري درست نهدی.
هېڅ کوم یو داعشي له سوريي او یا عراقه افغانستان ته نه دی راغلی.
هغه ویلي چې داعش د پاکستان د تحریک طالبان او ازبکستان د اسلامي تحریک یوه نوې بڼه ده.
خلک هماغه دي خو نومونه يې بدل کړي. کیدای شي افغان طالبان او داعش په ننګرهار کې یو بل سره مخالفت ولري خو د افغانستان شمال ختیځ کې د دولت خلاف ګډ جنګېږي.
