د لاسرسي لېنکونه

تازه خبر
سه شنبه ۲۸ لړم ۱۳۹۸ کابل ۰۷:۳۱

نړۍ

په یونان کې د پارلماني ټاکنو لپاره د ټاکنو مرکزونه پرانیستل شول

په یونان کې د انتخاباتو مرکزونه پرانیستل شول او خلک یو وار بیا د پارلمان د ټاکلو لپاره رایې ورکوي.

په یونان کې له ډیرې مودې راهیسې سیاسي او اقتصادي بحران روان دی؛ تمه ده، چې نوي پارلمان به د ایرو په زون کې د دې هیواد د راتلونکې پریکړه وکړي.

په یونان کې رایه ورکونکي د سریزا ګوند او د نوي ډيموکراسي محافظه کار ګوند تر منځ ویشل شوي دي.

خو داسې نه څرګندیږي، چې یو ګوند به هم د اکثریت په ګټلو وتوانیږي نو له کوچنیو ګوندونو سره د ایتلاف لپاره اړتیا ده.

د سریزا ګوند مشر ویلي دي، چې د اکثریت ایتلاف په جوړولو د بریالیتوب په صورت کې به د مالي ملاتړ د ۱۳۰ ملیاردو ایرو پلان لغوه کړي.

یونان سږکال له پورونو د خلاصیدو په خاطر له اروپايي هیوادونو سره پردې پلان خبرې وکړې.

د نوې ډیموکراسۍ محافظه کار ګوند هم ویلي دي، چې دوی به د مالي ملاتړ پردې پلان له سره غور کوي، خو دومره شدید دریځ نه لري. د نظرپوښتنوپه ترڅ کې څرګنده شوې ده، چې اتیا فیصده یونانیان په ایرو زون کې د پاتې کیدو علاقه لري.

د راییو مرکزونه به نن مازدیګر وتړل شي او نتایج يې ښايي ماښام ته څرګند شي.

د ورځې تازه خبرونه دلته ولولئ

مسکو کې محکمې د یوه امریکايي وګړي د توقیف موده غځولې

پاول وېلن په روسیه کې د جاسوسۍ په تور نیول شوی دی او که مجرم وپېژندل شي، په روسیه کې په لږترلږه ۲۰ کاله بند محکومېدلائ شي.

د مسکو یوې ښاري محکمې نن د نومبر په ۱۹مه تائید کړه چې د پاول وېلن په نوم د یوه امریکايي وګړي تر محاکمې د مخکې توقیف موده یې تمدید کړې.

پاول وېلن په روسیه کې د جاسوسۍ په تور نیول شوی دی او که مجرم وپېژندل شي، په روسیه کې په لږترلږه ۲۰ کاله بند محکومېدلائ شي.

هغه په ۲۰۱۸ میلادي کال کې د مسکو په یوه هوټل کې ونیول شو او تور ورپورې شو چې معتبر پټ معلومات یې ترلاسه کړي دي.

د هغه تر محاکمې مخکې د توقیف موده د ډسمبر تر ۲۹مې تمدید شوې ده.

د امریکا د سمندري ځواکونو د دغه مخکیني مامور وکیلانو پر هغه لګېدلي تورونه رد کړي او نن يې د هغه لپاره د استنیاف غوښتنې په غونډه کې محکمې ته وویل چې د ویلن په برخه کې پرېکړه باید نرمه شي او د توقیف پرځای په کور کې نظر بند شي.

په مسکو کې د امریکا سفارت د جولای په لومړۍ نېټه غوښتنه وکړه چې خپلواک ډاکتران دې ۴۹ کلن ویلن معاینه کړي.

خو سفارت وویل چې غوښتنه یې رد شوې او له هغه راهیسې د وېلن صحت لا خراب شوی دی.

د پاکستان پخوانی صدراعظم نوازشریف د درملنې لپاره لندن ته لاړ

د پاکستان پخوانی صدراعظم نوازشریف

د پاکستان پخوانی صدراعظم نواز شریف د درملنې لپاره نن د نومبر په ۱۹مه، له لاهوره لندن ته ولاړ.

نواز شریف په ځانګړې الوتکه کې چې هوايي امبولانس او د عملیات او بېړنۍ څارنې خونه لري، ولېږدول شو.

لندن ته له هغه سره یې ورور، شهباز شریف او د ډاکترانو او نرسانو یوه ډله هم ملګرې وه.

شهباز شریف د پاکستان دحکومت د اپوزېسیون ګوند مسلم لیګ ن مشري کوي.

د مسلم لیګ ن ګوند ویاند ویلي چې نواز شریف ته تر پرواز مخکې ټولې ضروري دواوې ورکړ شوې وې او د ډاکترانو او نرسانو تر کلکې څارنې لاندې و.

هغه لومړی د قطر پلازمېنې دوحې ته لېږدول کېږي او له هغه ځایه لندن ته ځي.

