د جرمني رسنۍ وایي، پولیسو په یوه تونسي سړي پسې د لټون عملیات پیل کړي دي.
دا هغه سړی دی چې اسناد یې د هغې لارۍ په کابین کې موندل شوي چې د برلین د کرسمس په یوه بازار کې پر خلکو ورغله، ۱۲ تنه یې ووژل او نېژدې ۵۰ نور یې ټپیان کړل.
د جرمني ویلټ ورځپاڼې او ډېرشپیګل اونېزې نن چهارشنبې خبر ورکړ چې دغه کس د روان میلادي کال په پیل کې جرمني ته د یوه کډوال په توګه راغلی دی.
د جرمني چارواکو د چهارشنبې په ورځ ډاډ څرګند کړ چې دوی به ډېر ژر د دغې لارۍ چلونکی پیدا کړي خو دغه راز یې د برلین اوسیدونکو ته خبرداری ورکړی چې د یوه وسلهوال بریدکوونکي په اړه چې د تېښتې په حال کې دی، بیداره و اوسي.
دوی ویلي چې کیدای شي په دغه حمله کې له یوه زیات کسان ښکیل وي.
د جرمني جنایي څېړنو د ټولنې مشر اندري شولز په یوه ټلویزیوني وینا کې وویل، دی نسبتاً ډاډه دی چې دوی به ښایي سبا یا په نېژدې راتلونکې کې د نوي مشکوک کس په نیولو بریالي شي.
هغه وویل، زیات شواهد او نښې شته او دا هغه شواهد دي چې د دغه جنایت په اړه شاوخوا ۵۰۰ کسانو له دوی سره شریک کړي دي.
د برلین پولیسو مخکې د دغې پېښې په تړاو یو پاکستانی کډوال نیولی و چې وروسته یې د کره شواهدو د نشتوالي له امله د سې شنبې په ورځ بېرته خوشې کړ.
له دغې پېښې وروسته پولیسو د مهمو ځایونو امنیتي تدابیر زیات کړي دي.
د برلین د پولیسو ویاند توماس نیوندورف نن په برلین کې خبریالانو ته د امنیتي تدابیرو په اړه وویل:
"د برلین پولیسو یو واربیا خپل امنیتي پلانونه وڅېړل. موږ به د کرسمس په بازارونو او همدا شان نورو ځایونو کې د پولیسو له خوا امنیتي تدابیر زیات کړو. پر دې سربېره پولیس به په ښکاره له ځان سره ماشینګڼې ګرځوي او موږ به دغه راز لکه د لارو د بندولو په څېر تخنیکي اقدامات هم وکړو چې د ځینو سیمو امنیت لا ټینګ کړو."
د اسلامي دولت سخت دریځې ډلې یا داعش د دغې حملې مسؤلیت په غاړه اخېستی دی.
د جرمني صدراعظمې انګېلا مېرکل چې تېر میلادي کال په خپله خاوره کې د په سلګونو زره کډوالو د منلو د سیاست له امله د سیاسي رقیبانو تر سخت فشار لاندې ده ویلي چې که دا تائید شي چې دغه حمله یوه پناه غوښتونکي ترسره کړې ده، دا به ډېره خواشینونکې وي.
