په ایران کې دننه د اسراییل د حملو راپورونو په سیمه کې د کړکېچ د پراخېدو وېره زیاته کړې ده.
نن سهار وختي د ایران په مرکزي ښار اصفهان کې د څو چاودنو غږونه واورېدل شول چې په خلکو کې یې وارخطايي جوړه کړه.
دا چاودنې داسې وخت شوي چې نن د ایران د رهبر ایت الله علي خامنه اي پنځه اتیایمه کلیزه ده.
د امریکا د متحدو ایالتونو څو رسنیو د هغه هېواد د حکومتي سرچینو په حواله راپور کړی چې ویلي یې دي، اسراییل د توغندیو او بې پیلوټه الوتکو په مرسته په ایران کې دننه ځینې اهداف ویشتلي دي.
په دې اړه نور: غچ اخيستنه؛ اسراییل په ایران هوايي برید کړیپه هغه ویډیو کې چې په ټولنیزو شبکو کې لاس په لاس کېږي او په نړۍ کې خبري سرچینو خپره کړې، اصفهان ته نږدې د چاودنو صحنې ښکاري.
د ایران چارواکو هڅه کړې چې د دغو چاودنو راپورونه کم اهمیته وښيي او په هغې کې یې د اسراییل دخالت په مستقیم ډول تایید کړی نه دی.
د ایران دولتي رسنیو په تهران کې د ایراني چارواکو په وینا راپور ورکړی چې ویلي یې دي، دغه چاودنې د هوايي مدافع د دستګاوو له خوا د درېیو بې پېلوټه الوتکو د نسکورېدو له کبله وې.
د ایران د پوځ عمومي قوماندان عبدالرحیم موسوي بیا ویلي، د نن سهار د چاودنې علت پر یوه مشکوک شي د هوايي مدافع د دستګاه ډزې وې او په پېښه کې کوم زیان نه دی اوښتی.
د روانې وري یا حمل میاشتې پر ۱۳مه په دمشق کې د ایران پر کونسلګرۍ له برید سره جوخت چې د قدس ځواک د قوماندان محمدرضا زاهدي په شمول د سپاه پاسداران ۷ جګپوړي افسران په کې ووژل شول، د ایران له خوا پر اسراییل د غچ اخیستونکي برید احتمال ورکول کېده.
داسې ښکاري چې پر ایران د اسراییل دا احتمالي حملې د تهران د هغو بېسارو حملو نسبي ځواب وي چې تېره شنبه یې پر اسرائیل کړې وې.
د واشنګټن په موسسه کې د دفاعي او امنیتي چارو شنونکي فرزین ندیمي د ازادي راډیو ایرانۍ څانګې راډیو فردا ته وویل، د ایران په اصفهان کې چې د چاودنو راپورونه ترې ورکړل شوي، د ایران مهم تاسیسات پراته دي.
هغه وايي: "هغسې چې ما وویل اصفهان کې د ایران اټومي تاسیسات هم پراته دي، د هوايي مدافع دستګاوو ساحې په کې دي، هلته د شکاري په نوم یوه پوځي اډه هم ده چې د هوايي مدافع دستګاوو تر څنګ د ایران د مرکز د خوندیتوب مسوولیت لري."
د ایران په اصفهان کې د ایران ګڼ اټومي تاسیسات پراته دي چې تر ټولو مهم یې د نطنز بټۍ او د یورانیمو د بډاینې مرکز دی.
د ایران د نطنز بټۍ یوه څنډه
اصفهان کې دغو چاودنو د ګڼو هېوادونو او سازمانونو عکس العملونه پارولي دي.
د چین د بهرنیو چارو وزارت نن سهار په یوه اعلامیه کې وویل، له هر هغه چلند سره چې په منځني ختیځ کې د کړکېچ د زیاتېدو سبب کېږي، مخالفت کوي.
د بریتانیا صدراعظم ریشي سوناک په لندن کې د یوې وینا پر مهال ټینګار وکړ چې په منځني ختیځ کې د کراري غوښتونکی دی.
هغه ویلي، په سیمه کې د پام وړ کړکېچ د هېچا په ګټه نه دی.
په همدې حال کې مصر هم، د اسراییل او ایران ترمنځ د کړکېچ د دوام په اړه پر خپرو شویو راپورونو اندېښنه ښوولې او قاهرې په یوه اعلامیه کې د کړکېچ د عواقبو په باب خبرداری ورکړی دی.