د اسلام اباد سترې محکمې د اکټوبر په ۲۹مه نېټه د روغتیايي دلایلو له مخې د هغه د محاکمې پروسه دوه میاشتې وځنډوله.

پومپیو پر اوکراین د پوځي مرستو له بندېدا ملاتړ وکړ

د امریکا د بهرنیو چارو وزیر مایک پومپیو

د امریکا د بهرنیو چارو وزیر مایک پومپیو پر اوکراین د پوځي مرستو د بندولو په قضیه کې د ولسمشر ډونالډټرمپ د پالیسۍ ملاتړ کړی.

دا په داسې حال کې ده چې د ولسمشر ټرمپ د استیضاح د هڅو په ترڅ کې په دې اړه چې آیا هغه پر اوکراین د پوځي مرستې د بندولو په قضیه کې له خپل واک څخه ناوړه کار اخیستی کنه، په کانګرس کې د اظهاراتو د اورېدو د لړۍ دوهمه اونۍ پیل شوې.

ښاغلي پومپیو د ټرمپ د پالیسۍ د دفاع په ترڅ کې پرون د نوامبر په ۱۸مه په واشنګټن کې په یو خبري غونډه کې وویل ټرمپ اوکراین ته چې په خپلو دوو ختیځو سیمو کې د روس پلوو بیلتونپالو پرضد جګړه کوي، د وژونکو وسلو د ورکولو په برخه کې د بارک اوباما د ادارې د لویو غلطیو مخه ونیوله.

ټاکل شوې چې په روانه اوونۍ کې د ملي امنیت شورا او د دفاع او بهرنیو چارو وزارتونو د چارواکو په ګډون نهه کسان چې د اوکراین لپاره د ټرمپ له پالیسیو خبر دي په کانګرس کې څرګندونې وکړي.

مسکو د "مارګایتاایګناتووا" نوم د ورکو کسانو په لیست کې شامل کړی

ارشیف

د مسکو پولیسو هغه راپورونه تائید کړي چې د روسیې د انټرفکس خبري اژانس د اډیټرې مارګاریتا ایګناتووا نوم یې د ورکو کسانو په لیست کې شامل کړی دی.

د مسکو د پولیسو یوه ویاند پرون دوشنبې دولتي خبري آژانس تاس ته وویل، د دې ځوانې ژورنالیستې مور د پولیسو په دفتر کې د خپلې لور د تري تم کېدو راپور ثبت کړی او پولیسو هم هڅې پیل کړې دي چې پته یې معلومه کړي.

روسي رسنیو د ۲۹ کلنې ایګناتووا د مور له قوله راپور ورکړی چې وايي، دې خپله لور وروستۍ ځل د یکشنبې په ورځ د سهار په نهو بجو په داسې حال کې چې کلیسا ته تلله ولیده خو هغه وايي چې د هویت کارت، موبایل ټېلفون او پیسې یې نه دي ورسره وړي.

روسۍ څارنواله څلورو کسانو ته د عمري بند سزا ورکولو هڅه کوي

ارشیف

یوه روسۍ څارنواله د هغو څلورو کسانو لپاره د عمري بند د سزا هڅه کوي چې په 2017 میلادي کال کې د روسیې په دویم لوی ښار سینټ پیټرزبورګ په میټرو کې کې په خونړۍ چاودنه کې مشکوک دي.

څیړونکي وايي، د اکبرجان جلیلوف په نوم ۲۲ کلن ازبک ټبري روسي چې قرغزستان کې زیږیدلی د 2017 میلادي کال د اپریل په 3 مه نېټه په ځان پورې تړلي چاودیدونکی بم د میټرو په یو ډبه کې وچوه چې 15 کسان یې ووژل او 67 نور یې ټپیان کړل.

دویم بم د میټرو په تم ځای کې اېښودل شوی و چې په خوندي توګه شنډ کړی شو.

څارنوالې نادیژدا تيښونوا د دوشنبې په ورځ له قاضي وغوښتل تورن ابرار عظیموف چې د چارواکو په وینا ددې بریدونو طراح دی او همدارنګه د اکرام عظیموف، محمد یوسف ایرمتوف او ابراهیم جان ایرمتوف په نومونو درې نورو ته دې د عمري بند سزا ورکړي.

تېښونوا همدارنګه له قاضي وغوښتل چې د دې قضيې سره تړلي پنځه نور کسان دې له 27 کلونو څخه تر 28 کلونو پورې په بند محکوم کړي.

د محکمې قاضي وروسته له هغې دا محاکمه وځنډوله چې په تورونو کې د یوازینۍ ښځې روغتیايي وضیعت خراب شو او روغتون ته د رسولو لپاره یې امبولانس راوبلل شو.

