د بشري حقوقو د څارنې سازمان له ناټو وغوښتل چې د افغانستان په جنګ کې د ولسي خلکو د مرګ ژوبلې مخنیوي ته چې په وروستیو شپږو کلونو کې یې دوامدار زیاتوالی درلوده زیاته پاملرنه وکړي.
دغه سازمان په وارسا کې د ناټو د مشرانو غونډې ته په یوه سرخلاصي لیک کې ویلي دي چې د سږنیو ولسي تلفاتو درېیمه برخه کوچنیان دي.
اکثریت دغه تلفات د وسله والو طالبانو او نورو ډلو له خوا شوي خو لیک دا هم وايي چې افغان امنیتي ځواکونه هم ځکه د دغو تلفاتو د یوې برخې مسئول دي چې په ځانګړي توګه یې په ځینو مواردو کې ښوونځیو څخه د پوځي عملیاتو داډو په توګه کار اخېستی.
ناټو ځواکونه سره له دې چې خپل پوځي عملیات یې یو نیم کال مخکې په افغانستان کې درولي دي خو بیا هم د څارنې او روزنې لپاره په دغه هېواد کې پاته دي.
د ملګرو ملتونو شمېر ښیې چې په ۲۰۱۵ کال کې د ولسي خلکو مرګ ژوبله څه دپاسه یوولسو زرو کسانو ته ورسېده چې د افغان ځواکونو له خوا د دغې مرګ ژوبلې کچه په کې په سلو کې اته ویشتو ته اوچته شوه.
د افغانستان حکومت د ملګروملتونو د وروستي رپوټ په ځواب کې وویل چې افغان امنیتي او دفاعي ځواکونه کورنیو قوانینو او نړیوالو بشري حقوقو ته په پاملرنې د خلکو د ځان او مال د ساتنې لپاره خپله دنده ترسره کوي.
د جمهوری ریاست د ارګ اعلامیې وویل، د دې لپاره چې وسله وال مخالفین له خلکو او کورونو یې د سپر په توګه کار اخلي دولتي ځواکونه خپل عملیات په ډېر احتیاط ترسره کوي چې ولسي خلکو ته تاوان ونه رسیږي.
د ولسي خلکو مرګ ژوبله د سږکال په لومړېو درېیو میاشتو کې په سلو کې اویا اوچته شوه.
د جرمني د خبري اژانس رپوټ زیاتوي:
ملګري ملتونه د خپلو معیارونو سره سم یوازې هغه تلفات چې د درېیو خپلواکو سرچینو له خوا تایید شي ثبتوي.
