د افغانستان دفاع وزارت د طالبانو هغه ادعا چې ګواکې ۴۱ ولسوالۍ د دوی په ولکه کې دي بېبنسټه بولي.
د ۲۰۱۶ میلادي کال له پای ته رسېدو سره سم طالبانو ادعا وکړه چې په افغانستان کې له څلوېښتو زیاتې ولسوالۍ د دوی په ولکه کې دي، هغه ادعا چې دفاع وزارت یې بېبنسټه بولي.
د دفاع وزارت ویاند دولت وزیري د دوشنبې په ورځ ازادي راډیو ته وویل چې طالبانو په ۲۰۱۶ میلادي کې پراخې او جدي حملې وکړې خو خپل هدف ته ونهرسېدل.
ښاغلی وزیري د طالبانو وروستۍ ادعا د تبلیغاتي جګړې یوه برخه بولي، وايي چې دوی غواړي په دې توګه د جګړې په ډګر کې ځانونه بریالي وښیي.
نوموړي زیاته کړه چې په روانه جګړه کې افغان ځواکونه برلاسي دي:
"زه تاسو ته ویلی شم چې دا تبلیغات دي، دوی په ۲۰۱۶ کال کې له دې پرته چې د یوې او یا دوو ورځو لپاره کندز ښار ته ننوځي نور یې له ماتې پرته په هېڅ ځای کې مؤفقیت نهدی ترلاسه کړی."
د دفاع وزارت ویاند که څه هم په دې اړه چې دا مهال څومره ولسوالۍ د طالبانو په ولکه کې دي څه نهوايي، خو وړاندې دغه وزارت په دې اړه ازادي راډیو ته ویلي و چې افغان ځواکونه د افغانستان په ۱۱ ولسوالیو کې حضور نهلري.
دا لومړی ځل نهدی چې طالبان ورته ادعاوې کوي، خو دفاع وزارت تل دا ادعاوې رد کړي دي.
له دې ټولو سره-سره د پوځي چارو یو شمېر کارپوهان بیا وايي کمزورې حکومتوالي، د قانون نهحاکمیت او له دولت څخه د خلکو واټن دولتي حاکمیت تر پوښتنې لاندې راوستی.
پوځي کارپوه یوسف امین ځاځی وايي، دا چې طالبان په افغانستان کې ډېرې سیمې لاندې کوي د دوی د قوت نه بلکې د حکومت د ضعف ښکارندويي کوي.
نوموړي زیاته کړه:
"نا امنۍ، د قانون نهحاکمیت، د عدالت نهشتون په افغانستان کې وضعه خرابه کړې ده، د طالبانو دا ادعا کاملاً ناسمه ده فقط د حکومت کمزوری چلند د دې لامل شوی چې خلک له حکومت څخه مخ واړوي."
د ښاغلي ځاځي په خبره که څه هم په افغانستان کې جګړه روانه ده او په دغې جګړه کې د سیمې او نړۍ ځیني استخباراتي کړۍ په خورا قوت ښکېلې دي، خو که افغان حکومت په کور دننه د ښې حکومتوالۍ، د عدالت د پلي کېدو او له دولت څخه د خلکو د واټن اخیستو د مخنیوي په برخه کې جدي اقدامات وکړي دغه چارې به تر ډېره د دولت د حاکمیت لپاره ګټورې تمامې شي.
راپور: محمد حدیث پردېس
