د کندز سیمه ییز چارواکي وايي، په یاد ولایت کې د ملکي مرګ ژوبلې د وروستۍ پېښې د څرنګوالي د معلومولو لپاره چې ۳۱ ملکیان په کې ووژل شول یو پلاوی نن شنبې دې ولایت ته رسېږي.
د کندز د والي د مطبوعاتي دفتر مشر سماعیل تېره شپه ازادي راډیو ته وویل چې د مرکزي حکومت پلاوی په داسې حال کې کندز ته راځي چې محلي ادارې لا دمخه د نړیوالو ځواکونو په هوايي برید کې د ملکیانو د مرګ ژوبلې په اړه تحقیقات پیل کړي دي.
نوموړي زیاته کړه:
"دا چې د مرکزي حکومت په پلاوي کې د کومو ارګانونو استازي شامل دي تر اوسه يې په اړه معلومات نه لرو، خو موږ د ولایت په سطحه د دې موضوع د وضاحت لپاره د ملي امنیت، پوځي څارنوالۍ او نورو چارواکو یو ګډ پلاوی ټاکلی دی."
د کندز ښار په بُز کندهاري سیمه کې د پنجشنبې د شپې د هوايي برید په نتیجه کې د مرګ ژوبلې د وروستۍ شمېرې په اړه د دې ولایت د امنیه قوماندان محمد قسیم جنګل باغ ازادي راډیو ته وویل چې په دې حمله کې ۳۱ ملکي وګړي، درې افغان سرتېري او د دولت ۲۶ وسله وال مخالفان وژل شوي دي.
نوموړي هم تائید کړه چې د مرکزي حکومت پلټونکی پلاوی نن کندز ته رسېږي.
نوموړي زیاته کړه:
"یو دری یا څلور نفري پلاوی دی کېداشي نن شنبې کندز ته راشي."
په همدې حال کې په کابل کې د ملګرو ملتونو دفتر وايي، د کندز د پېښې په اړه لا د دوی معلومات بشپړ شوي نه دي او د تل په شان په دې هوايي حمله کې د ملکي افغانانو د مرګ ژوبلې په اړه لازمه پلټنه کوي.
د یوناما ویاند فلیب سموکر ازادي راډیو ته وویل:
"موږ په دې اړه اوس څه نشو ویلی، دا یوه پېچلې موضوع ده او موږ لا هیڅ ډول تحقیقات بشپړ کړي نه دي، زه نشم کولی اوس پرې تبصره وکړم."
د افغانستان د بشر د حقونو د خپلواک کمېسیون مشره سیما سمر هم وايي، له ۲۰۰۱میلادي کال راهیسې په دې هېواد کې ملکي وګړي د جګړو او تاوتریخوالي قربانیان دي او څه چې دا کمېسیون کولی شي هغه د دغه شان پېښو غندنه ده.
مېرمن سمر وايي، د ملکیانو وژنه چې د جګړې د هر لوري لخوا وي، له بشري حقونو سرغړونه ده.
نوموړې زیاته کړه:
"په جنګ کې له ښکېلو خواو څخه مو تل غوښتي چې د ملکیانو څخه د سپر په توګه استفاده ونه کړي، تر څو د ملکي خلکو د مرګ ژوبلې مخنیوی وشي، زموږ په نظر دا پېښه د بشري حقونو څخه یوه ډېره جدي سرغړونه ده او د جګړې له قوانینو سره په مخالفیت کې ده."
ناټو تړون وايي، په کندز کې د نړیوالو ځواکونو په هوايي برید کې د ملکیانو د مرګ ژوبلې موضوع څاري، خو د متحده ایالاتو د دفاع وزارت تر اوسه په دې اړه څه نه دي ویلي.
