د لاسرسۍ وړ لېنکونه

تازه خبر
پنجشنبه ۷ زمری ۱۴۰۰ کابل ۱۱:۱۵

خبرونه

پشه يي: د انتخاباتو کمیسیون ته نوی راغلی ټیم به هېواد له ناورین سره مخ کړي

د انتخاباتو خپلواک کمیسون وایي چې؛ دې کمیسون ته د نوي ټیم راتلل به راتلونکي انتخابات او هېواد له ناورین سره مخ کړي.

د دې کمیسیون مرستیال عبدالخالق حسیني پشه یي نن په یوه خبري غونډه کې وویل چې؛ دغه کسان د انتخاباتو په برخه کې تخنیکي او مسلکي پوهه نه لري نو ځکه نشي کولی دلته کار پر مخ بوځي:

(نوی ټيم چې راغلی تر څو تر خپل دفتر پيژني او تر څو چې عملیاتي پلان لولي، د سنبلې میاشت را رسیږي، دوی له مسلکي پلوه په کار نه پوهیږي).

هغه همدا راز ټینګار وکړ چې د قانون له مخې د انتخاباتو د خپلواک کمیسون د پخوانیو شپږو غړیو کاري موده پای ته نه ده رسیدلې او باید خپل کار ته دوام ورکړي.

د انتخاباتو د خپلواک کمیسون د تشکیل او صلاحیتونو د قانون له مخې چې پدې وروستیو کې نافذ شو، ولسمشر باید د غوراوي د کمیټې له وړاندیز وروسته یاد کمیسون ته نهه نوي غړي ور وپيژني.

د ورځې تازه خبرونه دلته ولولئ

بایډن نن د کرونا په اړه نوې تګلاره اعلانوي

د امریکا ولسمشر جو بایډن

د امریکا ولسمشر جو بایډن نن پنجشنبه(د زمري ۷مه) د کرونا واکسین په اړه نوې تګلاره اعلانوي.

د سپینې ماڼۍ په وینا، دی به اعلان وکړي چې ټول فدرالي ماموران باید د کرونا واکسین وکړي او که نه په منظم ډول دې خپلې معاینې ترسره کوي.

دا اعلان داسې مهال کېږي چې په متحده ایالاتو او نوره نړۍ کې د کرونا د ډېلټا بڼې زیاتېدو ته اندېښنې ډېرې شوي دي.

د بایډن دا اعلان به د پوځیانو په ګډون د دغه هېواد ۴.۲ میلیونه حکومتي کار کوونکي متاثره کړي.

تمه ده چې د واکسین د جبري کېدو په اړه د بایډن دا تګلاره به د یو شمېر جمهوري غوښتونکو او هغو کسانو له مخالفت سره مخامخ شي چې د ازادیو د نقضېدو اندېښنه لري.

اوکراین کې د الوتکې د لوېدو پېښې یو پیلوټ او ۳ امریکایان ووژل

اوکراین کې لویدلې الوتکه

د اوکراین په لویدېځ کې د یوې وړې الوتکې د لوېدو په پېښه کې یو ځایي پیلوټ او درې امریکایان وژل شوي دي.

پولیسو ویلي چې دا الوتکه په ځایي وخت غرمه مهال په ایوانو فرنکیوسک سیمه کې له یوه کور سره ولګېده.

وژل شوي امریکایي مسافر د امریکا هسدیک یهودان بلل شوي دي، دا خبره د اوکراین د یهودانو متحدې ټولنې کړې ده.

د پولیسو په وینا له هغه کوره چې دا الوتکه پرې لګېدلې، یوه مېرمن او دوه ماشومان روغ وتلي دي.

حمدالله محب د اروپايي ټولنې له استازي سره پر افغانستان غږیدلی

د افغانستان لپاره د اروپایي ټولنې ځانګړي استازي توماس نکلسن د افغانستان د ملي امنیت له سلاکار حمد الله محب سره وکتل

د افغانستان لپاره د اروپایي ټولنې ځانګړي استازي توماس نکلسن د افغانستان د ملي امنیت له سلاکار حمد الله محب سره د افغان سولې پر هڅو، د جګړې د ډګر پر وضعیت، په جنګ کې د قوانینو د پلي کولو او ګډو لاسته راوړنو پر خوندیتوب خبرې وکړې.