فرانسې د روسیې له خوا د اوکراین د کښتیو بېرته سپارلو هرکلی کړی

روسیې دا کښتۍ د دوشنبې په ورځ اوکراین ته سپارلي.

فرانسې د روسیې له خوا د اوکراین د هغو دریو کښتیو د بېرته ورسپارلو د اقدام هرکلی کړی چې تېر کال د روسیې سمندري ځواکونو په تور سمندرګي کې نېولې وې.

فرانسې ویلي، دا به د ډیسمبر په میاشت کې په پاریس کې هغه جوړیدونکې سرمشریزې ته اسانیتا رامنځته کړي چې د روسي او اوکراین د کړکیچ د هواري په هدف جوړیږي.

د دوشنبې په ورځ د فرانسې د ولسمشر ایمانویل مکرون او د روسیې د ولسمشر ویلادیمیر پوتین ترمنځ له ټیلفوني خبرو وروسته د فرانسې د ولسمشرۍ دفتر په یو بیان کې دا ویلي چې "دا چلند به د روسي او اوکراین ترمنځ ډیالوګ کې باور زیات کړي."

روسیې دا کښتۍ د دوشنبې په ورځ اوکراین ته سپارلي.

د فرانسې د ولسمشرۍ دفتر په خپله اعلامیه کې زیاته کړې دواړو مشرانو د د ډیسمبر په 9 مه نېټه په پاریس کې د اوکراین د ولسمشر ویلادیمیر ځیلینسکي، او د روسیې د ولسمشر ویلادیمیر پوتین ترمنځ د جوړیدونکې غونډې پر چمتوالي خبرې وکړې.

په دې غونډه کې به د فرانسې ولسمشر ایمانویل مکرون او د جرمني صدراعظمه انګیلا میرکل هم برخه ولري.

ګورجستاني پولیسو د اعتراض کونکو پر ضد اوبه شیندونکې کارولي

ګورجستاني پولیسو یو شمېر کسان نېولې هم دي.

د ګورجستان په پلازمېنه تېبلیسي کې د بلوا ضد پولیسو د هغو اعتراض کونکو په وړاندې اوبه شیندونکې کارولي چې پارلمان ته د دننه کېدو لارې یې تړلې وې او تر وخت مخکې د ټاکنو غوښتنه کوي.

پولیسو همدارنګه یو شمېر کسان نېولې هم دي.

تاوتریخوالي هغه مهال رامنځته شو چې د متناسب ټاکنیز سیستم غوښتونکي سلګونه معترضان پرون دوشنبه د څلورمې ورځې لپاره پارلمان ته نږدې په څلورو ځایونو کې راټول شوي وو او د "ژوندی دې وي ګرجستان" شعارونه یې ورکول.

دوی په اساسي قانون کې د ګرجستان د پارلمان له خوا د هغه تعدیل په ردېدو اعتراض لري چې په دې هېواد کې د متناسبې انتخاباتي استازولۍ سیستم ته لاره پرانیزي.

د ګورجستان د کورنیو چارو وزارت وايي، پولیسو 37 اعتراض کوونکي نیولي دي.

دې وزارت زیاته کړې د اعتراض کوونکو د خورولو په عملیاتو کې د دوو پولیسو په شمول شپږ تنه ټپیان شوې دي.

وروسته له هغې چې د یکشنبې په ورځ تر شل زرو زیاتو کسانو په تیبلیسي کې لاریون وکړ، متحده ایالاتو او اروپايي ټولنې د ګورجستان له حکومت، سیاسي ګوندنو او مدنې ټولنې غوښتې چې خپلو کې د تر وخت مخکې ټاکنو په اړه ارامې او په درنښت خبرې وکړي.

هانګ کانګ کې پولیسو د حکومت ضد مظاهره کوونکي محاصره کړي

هانګ کانک کې اعتراضونه

د هانګ کانګ د پولیتخنیک پوهنتون انګړ اوس هم د پولیسو په محاصره کې دی .

پولیس د شپې مهال له سلګونو حکومت ضد مظاهره کوونکو سره لاس او ګریوان وو .

پولیس افسرانو نن سهار وویل، د لسګونو هغو اعتراض کوونکو پر ضد چې د تېښتي هڅه یې کوله، اوښکې بهوونکی ګاز، ربړي مرمۍ او لرګي کارولي دي.

معترضانو له څو ورځو راهیسي د دغه پوهنتون انګړ په خپل کنټرول کې نیولی دی .

یو شمیر اعتراض کوونکي نیول شوي هم دي.

پولیسو ویلي، اعتراض کوونکي کولی شي د پوهنتون له انګړه ووځي، خو له هغوی څخه یې غوښتي چې وسلې پر ځمکه کیږدي او ماسکونه لیري کړي.

هانګ کانګ له شپږو میاشتو راهیسي د حکومت ضد مظاهرو شاهد دی .

