د کابل ښار په پرونیو دوو انتحاري حملو کې د ګڼو نورو ملکي کسانو تر څنګ د ملي شورا د اداري برخې یو کارکوونکی صفيالله نجیب هم وژل شوی دی.
د صفيالله همکاران د یو شمېر ملکي کسانو او د خپلو یو شمېر همکارانو د وژلو په اړه د خپلو سترګو لیدلی حال بیانوي.
د صفيالله همکار واصل عمر چې غږ یې هم رپېده ازادي راډیو ته وویل، په لومړۍ چاودنه کې د دوی یو شمېر همکارانو ته مرګ ژوبله واوښته.
دی وایي، کله چې صفيالله له خپلو ټپي شویو همکارانو سره د مرستې هڅه کوله دوهمه چاودنه وشوه چې صفيالله هم پهکې ووژل شو.
نوموړی وايي:
"کله چې انتحاري حمله وشوه، زموږ ټولو ملګرو او همکارانو هڅه کوله چې زخمیانو سره مرسته وکړي، کلهیې چې د زخمیانو مرسته کوله بله انتحاري حمله وشوه چې پهکې زموږ ملګري چې مرستې لپاره تللي وو له دوهمې حملې سره ووژل شول."
واصل عمر زیاتوي چې په دغې پېښه کې د صفيالله سربېره د دوی یو شمېر نور همکاران هم وژل شوي او ټپیان شوي دي.
د سې شنبې مازیګر د کابل ښار په لویدیځه برخه کې دوه پرلهپسې انتحاري حملې وشوې.
یوهیې د دارالامان پر سړک د ملي امنیت د پنځم ریاست په دروازه کې وشوه او دوهمهیې همدې سیمې ته نېږدې د افغانستان امریکایي پوهنتون ته څېرمه.
د افغانستان د عامې روغتیا وزارت د وروستیو معلوماتو له مخې په دغو انتحاري حملو کې ۳۷ تنه وژل شوي او ۹۸ تنه ټپیان شوي دي خو یو شمېر رسنۍ بیا د وژل شویو او ټپيانو شمېر زیات ښیي.
د کابل امنیه قوماندانۍ د جنايي څېړنو رئیس فریدون عبیدي ازادي راډیو ته ویلي چې د سې شنبې ورځې د چاودنو ډېری قربانیان ملکي وګړي دي.
په ورته وخت کې د صفيالله ماما نعیم نظري ازادي راډيو ته وویل، صفيالله څه موده مخکې واده کړی و، ده څرګنده کړه چې د صفيالله د وژنې د خبر له اورېدو سرهیې مور هم په کوما حالت کې ده.
نوموړی وايي:
"له ډېرو هیلو سره لاړ، د هیلو یوه سلنهیې هم نهوه پوره، ټوله کورنۍ یې، ورور او خویندې یې مور یې او ټول خپلوانیې نن د غم په ټغر ناست دي."
هاخوا یو شمېر دیني عالمان وايي چې د هېواد دښمنان په دا ډول حملو سره غواړي د مسلمانو تر منځ وېره خپره کړي.
دیني عالم بسمالله عثماني وايي، هر هغه څوک چې د اسلام او جهاد په نوم بېګناه خلک وژني مسلمان نهدي او یوازې د اسلام د بدنامۍ لپاره کار کوي.
په کابل ښار او یو شمېر نورو ولایتونو کې د سې شنبې ورځې حملې د افغان چارواکو او یو شمېر بهرنیو هېوادونو او سازمانونو لهخوا په کلکو ټکو غندل شوي دي.
افغان ولسمشر محمد اشرف غني د دغو حملو په غبرګون کې ویلي د داسې جنایت عاملان به د افغانستان په هېڅ برخه کې په امان کې نهوي.
راپور: عبادالله حنانزی
