په افغانستان کې د امریکايي او ناټو ځواکونو عمومي قوماندان جنرال جان نيکولسن د پاکستاني پوځ له مشر جنرال راحيل شريف سره پر دوه اړخيزو اړيکو او د افغانستان د سولې د پروسې په اړه خبرې کړي دي.
د پاکستاني پوځ مطبوعاتي دفتر «ISPR» په يوې خبرپاڼه کې ويلي چې دواړو پوځي مشرانو د دوشنبې په ورځ په راولپېنډۍ کې د پاکستاني پوځ په مرکزي قوماندانۍ کې سره ليدلي دي.
په افغانستان کې د ناټو په مشرۍ د غوڅ مأموريت د مشر قوماندان تر ټاکلو وروسته دا پاکستان ته د جنرال نيکولسن لومړى سفر دى.
د پوځ مطبوعاتي دفتر په خپرې کړې خبرپاڼه کې ويلي:
"دواړو مشرانو په دغې ليدنه کې پر دوه اړخيزو اړيکو علاوه د سيمې پر امنيتي وضعيت، په ځانګړي توګه د افغانستان او پاکستان د ګډې پولې په اوږدو کې په همکارۍ او د افغانستان د مفاهمتي عمل په اړه خبرې کړي دي."
خبرپاڼه همدارز زیاتوي چې جنرال نيکولسن د ترهګرۍ پر ضد د پاکستاني پوځ ضرب عضب پوځي عمليات او همداراز د سيمې د امنيت لپاره د دوى هڅې ستايلي دي.
په افغانستان کې د ناټو په مشرۍ د غوڅ مأموريت نوي مشر په داسې وخت کې د پاکستاني پوځ له مشر سره د افغانستان د مفاهمتي عمل په اړه خبرې کړي چې په دې وروستيو کې د دغې پروسې په لړ کې د پاکستان، افغانستان، چين او امريکا د استازو څلور اړخيزې کمېټې څو غونډې شوي دي.
د دغې کومېټې وروستۍ غونډه څه موده مخکې په کابل کې شوې وه چې په پاى کې يې د کمېټې غړو هېوادونو په يوې ګډې اعلاميه کې د افغان حکومت له وسله والو مخالفينو غوښتي وو چې له حکومت سره دې مذاکراتو ته کېني.
که څه هم ويل کېدل چې د روانې مارچ مياشت په پيل کې به په اسلام اباد کې د افغان حکومت او طالبانو مخامخ خبرې وشي، خو دا خبرې تر هغې وروسته تر نامعلوم وخت پورې وځنډېدې چې د افغان طالبانو مشرتابه له حکومت سره مذکرات د خپلو شرطونو په پوره کېدو پورې مشروط کړل.
راپور: ذبيح مومند