معترضان پر هغه څه غوصه دي چې دوی یې د پیکنګ لخوا د هانګ کانګ محدودیت بولي .

ګرجستان کې د پارلمان د پرېکړې پر خلاف لاریونونو دوام

ګرجستان کې مظاهرې

اعتراض کوونکو نن د ګرجستان په پلازمینه تبلیسي کې پارلمان ته ورتلونکې لاره وتړله. دوی وایې تر هغو به د پارلمان غړي دننه ورپرې نږدې چې د تر وخت مخکي انتخاباتو غږ ونه شي.

نن د نومبر په ۱۸مه په تبلیسي کې د روانو اعتراضونو څلورمه ورځ ده .اعتراضونه وروسته له هغه پیل شول چې پارلمان له مختلط څخه متناسب سیسټم ته د انتخاباتي نظام د اړولو په برخه کې د اساسي قانون تعدیل رد کړ.

د ګرجستان د کورنیو چارو وزارت په یوې اعلامیې کې ویلي چې دا مظاهرې د قوانینو تر محدودې اوښتې دي. په اعلامیې کې دا نه دي ویل شوي چې د پارلمان ودانۍ له مخې د دغو اعتراض کوونکو د لیري کیدو له پاره به اقدام وشي که څنګه.

غربي دیپلوماتانو اندېښنه ښودلې چې ښایې دا اعتراضونه په تاوتریخوالي واوړي.

د امریکا متحده ایالاتو او اروپایې ټولني د نومبر پر ۱۷مه د ګرجستان له حکومت ، سیاسي ګوندونو او مدني ټولنو غوښتي چې آرامې او د درناوي وړ مذاکرات پیل کړي.

په ګرجستان کې د اروپایې ټولني پلاوي او هم د امریکا متحده ایالاتو سفارت په یوې ګډې اعلامیې کې ویلي، په اساسي قانون کې د تعدیلاتو د تصویب په اړه د پارلمان د ناکامۍ له کبله د ګرجستان ټولنې د لویې برخې ژوره مایوسي مني.

معترضان ادعا کوي چې مختلط انتخاباتي نظام د ګرجستان د واکمن ګوند په ګټه دی.

پاپ فرانسېس بې‌وزلو ته مېلمستیا وکړه

د نړۍ د کاتولیکانو مشر پاپ فرانسېس

د نړۍ د کاتولیکانو مشر پاپ فرانسېس یو نیم زر تنو بې‌کورو او بې‌وزلو ته غرمنۍ ورکړه.

پاپ فرانسېس پرون غرمه (یکشنبه) په داسې حال کې په واتیکان کې بې‌وزلو ته مېلمستیا وکړه چې کاتولیکې کلیسا د بې‌وزلو نړیواله ورځ ولمانځله.

د نړۍ د کاتولیکانو مشر مخکې تر دې چې غرمنۍ ته بې‌وزله وروبولي، د واتیکان په سینټ پیټر میدان کې وویل، هغو کسانو ته دعا کوي چې د ښه ګډ ژوند د رامنځته کولو په هدف په خپلو نوښتونو تر ټولو بې‌وزلو خلکو ته هیلې ورکوي.

ده وروسته د واتیکان په یوه ستر سالون کې له خپلو مېلمنو سره د غرمې ډوډۍ وخوړه.

د فرانسې کورنیو چارو وزیر د شنبې ورځې مظاهره‌چیان بدمعاشان وبلل

د فرانسې د کورنیو چارو وزیر کریستوف کاستانیر

د فرانسې د کورنیو چارو وزیر کریستوف کاستانیر، هغه کسان سپک او بدمعاشان وبلل چې د ژېړ واسکټو په نوم د حکومت ضد غورځنګ د پیل د لومړۍ کالیزې په مناسبت‌یې د شنبې د ورځې په مظاهرو کې تاوتریخوالی وکړ.

ده وویل، څه چې د شنبې په ورځ ولیدل شول، کم شمېر یې حقیقي مظاهره‌چیان خو زیات‌یې د کوڅو خلک (لوچک) ول.

مظاهره‌چیانو موټرونو ته اور ورته کړ او د پولیسو خوا ته‌یې تیږې او بوتلونه وغورځول.

د فرانسې پولیسو د مظاهره‌چیانو د تیت پرک کولو لپاره له اوښکې بهوونکي ګاز او د اوبو له ټانکرونو څخه کار واخیست.

دا مظاهرې د ژېړ واسکټو د غورځنګ د پیل د لومړنۍ کالیزې په مناسبت وشوې.

د تېر کال په نومبر کې یو شمېر خلکو چې ژېړ واسکټونه‌یې اغوستي وو، په فرانسه کې د عادلانه اقتصادي اصلاحاتو لپاره اعتراضونه پیل کړل.

د فرانسې پولیسو د روانې اوونۍ د شنبې د ورځې د مظاهرو په لړ کې ۲۶۰ تنه ونیول.