د ملي امنیت شورا په یوه بیان کې ویلي دي چې دا خبرې پرون چهارشنبه (د زمري ۷مه) په کابل کې وشوې.

ښاغلي نکلسن بیا د دې لیدنې کتنې په اړه په ټویټرکې لیکلي دي چې د افغانستان د امنیتي وضعیت په اړه چې تېرو څو میاشتو کې تغییر په کې راغلی دی او د سولې د خبرو د ګړندیتوب په اړه یې له ښاغلي محب سره ګټورې خبرې کړي دي.

د 'یونېسکو' له لوري ۳ فرهنګي میراثونه د افغانستان په نوم ثبت شول

ارشیف

د افغانانو درې فرهنګي میراثونه د ملګروملتونو ښوونیزې، علمي او فرهنګي ادارې 'یونېسکو' له لوري د افغانستان په نوم ثبت شول.

دا درې میراثونه، د میناتورۍ هنر د بهزاد سبک یوازې د افغانستان په نوم، د وریښمو د تولید او روزنې صنعت د افغانستان، اذربایجان، ایران، ترکیې، ترکمنستان او ازبیکستان د ګډ میراث په نوم او یلدا شپه له ایران سره په ګډه د نړیوالو ناملوسو فرهنګي میراثونو په توګه د دوه زره دووه ویشتم کال د ثبت لپاره ومنل شول.

د زمري اوومه افغانستان کې د ملي بیرغ ورځ ده

آرشیف، د افغانستان ملي بیرغ

نن د زمري اوومه په افغانستان کې د ملي بیرغ ورځ ده.

په کابل او نورو ښارونو کې چې د دولت تر واک لاندې دي، درې رنګه بیرغ د ملي سمبول په توګه نندارې ته وړاندې کېږي.

خو په هغو سیمو کې چې پخوا د طالبانو په لاس کې وې یا یې په وروستیو څو اونیو کې نیولي دي، طالبانو د تورسپین او زرغون بیرغ پر ځای خپل سپین بېرغ پر دولتي ادارو راځوړند کړی دی او درې رنګه بیرغ یې لېرې کړی دی.

د افغانستان درې رنګه بیرغ په نولس سوه اته ویشتم کال کې د شاه امان الله خان د واکمنۍ پرمهال په لویه جرګه کې تصویب شوی و.

سلسله عليخېل ته غبرګونونه؛ سویډن کې ګڼو افغانانو مظاهره وکړه

اسلام اباد کې د افغان سفیر لور سلسله علیخېل

د سویډن په پلازمېنه ستاکهولم کې په لسګونو افغانانو د پاکستان د سفارت مخې ته پرون مظاهره وکړه.

مظاهره چیانو په پاکستان تور پورې کړ چې د طالبانو ملاتړ کوي او په افغانستان کې نیابتي جګړه مخته وړي دا هغه تور دی چې اسلام اباد تل رد کړی دی.

د سویډن تردې مظاهرې مخکې په تېرې یوې اوونۍ کې یو شمېر افغانانو د امریکا د متحد ایالاتونو ځینو ښارونو، بریتانیا، بلجیم او ځینو نورو غربي هېوادونو کې د پاکستان د سفارتونو او سیاسي نمایندګیو مخې ته مظاهرې کړې وې.

د دې مظاهرو پر مهال په اسلام اباد کې د افغان سفیر د لور سلسلې علیخېل د برمته کیدو پېښه هم غندل شوې ده، سلسله علیخېل د چنګاښ په ۲۵مه په اسلام اباد کې وتښتول شوه چې ترڅو ساعته برمتې او ربړونې وروسته خوشې شوه.

چارواکي: په کاپیسا کې هوايي برید ۵ طالبان ووژل

آرشیف

امنیتي ځواکونه وایي، د کاپیسا په نجراب ولسوالۍ کې الوتکو پرون چهارشنبه(د زمري۶مه) پر طالبانو بمباري وکړه.

