نیویارک ټایمز ورځپاڼې په افغانستان کې خبریالانو ته د ورپیښو خطرونو په اړه یو مطلب لیکلی دی.
ورځپاڼه لیکي:
څومره چې افغان ژورنالستان مسلکي کیږي هغومره ورته ګواښونه زیاتیږي.
نیویارک ټایمز لیکي:
په مزارشریف کې د پلوشه توخي په نامه د یوې خبریالې له وژل کیدو سره په روان م کال کې په افغانستان کې د وژل شوو خبریالانو شمېر۷ ته رسیدلی دی.
د ورځپاڼې په وینا ښايي د پلوشې توخي وژنه انتخاباتي شخړو پورې تړاو ولري او هغه ځکه چې د افغانستان د ۲۰۰۹ کال د انتخاباتو پرمهال هم درې افغان خبریالان وژل شوي وو.
نیویارک ټایمز له ژورنالستانو څخه د دفاع د کمیټې د ویاند نجیب خلوتګر په حواله لیکلي:
له ۲۰۰۱ لومړي کال راپدیخوا په افغانستان کې څلویښت ژورنالستان وژل شوي چې قضیه يې هم د قضايي ارګانونو له خوا حل شوې نه ده.
د خلوتګر په خبره د قضايي سیستم له خوا نه تعقیب د دې سبب شوی چې وژونکي زړور شي او داسې وانګیرې چې د ژورنالستانو پرضد څه چې وغواړي کولی شي.
خلوتګر له نیویارک ټایمز سره په خبرو کې د افغان ژورنالستانو د پرمختګونو په اړه ویلي.
افغان خبریالان مسلکي شوي او د جنګسالارانو او فساد پرضد تحقیقاتي لیکنې کوي چې دا کار د زورواکو د غصې سبب کیږي.
نیویارک ټایمز د دې مطلب په پای کې لیکلي، روان کال د افغانستان د ژورنالستانو لپاره وژونکی کال ثابت شوی دی.
هافنګټن ټایمزامریکايي ورځپاڼې هم د افغانستان د ژورنالستانو د وضیعت او ورته د پیښو ګواښونو موضوع یاده کړې ده.
ورځپاڼه لیکي، د خبریالانو پروړاندې د تاوتریخوالي او زورزیاتي زیاتې پیښې په ولایتونو کې کیږي.
هافنګټن ټایمزد افغانستان د بشري حقونو د کمیسون د غړې ثریا صبحرنګ څخه په نکل وايي، افغان ښځینه ژورنالستانې په بحراني حالاتوکې فعالیت کوي او د خپل کارپه ساحه کې هم په مختلفو ډولونو ځورول کیږي.
ورځپاڼه زیاتوي: که څه هم چې په نړېواله سطحه سوریه د ژورنالستانو لپاره وژونکی هېواد بلل کیږي خو په مزارشریف کې د افغان خبریالې د وژنې وروستۍ پیښې یوځل بیا د نړېوالو پام هغو خطرونو ته اړولی چې افغان ژورنالستان ورسره مخامخ دي.