په دې مظاهرو کې شااوخوا ۲۸ زره تنو برخه لرله.

لوکاشینکا د بلاروس د ولسمشرۍ بلې دورې ته ځان کاندیدوي

لوکاشینکا دا خبره په داسې وخت کې وکړه چې د دغه هېواد خلکو په پارلماني انتخاباتو کې ګډون وکړ.

د بلاروس ولسمشر الکساندر لوکاشینکا وايي، د ولسمشرۍ بلې دورې ته هم ځان کاندیدوي.

لوکاشینکا دا خبره په داسې وخت کې وکړه چې د دغه هېواد خلکو په پارلماني انتخاباتو کې ګډون وکړ.

لوکاشینکا پرون (یکشنبه) په مېنسک کې خبریالانو ته وویل، د ۲۰۲۰ کال انتخاباتو ته به ځان کاندید کړي، خو ده په عین حال کې وویل چې د ولسمشرۍ تر انتخاباتو وړاندې د اساسي قانون تعدیل به احمقانه وي.

ده زیاته کړه، که خلک‌یې ونه‌غواړي د ولسمشرۍ په څوکۍ پورې به ځان ونه‌نښلوي.

لوکاشینکا له ۱۹۹۴ م کال راهیسې د بلاروس مشر دی او که راتلونکی کال ځان بیا کاندید کړي، نو دا به‌یې پنځمه دوره وي.

د بلاروس د ۲۰۰۴ کال په ټول‌پوښتنه کې د ولسمشرۍ دورې نامحدودې شوې.

فرانسه کې د زیړ واسکټو په نوم معترضان لاریونونه کوي

د فرانسې پولیسو ویلي، اعتراض کوونکي د پاریس پر مشهور واټ شانزالیزه له لاریون منع شوي دي.

په فرانسه کې د زیړ واسکټو په نوم معترضان غواړي نن او سبا لاریونونه وکړي.

دا لاریونونه د هغه حکومت ضد غورځنګ د رامنځته کېدو د لومړۍ کالیزې په مناسبت ترسره کېږي چې یو کال مخکې په فرانسه کې راپورته شو.

د فرانسې پولیسو ویلي، اعتراض کوونکي د پاریس پر مشهور واټ شانزالیزه له لاریون منع شوي دي.

پولیسو همدارنګه ویلي چې د تاوتریخوالي او وارنکارۍ په صورت کې به مداخله وکړي.

یوې مخکښې اعتراض کوونکې پریشلا لوډوسکي ویلي د پلازمېنې پاریس په بېلابېلو برخو کې به دا لاریونونه ترسره شي.

په فرانسه کې د زیړ واسکټو اعتراضونه د 2018 میلادي کال په اکټوبر کې د تېلو د مالیې پر لوړېدو په پاریس کې پراخ لاریون پیل شو چې تقریباً 300 زره کسانو په کې ګډون کړی و.

دې اعتراضونو دوام وکړ خو وروسته یې ګډوانوال کم وو.

د ایران په اعتراضونو کې یو کس وژل شوی

د حکومت د دې اعلان پر ضد د ایران په بېلابېلو ښارونو کې خلکو مظاهرې پېل کړې دي.

د رپوټونو پر اساس، په ایران کې د دګاز د نرخ او تېلو د نرخ د لوړېدو پر ضد په اعتراضي مظاهرو کې یوتن وژل شوی دی.

د ایران د سیرجان ولایت والي، پرون د نوامبر په ۱۶مه، ویلي چې د یوه اعتراض کونکي د وژل کېدو شرایط لا نه دی څرګند شوی خو یو شمېر نور وګړي زخمیان شوي دي.

تردې وړاندې له ایرانه په رپوټونو کې وویل شول چې د سیرجان په ښار کې یو شمېر اعتراض کونکو د جمعې په ورځ هڅه کوله چې د تېلو یوې سترې زېرمې ته اور ور واچوي خو امنیتي ځواکونو یې د مخنیوي هڅه کوله.

د ایران له نورو سیمو مشهد، اهواز او شیراز څخه هم د خلکو د اعتراضونو او د مظاهره چیانو او پولیسو ترمنځ د اخ و ډب خبرونه خپاره شوي دي.

د ایران اقتصاد د امریکا د مالي بندیزونو له امله تر سخت فشار لاندی دی.

په داسې حالت کې بیا د ایران حکومت ویلي چې د تېلو او ګاز نرخ لوړوي.

د حکومت د دې اعلان پر ضد د ایران په بېلابېلو ښارونو کې خلکو مظاهرې پېل کړې دي.

مشکوکو اسلامپالو وسله والو کانګو کې ۱۵ ملکي وګړي وژلي

د کانګو پوځ د اکټوبر په ۳۰مه، د ملګرو ملتونو د سوله ساتي ځواک په همکارۍ د اسلامپالو وسله والو پر ضد پراخ عملیات وکړل.