د کاپیسا د امنیه قومانداني ویاند عبدالشایق شورش ازادي راډیو ته وویل: "د هوایي ځواکونو د عملیاتو پر مهال چې د نجراب ولسوالۍ د شهرواني بازار سیمه کې ترسره شول پنځه طالبان ووژل شول او درې تنه یې ټپیان شول."

ښاغلي شورش زیاته کړه چې دا بمبارد پرون غرمه وشو. طالبانو تراوسه په دې اړه څه نه دې ویلي.

ترکیې تر ۲۳۰ ډېر کډوال نیولي چې یونان ته تلل

آرشیف، د ترکیې په سمندر کې کډوال

ترکیې تر دوه سوه دیرشو ډېر کډوال نیولي دي چې د ایجین سمندرګي له لارې د کب نیونکو په یوې بېړۍ کې د یونان لورته پورې وتل.

د ترکي رسنیو په وینا د چهارشنبې په ورځ ۲۳۱ کډوال سمندرغاړې ځواکونو راګرځولي دي.

دوی د افغانستان، سوریې، ایران، ایریتریا، یمن او پاکستان دي.

انقرې په دوه زره شپاړسم کال کې له اروپایي ټولنې سره تړون لاسلیک کړی دی چې له مخې به یې د اروپا لور ته د کډوالو د تیرېدو مخه نیسي، د دې په بدل کې اروپایي ټولنه له ترکیې سره مرسته کوي چې دا کډوال په خپله خاوره کې وساتي.

ترکیه له اروپایي ټولنې غواړي چې د مرستو په بدل کې د کډوالو د مخنیوي تړون نوی کړي.

جو بایډن د بلاروس د اپوزسیون له مشرې سره وکتل

د امریکا د متحد ایالاتونو ولسمشر جو بایډن او د بلاروس د اپوزسیون مشره سویتلانا څخانوسکایا

د امریکا د متحد ایالاتونو ولسمشر د بلاروس د اپوزسیون له مشرې سره چې په جلاوطني کې ژوند کوي، په سپینه ماڼۍ کې وکتل.

جوبایډن تر دې غونډې وروسته وویل، امریکا د بلاروس له ولس سره ولاړه ده.

ترغونډې وروسته سویتلانا څخانوسکایا وویل چې خپل پيغام یې د امریکا تر ولسمشره ورساوه: "د دې لپاره چې د ولسمشر کاري پروګرام ډېر بوخت دی. موږ ډېر وخت نه درلود، شااوخوا پنځلس دقیقې مو خبرې وکړې، خو دا ډېر تود هرکلی و. ما داسې څوک ولیدل چې بې تفاوته نه دی، هغه څه چې په بلاروس کې پېښیږي هغه ته بې تفاوته نه دی."

څخانوسکایا زیاته کړه چې ولسمشربایډن ورته ویلي دي چې په بلاروس کې مبارزه د سیاسي جغرافیې لپاره نه ده، هلته د شخړو او بې قانوني پرضد مبارزه ده.

په بلاروس کې وروسته تردې کړکېچ رامنځته شو چې الکساندرلوکاشینکا پروسږکال د اګست د میاشتې په انتخاباتو کې د شپږم ځل لپاره د ولسمشر په توګه اعلان شو.

د ده مخالفان وایي چې دې انتخاباتو کې درغلۍ شوي دي او څخانوسکایا په کې بریالۍ شوې وه.

مېرمن څخانوسکایا غواړي چې بیا انتخابات وشي.

امریکا او هند ژمنه وکړه چې خپل امنیتي مشارکت به پراخوي

انتوني بلېنکن او اېس جی شنکر پرون په نوي ډیلي کې سره وکتل

د امریکا د متحد ایالاتونو او هند د بهرنیو چارو وزیرانو ژمنه وکړه چې خپل امنیتي مشارکت به پراخوي.

انتوني بلېنکن او اېس جی شنکر پرون په نوي ډیلي کې سره وکتل. ښاغلي بلېنکن وویل، د افغانستان په ثبات کې د هند ونډه مهمه ده.

د بلېنکن او شنکر ترمنځ دا غونډه په داسې حال کې وشوه چې له افغانستانه د نړیوالو ځواکونو له وتلو سره چین په سیمه کې د خپل نفوذ د پراختیا هڅو ته مخه کړې ده.

