پر عربستان د حوثیانو د حملو زیاتېدل؛ د ارامکو شرکت مرکزي دفتر تخلیه شو

د سعودي عربستان د تېلو شرکت (ارامکو)

د یمن د حوثیانو له‌خوا په سعودي عربستان د بریدونو له زیاتېدو سره هم‌مهاله د دغه هېواد د تېلو شرکت (ارامکو)، خپل مرکزي دفتر ته د تخلیې امر کړی دی.

دغه اقدام د دمام پر هوايي ډګر له مرګوني برید وروسته په داسې حال کې شوی چې د سعودي عربستان پر تېلو او پوځي تأسیساتو د نویو بریدونو راپورونه خپاره شوي دي.

روېټرز خبري اژانس د پنجشنبې په ورځ «د تلې په ۳۰مه» د شپږو باخبره سرچینو په حواله راپور ورکړ چې د سعودي عربستان په ختیځ ظهران ښار کې د ارامکو مرکزي دفتر کارکوونکو ته ویل شوي چې ودانۍ تخلیه کړي او خپلو فعالیتونو ته له کور یا نورو ځایونو څخه دوام ورکړي.

د دې پرېکړې د اصلي لامل په اړه تر اوسه کره معلومات نه‌شته او ارامکو شرکت هم د روېټرز اژانس پوښتنو ته ځواب نه‌دی ویلی.

د ارامکو اړوند تأسیسات چې د روانې میاشتې په لومړیو کې د حوثیانو له لوري هدف وګرځېدل.

د کب په نهمه د ایران د جګړې له پيل راهیسې دا لومړی ځل دی چې د ارامکو د مرکزي دفتر د تخلیې امر صادرېږي.

د ایران له ملاتړه برخه‌منو حوثیانو د روانې اکټوبر میاشتې په لومړیو کې هم د ارامکو پر مرکزي دفتر برید کړی و.

دغه برید د ودانۍ په څو پوړونو کې د اورلګېدنې او پراخو زیانونو لامل شوی و.

د پنجشنبې په ورځ د ارامکو د مرکزي دفتر د تخلیې د خبر له خپرېدو سره هم‌مهاله، د سعودي عربستان د اسهامو د بازار عمومي شاخص ۲.۵ سلنه راټیټ شو.

په ورته وخت کې، د جګړو له زیاتېدو سره په نړیوالو بازارونو کې د تېلو بیې د پنجشنبې په ورځ د مې میاشتې راهیسې تر ټولو لوړې کچې ته ورسېدې.

ارشیف، د ایران تر ملاتړ لاندې حوثي یاغیان

د برنټ خام تېلو د هر بېرل بیه ۲.۸۱ سلنه لوړه شوه او ۱۱۱ ډالرو او ۸۸ سېنټو ته ورسېده.

د معاملاتو په بهیر کې یې بیه ان ۱۱۲ ډالرو او ۵۵ سېنټو ته هم لوړه شوه.

له بلې خوا، د حوثیانو پوځي ویاند یحیی سریع ادعا وکړه چې د سعودي عربستان له لوري پر یمن د جولای له نیمایي راهیسې په بریدونو کې ۵۶۲ کسان وژل شوي یا ټپیان شوي دي.

خپلواکو سرچینو دغه شمېرې نه‌دي تأیید کړي.