مشکوکو اسلامپالو وسله والو د کانګو په ختيځ کې ۱۵ ملکي وګړي وژلي دي.

سیمه ییزو چارواکو پرون، د نوامبر په ۱۶مه، وویل چې پېښه د جمعې په ماښام شوې ده.

د کانګو پوځ د اکټوبر په ۳۰مه، د ملګرو ملتونو د سوله ساتي ځواک په همکارۍ د اسلامپالو وسله والو پر ضد پراخ عملیات وکړل.

د رپوټونو پر اساس، له ۲۰۱۴میلادي کال راهیسې د کانګو او یوګاندا ترمنځ په ځنلګي سیمو کې د متحدو ډیموکراتیکو ځواکونو په نوم وسله وال ملېشه فعالیت لري.

هغوی تېره اونۍ د پوځ د عملیاتو په ځواب کې پر ملکي وګړو حمله وکړه او ۴۰ تنه یې ووژل.

د کانګو حکومت د متحدو ډیموکراتیکو ځواکونو وسله وال په هغه هېواد کې د سلګونو ملکي وګړو په قتل تورونوي.

پاکستان کې چاودنې درې سرتیري وژلي

ارشیف

د پاکستان په جنوب لویدیځ کې یوې چاودنې درې سرتیري وژلي او پنځه نور یې ټپیان کړي دي.

د بلوچستان ایالت د کورنیو چارو وزارت یو ویاند ضیا لانګو نن خبریالانو ته وویل، چې د لرې ځایه کنټرولیدونکې دا بم د کوټې ښار په کوچلاغ کې چول شوی دی.

د نوموړې په وینا بم په یو موټرسایکل کې ځای پر ځای شوی و.

د دې پېښې مسولیت تر اوسه چا پر غاړه نه دی اخیستی.

د پاکستان بلوچستان ایالت کې پر سخت دریځو اسلامپالو ډلو سربېره بلوڅ بیلتونپالې هم د حکومت ضد فعالیتونه کوي.

د امریکا پخوانۍ سفیرې د ډونالډ ټرمپ ټويټونه وېروونکي بللي

په اوکراین کې د امریکا پخوانۍ سفیره ماري یوانویچ

په اوکراین کې د امریکا پخوانۍ سفیرې، ماري یوانویچ د ولسمشر ډونالډ ټرمپ ټويټونه وېرونکي بللي دي.

ماریا یوانویچ پرون (د نومبر ۱۵مه) د کانګرس د استازو مجلس په خلاصه غونډه کې د جمهوري غوښتونکو او دموکراتانو پوښتنو ته ځوابونه ورکړل.

د امریکا په کانګرس کې د ولسمشر د استیضاح د امکان په اړه د تحقیقاتو لړۍ تېره اونۍ پېل شوه.

په اوکراین کې د امریکا مخکنۍ سفیرې وویل: "زه نه شم ویلی چې ولسمشر څه کول غواړي خو فکر کوم چې هدف یې ویرول دی."

هغې دا خبره د ولسمشر ټرمپ د پروني ټویټ په اړه د یوې پوښتنې په ځواب کې وکړه.

ټرمپ پرون په یوه ټویټ کې ولیکل: "هرځای چې ماري یووانویچ ولاړه شي خرابي پېښېږي، هغې په سومالیا کې کار پېل کړ او وګورئ چې هلته څه پېښ شول؟"

ماري یانوویچ د امریکا یوه پخه دپلوماته ده .

ولسمشر ټرمپ هغه د روان میلادي کال په مې میاشت کې د اوکراین د سفارت له چوکۍ لرې کړه.

اوکراین د داعش ډلې مهم غړی نیولی 

براء شیشاني په خټه د ګرجستان دی

د اوکراین د امنیت ادارې ویلي چې د اسلامي دولت په نوم د وسله والې ډلې مهم غړی، براء شیشاني نیولی دی.

براء شیشاني په خټه د ګرجستان دی.

هغه د اوکراین پلازمېنې، کیف ته نږدې نیول شوی دی.

دا معلومات د اوکراین استخباراتو ادارې پرون پر فېسبوک خپاره کړي دي.

د اوکراین داستخباراتو ادارې په بیان کې ویل شوي چې د براء شیشاني د نیولو لپاره په عملیاتو کې د امریکا د استخباراتو فدرالي ادارې او د ګرجستان د کورنیو چارو وزارت ګډون درلود.

براء شیشاني د داعش د ډلې د بل مشر عمر الشیشاني چې د امریکا د دفاع وزارت د داعش د جنګ وزیر بلل، مرستیال و .

روسیې د ازادې اروپا/ازادي راډیو د روسي برخې انټرنټ پاڼې پر ضد اقدام وکړ

ارشیف

د روسیې عدلیې وزارت پرون، د (نوامبر ۱۵مه) د ازادې اروپا/ازادي راډیو د روسیې دبرخې انټرنټي پاڼه د بهرنیو اېجنټانو په لست کې واچوله.