د امریکا د بهرنیو چارو وزیرخبریالانو ته وویل، د امریکا او هند اړیکي د اهمیت له پلوه په نړۍ کې بې ساري دي.

ده زیاته کړه چې امریکا او هند به د افغانانو د لاسته راوړنو د خوندیتوب او په سیمه کې د ثبات لپاره خپلو هڅو ته له افغانستانه د نړیوالو ځواکونو تر وتلو وروسته هم ادامه ورکوي.

د هند د بهرنیو چارو وزیر اېس جی شنکر بیا وویل چې نړیواله ټولنه یو خپلواک، ډموکراتیک او باثباته افغانستان غواړي چې له ګاونډیانو سره په سوله کې وي.

بلېنکن: افغانستان کې پوځي حل‌لار نه‌شته، طالبان او حکومت باید خبرې وکړي

د امریکا د بهرنیو چارو وزیر انتوني بلېنکن

د امریکا د بهرنیو چارو وزیر چې هند ته په سفر تللی وايي، په افغانستان کې پوځي حل‌لار نه‌شته، طالبان او حکومت باید خبرې وکړي.

انتوني بلېنکن د هند له بهرنیو چارو وزیر اېس جې شنکر سره په ګډه خبري غونډه کې وویل، دواړه هېوادونه په دې موافق دي چې د افغانستان راتلونکی حکومت باید ټول‌شموله او د افغانانو بشپړ استازی وي او په نهایت کې د افغانانو په مشرۍ او مالکیت د سولې پروسه وي.

د امریکا د بهرنیو چارو وزیر وویل، هند به د افغانستان په ثبات او پرمختګ کې حیاتي رول ته دوام ورکړي.

یوه طالب پلاوي له چینايي چارواکو سره د افغانستان پر حالاتو خبرې وکړې

د چین د بهرنیو چارو وزیر وانګ يي (ښی) او د طالبانو د سیاسي دفتر مشر ملا برادر

د طالبانو یوه پلاوي له چینايي چارواکو سره د افغانستان پر حالاتو خبرې وکړې.

د طالبانو د قطر دفتر ویاند محمد نعیم ویلي چې د ملا عبدالغني برادر په مشرۍ د دوی نهه کسیز پلاوي له چینايي چارواکو سره د افغانستان پر اوسني وضعیت او د سولې پر پروسې خبرې وکړې.

د محمد نعیم په وینا طالب پلاوي چین ته ډاډ ورکړ چې د افغانستان له خاورې به د هېڅ هېواد پر ضد کار نه‌اخیستل کېږي.

له بلې خوا د چین د بهرنیو چارو وزارت ویاند ژاو لیجیاني نن په یوه خبري غونډه کې وویل: "نن د بهرنیو چارو وزیر وانګ يي د ملا برادر اخوند په مشرۍ د طالبانو د سیاسي کمېسیون له پلاوي سره په تیان جین کې وکتل. په دې پلاوي کې د افغانستان د طالبانو د مذهبي او سیاسي چارو او تبلیغاتو د کمېټې مشران هم شامل دي."

ده همداراز وویل چې افغانستان د افغانانو دی او افغانان باید د افغانستان راتلونکې وټاکي.

د چین د بهرنیو چارو وزارت ویاند په عین حال کې له افغانستانه د امریکا او ناټو ځواکونو پر ژر وتلو انتقاد وکړ.

پکتیکا چارواکي: د طالبانو له لوري پر خښ شوي ماین ۴ ملکیان وژل شوي

د افغانستان په نقشه کې د پکتیکا ولایت

د پکتیکا امنیتي چارواکي وايي په دې ولایت کې د وسله والو طالبانو له لوري پر خښ شوي ماین څلور ملکیان وژل شوي، خو له افغان ځواکونو سره په جګړه کې ۶ وسله وال طالبان وژل شوي.

د پکتیکا د امنیه قوماندانۍ ویاند شاه محمد ارین نن له غرمې وړاندې رسنیو ته وویل چې د پکتیکا ولایت په مټاخان ولسوالۍ کې تېر ماښام په یوه سراچه ډول موټر چاودنه شوې چې په کې سپاره څلور کسان وژل شوي دي.

