د ملګرو ملتونو سرمنشي بانکي مون د کوټې په یوه ملکي روغتون کې پرونۍ حمله یوه تروریستي حمله وبلله چې د ده په وینا وسله والو په روغتون کې په ویرجنو کسانو ترسره کړه.
بانکي مون د پاکستان له حکومته وغوښتل چې د دغې پېښې عاملین دې عدالت ته راکاږي.
سپینې ماڼۍ او د امریکا د بهرنیو چارو وزارت هم دغه خونړۍ حمله په سختو ټکو وغندله.
د امریکا د بهرنیو چارو د وزارت ویاندې الیزابت ترودو پرون په واشنګټن کې په یوه خبري غونډه کې وویل، هېواد به یې د خپلو شریکانو په خوا کې وي چې د ترورېزم په وړاندې مبارزه مخ ته یوسي.
اغلې ترودو زیاته کړه:
"دغو تروریستانو، روغتون، د قضایې او رسنیو څانګې چې د ډموکراسۍ اساسي ستنې دي، د حملو لپاره په نښه کړې. دغه ډول وحشیانه او بې رحمانه حملې په ټوله نړۍ کې د ترورېزم د ماتولو لپاره زموږ شراکت نور هم پیاوړی کوي. موږله پاکستان او په سیمه کې له شریکانو سره د دغه ګواښ د له منځه وړلو لپاره خپل کارته دوام ورکوو."
د روسیې ولسمشر ولادمیر پوتین چې ازربایجان ته یې سفر کړی، په یوه استولي پیغام کې د پاکستان له ولسمشر، د دې هېواد له صدراعظم او خلکو سره خپله خواخوږي څرګنده کړې ده.
پوتین دغه حمله د بشریت پر ضد حمله بللې چې د ده په وینا روسیه تمه کوي عاملین یې په سخته سزا ورسیږي.
د وروستیو شمېرو له مخې په دغه خونړۍ حمله کې د وژل شوېو کسانو شمېر اویا و ته اوچت شوی.
شاوخوا سل تنه هم ټپیان شوي چې د ځینو روغتیایي وضعیت نازک ښودل شوی.
د کوټې د روغتون په دروازه کې دغه ځانوژونکې حمله وروسته له هغه وشوه چې د یوه مخکښ مدافع وکېل بلال کاسي مړی دغه روغتون ته يووړل شو.
دغه مدافع وکېل د همدې ورځې په سهار په ډزو وژل شوی وو.
د داعش ډلې او جماعت احرار چې د پاکستاني طالبانو یوه څانګه ده، د کوټې پر روغتون د دغې حملې مسؤلیت په غاړه اخېستی.
د پاکستان صدراعظم نوازشریف په کوټه کې د دغې حملې له یو شمېر ټپیانو او د قربانیانو له کورنیو سره وکتل.
هغه په کوټه کې د پاکستان د پوځ د لوی درستیز راحیل شریف په ګډون د پاکستاني لوړ پوړو چارواکو د یوې اظطراري غونډې مشري هم وکړه.
د دغې غونډې په اړه نور جزیات نه دي ورکړل شوي خو د پاکستان حکومت ویلي چې د کوټې پر روغتون د دوشنبې د ورځې د حملې له عاملینو به غچ اخلي.
