د "انتخاباتي کمېسیونونو لپاره د کمېشنرانو غوراوي کمېټې" د هغو کسانو د اسنادو ارزونه پیل کړې چې غواړي په انتخاباتي کمېسیونو کې غړیتوب ولري.
دې کمېسیونونو کې د غړیتوب لپاره د نوم لیکنې له پروسې سره هممهاله د غوراوي کمېټه وايي چې د وړو کسانو د اسنادو ارزونهیې د پنجشنبې په ورځ پیل کړې ده.
د انتخاباتي کمېسیونونو لپاره د کمېشنرانو د غوراوي کمېټې ویاند یوسف رشید وايي، د اسنادو له ارزونې وروسته به په شرایطو د برابرو کسانو نوملړ وروستی شي.
ښاغلي رشید زیاته کړه:
"موږ لومړۍ مرحله چې د تثبیت او تفکیک ده پیل کړه، په دې مرحله کې به موږ د هغو اسنادو ارزونه کوو چې رارسېدلي دي او دا به معلومه کړو چې ایا دوی په شرایطو برابر دي او که نه؟ د دې مرحلې وروسته به د څېړنې او په شرایطو د برابرو کسانو د نوملړ پروسه پیل شي."
د ښاغلي رشید په خبره په شرایطو د برابرو کسانو څخه د انتخاباتو د کمېسیون لپاره د ۲۱ کسانو او د انتخاباتي شکایتونو د کمېسیون لپاره د ۱۵ کسانو نومونه به ولسمشر ته واستول شي.
ولسمشر غني به له یادو کسانو ۷ تنه د انتخاباتو د کمېسیون او پنځه تنه بهیې د انتخاباتي شکایتونو د کمېسیون لپاره د کمېشنرانو په توګه غوره کړي.
له افغان حکومته د نړیوالې ټولنې یوه مهمه غوښتنه په انتخاباتي نظام کې د اصلاحاتو رامنځته کول دي.
یوه ورځ وړاندې ولسمشر محمد اشرف غني هم د بروکسل په ناسته کې په انتخاباتي نظام کې پر اصلاحاتو تأکید وکړ.
پر اساسي قانون د ولسي جرګې د څار کمېسیون غړی عبدالودود پیمان وايي، خلک هیله لري چې د غوراوي کمېټې چارې دې شفافې وي.
ښاغلي پیمان زیاته کړه:
"د غوراوي کمېټې غړي مجبور دي چې د نړیوالو ډونرانو د ملاتړ لپاره داسې څېرې کمېسیون ته راولي چې خلکو ته د منلو وي او انشاءالله چې هغوی به په هېواد کې د شته ستونزو د حل لپاره ښه کارونه وکړي."
دا چې د انتخاباتي نظام د اصلاح په برخه کې به له نړیوالې ټولنې سره د افغان حکومت ژمنې تر کومه عملي شي د وخت په تېرېدو به روښانه شي.
راپور: محمد حدیث پردېس