ارین وایي، وژل شوي ټول کسان ملکي وګړي دي او ماین د وسله والو طالبانو له لوري په عامه لاره کې ځای پر ځای شوی و

همدا راز د یوه بل خبر له مخې د پکتیکا په جاني خېلو ولسوالۍ کې د افغان ځواکونو او وسله والو طالبانو تر منځ جګړه شوې.

د امنیه قوماندانۍ ویاند شاه محمد ارین وایي، د افغان ځواکونو په ځوابي ډزو کې شپږ وسله وال طالبان وژل شوي او اته تنه ټپیان شوي دي.

د ارین په وینا په وژل شوېو کې یو پاکستانۍ هم شامل دی او د درېیو کسانو جسدونه د جګړې په ډګر کې پاتې دي.

وسله والو طالبانو تر اوسه د دې دواړو پېښو په اړه رسنیو ته څه نه دي ویلي.

خوست چارواکي: یوه کور کې یو شمېر وسلې، مهمات او ماینونه نیول شوي

خوست کې نیول شوي پوځي تجهیزات

د خوست د ملي امنیت منسوبینو تېره شپه د ګربزو ولسوالۍ د منګلو په کلي کې له یوه کوره یوه اندازه وسلې، مهمات، ماینونه او نور پوځي تجهیزات نیولي دي.

د ملي امنیت منسوبنیو نیول شوې وسلې، مهمات، ماینونه او نور پوځي تجهیزات د یاد ریاست په انګړ کې رسنیو ته وښودل.

نن چهارشنبه (د زمري په ۶مه) د خوست والي مهمند کټوازي ازادي راډیو ته وویل چې د یادو وسلو په تور یو کس هم نیول شوی چې دا مهال ورڅخه پوښتنې ګرویږنې روانې دي.

د ده په وینا په نیول شوېو وسلو او مهماتو کې ۴۰ ډوله بېلابېل پوځي تجهیزات شامل دي.

خوست والي وویل، د دوی کشفي او استخباراتي معلومات ښيې چې وسله وال مخالفین هڅه کوي، په خوست کې د قومونو او خلکو تر منځ اختلافات پیدا کړي او په واسطه يې دا ولایت نا امنه کړي.

خوست والي له خلکو وغوښتل چې د هر ډول ورانکارو عملونو په شنډولو او د پېښيدونکو مالي او ځاني زیانونو په مخنیوي کې دې له افغان امنیتي او دفاعي ځواکونو سره مرسته وکړي.

د خوست امنیتي ځواکونو یوه میاشت مخکې په ښار کې له ۴ ټنه چاودیدونکو توکو ډک موټر هم نیولي او شنډ کړي وو.

عمران خان: ګرانه ده چې طالبان سیاسي روغې جوړې ته اړ کړای شي

د پاکستان صدراعظم عمران خان

د پاکستان صدراعظم عمران خان وايي، اوس خورا ګرانه ده چې طالبان سیاسي روغې جوړې ته مجبوره کړل شي.

عمران خان له پي بي اېس نیوز ټلوېزیون سره په مرکه کې امریکا د افغانستان د حالاتو د خرابولو مسووله وبلله، ویې ویل، کله چې شااوخوا یو نیم لک امریکايي پوځیان په افغانستان کې مېشت وو، د سیاسي روغې جوړې امکان و، خو کله چې یې ۱۰ زره سرتېري وااېستل او د نورو د اېستلو مهالوېش یې اعلان کړ، طالبانو فکر وکړ چې جګړه یې ګټلې ده.

عمران خان وویل، اوس څوک طالبان سولې ته اړ اېستلی نه شي.

د افغانستان حکومت پاکستان د طالبانو په ملاتړ تورنوي او وايي چې په وروستیو کې له پاکستانه زرګونه طالبان او نور سخت دریځي د جګړې لپاره افغانستان ته وراوښتي دي.

خو عمران خان له پي بي ایس سره په مرکه کې دا تور بې اساسه وباله.

نور راوښيه

XS
SM
MD
LG