په ایران کې دیني عالمه او مدني فعاله صدیقه وسمقي د ضمانت په بدل کې له زندانه خوشې شوه.

دا وروسته له هغه خوشې شوه چې د روانې میاشتې په لومړیو کې یې د روغتیايي وضعیت په اړه یې اندېښنې زیاتې شوې او د تهران له خطرناک ایوین زندان څخه روغتون ته انتقال شوه.

د مېرمن وسمقي د خوشې کېدو خبر پرون د اپرېل په ۲۹مه د امتداد په نوم د ټلګرام چینل ورکړ.

په خبر کې راغلي چې د نوموړې روغتیايي وضعیت په زندان کې په خرابېدو وو.

د آزادۍ راډیو د ایران څانګې راډیو فردا د وسمقي د خوشې کېدو خبر تایید کړی دی.

مېرمن وسمقي چې لیکواله هم ده، د تېر ۱۴۰۲ کال په کب میاشت کې په خپل کور کې ونیول شوه او وروسته بیا ایوین زندان ته ولېږل شوه.

صدیقه وسمقي د ایران د رژیم له منتقدانو وه.

هغې همداراز د ایران پر لوی مذهبي مشر آیت‌الله علي خامنه‌یي هم انتقادونه کول او نوموړی یې یو دکتاتور باله.

د اوکراین په ساحلي ښار اودیسې کې د هري پاټر د کلا په نوم پر یوه ودانۍ د روسيې توغندويي برید لږترلږه پنځه کسان وژلي او ګڼ نور یې ټپیان کړي دي.

ویل کېږي په ټپیانو کې د سیرهي کیوالوف په نوم د یوه روس پلوه ګوند پخوانی وکیل چې په یاده یوه ودانۍ کې یې د حقوقو یو پوهنځي جوړ کړی و، هم شامل دی.

د اودیسې والي اولیه کیپر بیګا پر خپله ټلګرام پاڼه خبر ورکړی و چې په دې برید کې درې مېرمنې او یو نارینه وژل شوي، خو وروسته یې وویل چې د دې حملې له کبله یو بل سړی هم د مغزي سکتې په نتیجه کې مړ شوی دی.

کیپر زیاته کړه چې د ۳۲ تنه ټپيانو له ډلې ۲۵ تنه په روغتون کې دي چې په ډله کې یې دوه ماشومان هم شامل دي.

له دې برید وروسته په خپرو شویو ویډیويي تصاویرو کې د تور سمندرګي پر غاړه پرته د اروپا د ګوتیکې معمارۍ په سبک جوړه دا ودانۍ په داسې حال کې چې د اور په لمبو کې سوځي، لیدل کېده.

د امریکا د عدلیې وزارت وايي د سایبر یو متخصص چې د لنډې مودې لپاره یې د متحدو ایالتونو د ملي امنیت په اداره کې کار کړی و، روسیې ته د جاسوسۍ د هڅې په تور پرون په څه باندې ۲۱ کاله بند محکوم شو.

د عدلیې وزارت په یوه بیان کې ویلي دي چې تورن جارح سیباستیان دالکې نومېږي، ۳۲ کلن دی او د ۲۰۲۲ کال تر جون میاشتې پورې یې د څه کم څلورو اوونیو لپاره د امریکا د ملي امنیت په اداره NSA کې کار وکړ، خو بیا یې ناڅاپه کار پرېښود.

محکمې ته د وړاندې شویو اسنادو له مخې دالکې هلته د کار پرمهال د امریکا د ملي امنیت اړوند محرم اسناد پرینټ کړي وو او وروسته یې یوه کس ته چې ده ته یې ځان د روسیې اجنټ معرفي کړی و، خو اصلا د امریکا د تحقیقاتو د فدرال ادارې یا FBI پټ مامور و، د ۸۵ زره ډالرو په بدل کې د دې اسنادو پلورل منلي وو.

فلسطینۍ حماس ډله وايي، د لسګونه برمته وو د خوشې کېدو په بدل کې په غزه کې د ۴۰ ورځني اوربند لپاره د اسراییل د طرحې په اړه غور کوي.

