د اسیا زړه هېوادونو د بهرنیو چارو وزیرانو شپږم کنفرانس له ترورېزم سره د ګډې مبارزې او له افغانستان سره د ثبات او امن په راوستلو کې د همکارۍ په نیت نن د هند په امرتسر کې پيلېږي.
د افغانستان جمهوري ریاست په یوه بیان کې ویلي چې ولسمشر محمد اشرف غني او ورسره مل پلاوی پرون ماښام امرتسر ته ورسېد او د هند له صدراعظم سرهیې په ګډه په دغه ښار کې ګلډن ټېمپل [د سکهانو مشهور عبادتځای] هم ولید.
د هند د بهرنیو چارو وزارت ویاند ویکاس سوارپ هم په خپل ټویټر لیکلي چې:
"په یوه خاصه موقع کې صدراعظم نرېندرا مودي او ولسمشر محمد اشرف غني په ګډه له ګولډن ټېمپل [د سکهانو مشهور عبادتځای] لیدنه وکړه."
ښاغلي سوارپ دا لیدنه د یوې ښې ملګرتیا نښه وبلله.
د افغانستان د جمهوري ریاست د بیان له مخې افغان ولسمشر به د اسیا زړه هېوادونو د بهرنیو چارو وزیرانو کنفرانس ته وینا وکړي خو تر هغې مخکې به د هند له صدراعظم سره غونډه ولري.
اخوا هند کې افغان سفیر شیدا محمد ابدالي وايي، افغان ولسمشر محمد اشرف غني او د هند صدراعظم نرېندرا مودي به د نن ورځې کنفرانس له ترورېزم سره د ګډې مبارزې او د افغانستان په ثبات د یوې متمرکزې اعلامیې په اعلان پرانیزي.
ښاغلي ابدالي زیاته کړه:
"ګډه اعلامیه د افغانستان او د کنفرانس د غړو لهخوا ترتیب او منظور شوې ده. ولسمشر محمد اشرف غني او د هند صدراعظم نرېندرا مودي به دا اعلامیه د غونډې په پیل کې اعلان کړي. له ترورېزم سره مبارزه او په سیمه کې اقتصادي ثبات او پرمختګ د بحث وړ موضوعګانې دي."
تمه ده د هند په کوربهتوب په دغه کنفرانس کې د اسیا زړه هېوادونو د څوارلسو غړو او ۱۷ ملاتړو هېوادونو استازي برخه واخلي.
د پاکستان صدراعظم د بهرنیو چارو سلاکار سرتاج عزیز هم د شنبې په ماښام امرتسر ته رسېدلی خو چارواکو هندو ورځپاڼې ته ویلي چې له مودي سره د هغه کومه لیدنه نهده پلان شوې.
اخوا افغان کارپوه احمد سعیدي وايي چې دا کنفرانس تر پخوا ډېر متفاوته دی او پاکستان له دې پرته چې پهکې ګډون وکړي بله هېڅ لاره نهدرلوده.
ښاغلي سعیدي زیاته کړه:
"د سارک غونډې تحریم او د پاکستان او هند تر منځ د کشمیر په سر نزاکتونو بالآخره یو ځل بیا پاکستان مجبور کړ چې په دغه کنفرانس کې برخه واخلي. له دې پرته پاکستان بله چاره نهدرلوده ځکه پوهېده چې د یاد کنفرانس ۱۴ غړي هېڅ یو هم د پاکستان سیاستونه چې غوښتل یې دا کنفرانس هم تحریم شي نهمني. پاکستان یا باید پر مخ ولاړ شي یا نړیواله انزوا ومني."
د پاکستان د بهرنیو چارو وزارت ویلي د دې لپاره په دغه کنفرانس کې برخه اخلي چې په افغانستان کې د سولې او ثبات د ټينګښت په خاطر له ټولو هڅو سره مل قدم واخلي.
د افغانستان د سولې او ثبات په خاطر د اسیا زړه هېوادونه او ملاتړي يې په داسې حال کې د پاکستان په شمول سره غونډه کوي چې پاکستان تل د افغانستان او سیمې د نا امنۍ سرچینه بلل شوې او ویل شوي چې ترورېستانو پهکې ځاله کړې ده.
پنځه واره مخکې هم د افغانستان د ثبات او امن په هدف د اسیا زړه هېوادونو غونډې کړي خو معلومه نهده چې څومره به دا کېدونکې غونډې د افغانستان درد دوا کړي.
راپور: صفيالله ستانکزی
