پرون د اروپا په څو ښارونو کې د اسلام او مهاجرت ضد عتراضونه وشول.
د اسلام او مهاجرت ضد غورځنګ يا پګيدا؛ د اروپا په څو ښارونو کې لاريون او مظاهرې وکړې.
دغه اعتراضونه له منځني ختيځ او افريقا نه اروپا ته د سلګونو زره کډوالو د راتګ پر خلاف وشول.
د جرمني په درسدن ښارګوټي کې د پوليسو يوې وياندې يانا اولبريخت د اعتراض کوونکو د شمېر په اړه رويټرز اژانس ته معلومات ورکړل:
”تمه کېږي په درسدن کې شا و خوا شل زره کسان مظاهره وکړي. اټکل کوو چې د پګيدا ډلې شا و خوا پنځلس زره کسان به په لاريون کې برخه واخلي، شا و خوا لس زره نور کسان به په نورو اعتراضونو کې ګډون وکړي.“
خو په لاريون کې د پګيدا غورځنګ د ګډوالو شمېر تر پنځلسو زرو کم و.
د ښار په بله برخه کې په سلګونو نورو کسانو د پګيدا د پلويانو پرضد لاريون وکړ. دوى شعار ورکاوه، چې د شړلو پرځاى پيوستون په کار دى او د نازيانو لپاره ځاى نه شته.
د دواړو لاريونونو د ګډونوالو ترمنځ د کومې شخړې راپور نه دى ورکړل شوى.
پګيدا يا د هېوادپالو اروپايانو غورځنګ چې د لوېديځ د اسلامي کېدلو خلاف دى، په ٢٠١٤م کال کې ايجاد شو.
دغه غورځنګ د جرمني د صدراعظمې انګيلامېرکل پر سياستونو هم انتقاد کړى، چې ولې د پناه غوښتونکو ملاتړ کوي.
له امستردام، برمينګهام، پراګ، وارسا او د فرانسې له شمال نه هم د وړو لاريونونو راپور ورکړل شوى دى.
دغه اعتراضونه په داسې حال کې کېږي، چې د سوريې په ګډون له جګړه ځپلو او نېستمنو هېوادونو په سلګونو زره کډوال له تېرکال راهيسې اروپا ته رسېدلي دي.