دې ډلې چې امریکا او اروپايي ټولنه یې د تروریستي ډلې په توګه پېژني، دا کسان د تېرکال د اکتوبر پر اوومه پر اسراییلو د برید پرمهال برمته کړي وو.

د حماس یوې سرچینې په قاهره کې له خبرو وروسته قطر ته د ستنېدو پرمهال د خپل نوم د نه ښودلو په شرط فرانسپرس خبري آژانس ته ویلي چې د اسراییلو د وړاندیز په اړه به په خپلو کې بحثونه وکړي او سمدستي به یې ځواب ورکړي.

د امریکا د بهرنیوچارو وزیر انتوني بلېنکین ویلي دي چې د اسراییلو په طرح کې د اوربند شرایط خورا زیات سخاوتمندانه دي.

دا په داسې حال کې ده چې بېګا د غزې په رفح ښار کې د اسراییلو په حملو کې د فلسطیني چارواکو په وینا شاوخوا ۴۰ تنه فلسطینیان ووژل شول.

د غزې د ۲،۳ میلیونه وګړو نژدې نیمایي د جګړو له وېرې په رفح ښار کې پناه اخیستې ده.

د اسراییلي پوځیانو هوایي بریدونو پرون داسې مهال لسګونه فلسطینیان ووژل چې د امریکا او حماس استازي په قاهره کې د اوربند د خبرو نوي پړاو ته کیناستل.

حماس چې په غزه کې له اسراییلو سره په جګړه بوخت دي، د امریکا او اروپایي ټولنې له خوا د ترهګرو په توګه پېژندل کیږي.

رویټرز خبري اژانس لیکلي چې په پرونیو بریدونو کې ډېر فلسطینیان د غزې په جنوبي ښار رفح کې وژل شوي، چېرته چې د غزې د ۲اعشاریه درې میلیونه وګړو نژدې نیمایي برخې له جګړې پنا وړې ده.

پر رفح ښار له هوایي بریدونو څو ساعته وروسته د مصر دولتي تلویزیون وویل چې د حماس پلاوی بیرته دوحې ته روان شوی او د اوربند د غوښتنې په تړاو به له لیکلي ځواب سره بیرته قاهرې ته ستون شي.

دا په داسې حال کې ده چې د امریکا د بهرنیو چارو وزیر انتوني بلینکن چې د منځني ختیځ په سفر بوخت دی له حماسه غوښتي چې د اوربند غوښتنه ومني.

د اروپايي ټولنې د بهرني سیاست مسوول اعلان وکړ چې تمه ده څو اروپايي هېوادونه تر یوې بلې میاشتې پورې یو فلسطینی دولت په رسمیت وپېژني.

جوزپ بوریل دغه خبر پرون د سعودي عربستان په پلازمېنه ریاض کې د نړیوال اقتصادي فورم د ځانګړې غونډې په څنډه کې اعلان کړه.

امریکا متحده ایالتونو بیا شاوخوا لس ورځې مخکې په ملګرو ملتونو کې د فلسطین د بشپړ غړیتوب غوښتنه ویټو کړ.

د امنیت شورا ۱۲ غړو هېوادونو په ملګرو ملتونو کې د فلسطین د بشپړ غړیتوب ملاتړ کړی و، چې په دوی کې د امنیت شورا د دریو دایمي غړو فرانسه، چین او روسیې سربېره د امریکا دوه اسیايي متحدان جاپان او جنوبي کوریا شامل دي.

تېره میاشت هسپانیې، ایرلنډ، مالتا او سلوانیا اعلان وکړ چې د فلسطیني دولت په رسمیت پېژندلو لپاره به په ګډه کار کوي.

د امریکا د بهرنیو چارو وزیر انتوني بلېکین له حماس څخه وغوښتل چې په غزه کې د اوربند لپاره د اسراییل وړاندیز سمدستي ومني او اسراییلي یرغمل ازاد کړي.

