د افغانستان دفاع وزارت هغه انتقادونه ردوي چې ګواکې د هېواد په بېلابېلو برخو کې عملیات ځنډني پرمخ ځي او لاسته راوړنې نهلري.
د افغانستان د پوځ د لوی درستیز مرستیال جنرال مراد علي مراد د افغان امنیتي ځواکونو لهخوا غفلت ردوي او وایي، د عملیاتو په وړاندې هېڅ ډول لوی خنډ نشته.
جنرال مراد ازادي راډیو ته وویل، هغه څه چې د عملیاتو د ځنډ سبب کېږي، د ژمي موسم او د ملکي وګړو خوندیتوب دی.
نوموړی وايي:
"د هوا تأثیرات اکمالاتو ته ستونزې جوړوي او هم هوایي ملاتړ، توپچي او راکټي انداختونو ته ستونزې جوړوي. وسلهوال مخالفین تر ډېره د خلکو له استوګنیزو کورونو کار اخلي، دا ستونزې شته، خو عملیات نهدي دریدلي او ماته یې هم نهده خوړلې. زموږ امنیتي ځواکونه هېڅ ستونزه نهلري چې ووایو د هغه له کبله عملیات دروو."
د کندز ولایتي شورا او یو شمېر سیمه ییز اوسیدونکي وایي چې د دغه ولایت په ځینو برخو کې پوځي عملیات لاسته راوړنه نهلري او د دوی اندیښنې یې راپارولي دي.
د دې ولایت، ولایتي شورا وایي، پهدغه ولایت کې د ژمني عملیاتو په جریان کې هېڅ پرمختګ نه دی شوی.
د کندز د ولایتي شورا مشر امرالدین ولي ازادي راډیو ته وویل، که عملیات اوس نتیجه ورنهکړي، نو په اوړي یا دوبي کې به په دغه ولایت کې امنیتي ستونزې ډېرې شي.
ښاغلي ولي د کندز له سیمه ییزو چارواکو جدي انتقاد وکړ چې د دغه ولایت امنیت ته پاملرنه نهکوي.
نوموړي وویل:
"له بده مرغه چې جنګي قطعات یعنې پوځ او پولیس تر اوسه نهدي توانیدلي پر هغو سیمو چې باید کنټرول ولري، بشپړ واکمن شي. تر اوسه دغه بریالیتوب ته نهدي رسیدلي. دا پهخپله ښیې په ژمي کې چې شرایط مساعد دي که عملیات د اوس په څېر دوام وکړي، په حمل میاشت او هم په اوړي کې به خطرناکه پایلې ولري."
د شفق په نوم عملیات د ۱۳۹۵ لمریز په لومړیو کې پیل شول او دوهم پړاو یې د شفق دوه په نوم د ژمي په رارسېدو سره پیل شو.
رادمنش: راتلونکې میاشت د «شفق۲» په نوم پوځي عملیات پیلېږي
د افغانستان پوځ د لوی درستیز مرستیال وایي، د روان کال په اوږدو کې وسلهوالو مخالفینو ته سخت زیانونه اوښتي دي.
د ده په خبره افغان امنیتي ځواکونه توانیدلي د مخالفینو لوی پلانونه شنډ کړي.
یو له دغو پلانونو څخه د جنرال مراد په خبره له کوټې څخه افغانستان ته د طالبانو د شورا د انتقال مخنیوی وو.
دی وایي، وسلهوال مخالفین په دې کار کې ناکام شوه.