د ازادې اروپا/ازادي راډیو د روسي برخې وېب پاڼه د روان میلادي کال د سپټمبر په میاشت کې فعاله شوه.

د روسیې د عدلیې وزارت پرون په یوه بیان کې ویلي چې دا پرېکړه یې د پارلمان د کورنیو چارو د کمېټې د سلا پر اساس کړې ده.

د روسیې پارلمان په ۲۰۱۷ میلادي کې نوی قانون جوړ کړ چې له مخې یې حکومت کولای شي چې بهرنۍ رسنۍ د خارجي اېجنټانو په لست کې شامل کړي او په دې ډول یې په روسیه کې د کار مخنیوی وکړي.

جرمني لسګونه اذربایجاني وګړي بیرته خپل هېواد ته استولي

د ازربایجان د کډوالو دولتي ادارې د جمعې په ورځ وویل، ۶۱ اذري وګړي له جرمني څخه په یوې چارټر شوې الوتکې کې بیرته باکو ته ستانه کړی شوي دي.

تر دې مخکې په جرمني کې د غیرې قانوني کډوالو د موندلو لپاره د پولیسو د چاپو راپورونه ورکړل شوي وو.

ددې ادارې په وینا دا ستنېدنه د اذربایجان او اروپايي ټولنې ترمنځ د بې اسنادو افرادو د بېرته منلو په اړه له شته هوکړې سره سمه ترسره شوې ده.

د اذربایجان د کډوالو دولتي اداره وايي، په ستنو شویو کسانو کې ۲۲ نارینه، ۱۸ ښځې او ۲۱ ماشومان دي.

د جرمني شپیګل مجلې د نومبر په ۱۳مه نېټه راپور ورکړ چې د جرمني پولیسو په یو لړ چاپو کې ګن اذربایجاني وګړي موندلې چې ویل کیږي په قاچاقي توګه جرمني ته وروړل شوي.

د پاکستان په سند ایالت کې د تندر پرېوتو ۲۷ کسان وژلي

ارشیف

د پاکستان په جنوبي صحرايي سیمه کې تېره شپه د سختو بارانونو وریدو او د تندورونو پرېوتو لږ تر لږه ۲۷ کسان وژلي دي.

د سند د ایالتي حکومت ویاند سید غني ویلي، چارواکو په سیمه کې بیړنی حالت اعلان کړی او د سند ایالت تهر دښتې ته یې ژغورونکې ډلې استولي دي.

د سید غني په وینا په روغتونونو کې د ښځو او ماشومانو په شمول د هغو لسګونو کسانو درملنه شوې چې د تندرونو او په ځینو ځایونو کې د ودانیو د پرېوتو له کبله ټپیان شوې وو.

د ایدهي په نوم د یوه خیریه بنسټ ویاند انور کاظمي ویلي، په داسې حال کې چې ژغورنکي لرې پرتو کلیو ته رسیدلي، د وژل شویو د شمېر د زیاتېدو اندېښنه شته.

پاکستانۍ ډان ورځپاڼې راپور ورکړی چې د تندرونو د پرېوتو او ورپسې په اغېزمنه شوې سیمه کې اورلګېدونو سلګونه څاروي هم وژلي دي.

ګرجستان کې خلکو د پارلمان د پرېکړې پرضد اعتراض وکړ

معترضانو په تېر دوبي کې د انتخاباتو په قانون کې د اصلاحاتو غوښتنه کړې وه.

زرګونو کسانو پرون د ګرجستان په پلازمېنه تبلیسي کې د پارلمان د هغې پرېکړې پر وړاندې اعتراض وکړ چې د انتخاباتو په قانون کې یې د اصلاحاتو وړاندیز رد کړ.

د انتخاباتو په قانون کې د اصلاحاتو غوښتنه معترضانو په دوبي کې کړې وه، خو وکیلانو پرون د نومبر په ۱۴مه په اساسي قانون کې د متناسب انتخاباتي سیسټم طرحې ته د اړتیا وړ ۱۱۳ رایې ورنه کړې او په دې توګه یې رد کړه.

د اپوزیسیون پلویان او فعالان وروسته په تبلیسي کې د پارلمان مخې ته راټول شول، د ښار عمومي لاره یې بنده کړه او د حکومت د استعفی او د نویو پارلماني انتخاباتو غوښتنه یې وکړه.

پولیسو قهرجن مظاهره چیان هغه مهال په ربړي ګولیو وویشتل او اوبه یې پرې وشیندلې چې هغوی پارلمان ته د ننوتو هڅه وکړه او په دې ترڅ کې له ۲۴۰ زیات کسان ټپیان شول.