ټاکل شوې وه چې د حماس چې امریکا او اروپایي ټولنه یې یوه ترهګره ډله بولي، مرکچیان نن دوشنبې د مصر په پلازمېنه قاهره کې له قطري او مصري مینځګړیو سره وګوري ترڅو د اسراییل د هغه اوربند وړاندیز ته چې د تېرې اوونۍ په پای کې یې وړاندې کړی او په څو مرحلو کې تطبیق کیږي، خپل ځواب ووایي.

بلیکین چې په ریاض کې یې خبرې کولې وویل، حماس اوس یوداسې وړاندیز لري چې د ده په خبره د اسراییل له لوري ډېر سخاوتمندانه دی.

د تاجکستان د بهرنیو چارو وزارت وایي چې د دوی نژدې زر اتباع د پاسپورت او ګمرکي کنټرول د شدت له کبله د مسکو په هوایي ډګر کې درول شوي دي.

دغه وزارت پرون یکشنبه ویلي، سلګونه تاجک اتباعو ته روسیې ته د ننوتلو پر مهال خبر ورکړل شوی چې هلته یې پر تګ بندیز دی، نو ځکه د یوې حل لارې تر موندلو هوایي ډګر کې ایسار دي.

د تاجکستان د بهرنیو چارو وزارت د تېرې شنبې په ورځ له خپلو اتباعو غوښتي و چې روسیې ته سفر ونه کړي.

پر تاجکانو په روسیه کې وروسته تر هغه کړۍ تنګه شوې چې تېره میاشت مسکو ته نژدې د یوه کنسرت پر سالون برید کې ۱۴۴ تنه ووژل شول.

هغه برید کې د لاس لرلو په تور یوولس تاجکستاني اتباع نیول شوي دي.

د پاکستان په خیبر پښتونخوا ایالت کې یو لوړپوړی قاضی له برمته کېدو وروسته بیرته ازاد شوی دی.

قاضي شاکر الله مروت د شنبې په ورځ د ډېره اسماعیل خان په ټانک سیمه کې وتښتول شو او یوه ویډیو یې هم خپره شوه چې نوموړی په کې د ځان د خلاصون غوښتنه کوي.

د پښتونخوا د اعلی وزیر د رسنیو سلاکار محمد علي سیف نن مشال راډیو ته ویلي چې دغه قاضي پرون ماښام بیرته کور ته ستون شوی دی.

هغه د پېښې د څرنګوالي نور جزیات نه دي ورکړي.

تراوسه کومې ډلې هم د دغې برمته نیونې مسولیت نه دی منلی.

په زرګونو کسان یو وار بیا د ګرجستان په پلازمېنه تبلیسي کې په اعتراض لارو سړکونو ته راووتل.

دوی د واکمن ګوند له خوا د نوي قانون د معرفي کولو د پلانونو خلاف لاریون وکړ.

محلي منتقدین او لوېدیځ هېوادونه وايي دغه قانون به د جنوبي قفقاز په دغه هېواد کې د خپلواکو اوازونو د ځپلو لپاره وکارول شي.

پرونی اعتراض د دوو اوونیو د لاریونونو په دوام وشو، چې د اپوزیسیون د ګوندونو او د فعالانو د هغو ډلو له خوا یې رهبري کېږي چې د پارلمان له خوا د «بهرنیو اجنټانو» د لایحې د تصویب خلاف دي.

منتقدین وايي دا هغه قانون ته ورته دی چې په روسیه کې د منتقدانو د غلي کولو لپاره کارول شوی دی.

شا و خوا ۱۰زره کسان پرون د تبلیسي په مرکزي میدان کې راټول شوي وو، ګڼو برخوالو د اروپايي ټولنې بیرغونه له ځانونو سره لېږدول.

راپورونه وايي ځینې معترضان د پارلمان ودانۍ ته نږدې له امنیتي کرښو تېر شول چې په ځواب کې یې پولیسو د دوی د تیت و پرک کولو لپاره اوښکې بهوونکی ګاز او د مرچو سپرې وکاروله.