کلیفورنیا کې د ښوونځي دوه زده کوونکي په ډزو ووژل شول

په دې ډزو مشکوک زده کوونکی چې ټپی دی، نیول شوی او ډاکټران وايي چې حالت یې نازک دی.

یوه شپاړس کلن هلک پرون د امریکا متحده ایالتونو په کلیفورنیا کې په یوه لېسه کې دوه زده کوونکي په ډزو ووژل او درې نور یې ټپیان کړل.

چارواکي وايي، دا پېښه پرون په سانتا کلاریتا ښارګوټي کې د درسي ساعت له پیلېدو څو دقیقې مخکې رامنځته شوه.

په دې ډزو مشکوک زده کوونکی چې ټپی دی، نیول شوی او ډاکټران وايي چې حالت یې نازک دی.

د پولیسو یوه چارواکي ویلي، یوه ۱۶ کلنه نجلۍ او یو ۱۴ کلن هلک چې په دې ډزو کې ټپي شوي وو، وروسته په روغتون کې ساه ورکړه. دوه نجونې چې یوه یې ۱۵ کلنه او بله ۱۴ کلنه ده او یو ۱۶ کلن هلک په ډزو کې ټپیان شوي دي.

ولادیمیر پوتین: ډونالد ټرمپ سره د لیدو پلان نه لرم

روسیې د امریکا ولسمشر ډونالد ټرمپ ته بلنه ورکړې چې راتلونکی مې په نهمه پر فاشیزم د بریا کلیزې په مناسبت مسکو کې په جوړېدونکو مراسمو کې ګډون وکړي.

د روسیې ولسمشر ولادیمیر پوتین وايي، له خپل امریکایي سیال ډونالد ټرمپ سره د لیدو هېڅ کوم پلان نه لري، خو هیله مند دی چې د امریکا ولسمشر پر فاشیزم د بري کلیزې په مناسبت راتلونکی کال مسکو ته سفر وکړي.

پوتین په یوه خبري غونډه کې د فاشیزم پرضد د امریکا ونډه د پام وړ وبلله او ویې ویل، د مې نهمې بریا د نمانځنې په مناسبت غونډه کې د ټرمپ ګډون مناسب کار دی.

ښاغلي پوتین زیاته کړه: "فکر کوم د هغه هېواد د مشر راتګ به ډېر پرځای او مناسب کار وي چې د نازیزم پرضد جګړه کې یې د پام وړ برخه اخیستې. که څه هم دا زموږ کار نه دی، که د امریکا ولسمشر دلته راشي، موږ به حتما په مسکو کې سره وګورو او خبرې به وکړو."

پوتین په داسې حال کې ټرمپ ته د مسکو د سفر بلنه ورکوي چې له روسیې سره د امریکا او د هغه د متحدانو اړیکې د اوکراین او سوریې د کړکېچونو او یو لړ نورو مسایلو له کبله ترینګلې دي.

ولسمشر ټرمپ تېره اونۍ وویل چې پر فاشیزم د بریا د کلیزې په مراسمو کې د ګډون لپاره د پوتین د بلنې په اړه غور کوي، خو ده زیاته کړه چې دا مناسبت له یو مهم سیاسي فصل سره هم مهاله دی او ځکه ډاډه نه دی چې ګډون به په کې وکړي.

روسیې د سوریې هغه ښار کې د هلیکوپټرو بېس جوړ کړی چې امریکایان ترې ووتل

آرشیف

روسیې نن د نومبر په ۱۴مه اعلان وکړ چې د سوریې په شمال ختیځ کې یې په هغه ښار کې د هلیکوپټرو بیس جوړ کړی چې تېره میاشت امریکایې سرتېري ترې ووتل. دا ښار قمیشلي نومیږي.

زویزدا ټلویزیوني چینل چې د روسیې د دفاع وزارت اړوند دی، د پوځي هلیکوپټرو انځورونه خپاره کړي چې دغه مرکز ته رسیدلي دي.

دا مرکز د پانڅیر په نوم له ځمکې څخه هوا ته په ویشتونکو توغندویي سیستمونو باندې ساتل کیږي.

په رسېدلو هلیکوپټرو کې دوه ام‌ای-۳۵ ډوله جنګي او یوه ام‌ای-۸ ډوله پوځي ترانسپورتي هلیکوپټره ده.

د دغه ټلویزیون یوه نطاق دا یوه تاریخي شېبه وبلله او ویې ویل: "سر له همدې ورځې به زموږ د هوایې چلند ډلې په دایمي توګه د قمیشلي ښار په هوایې ډګر کې عملیات کوي."

روسیې تر دې وړاندې د سوریې او ترکیې ترمنځ پولو ته نزدې سیمو کې په پوځي هلیکوپټرو ګزمې پیل کړې، ترڅو په سیمه کې روسي پولیس خوندي کړي.

نور راوښيه

XS
SM
MD
LG