ایران د وروستیو لاریونونو پر یوه ګډونوال د لومړي ځل لپاره د اعدام سزا تطبیق کړه.
د ایران د قضایي ادارې اړوند د میزان خبري اژانس وویل چې محسن شکاري نن پنجشنبې وروسته له هغې په دار وځړول شو چې د ایران سترې محکمې یې د استېناف غوښتنه رد کړه.
نوموړی د هغو لاریونونو په ترڅ کې چې د امنیتي ځواکونو په توقیف کې د ۲۲ کلنې مهسا امیني د مړینې پرسر راپورته شوي، نیول شوی او په اعدام محکوم شوی و.
پر شکاري تور پورې شوی وچې په قصدي توګه یې د وژلو، د ترهې د خپرولو او د خلکو د امنیت او ازادۍ د سلبولو او د سړک د بندولو لپاره له وسلې کار اخیستی او هم یې د امنیتي ځواکونو یو افسر ټپي کړی دی.
د بخښنې نړیوال سازمان یا امنیستي انټرنېشنل وایي، په ایران کې د روانو لاریونونو په تړاو د درې ماشومانو په ګډون لږترلږه ۲۸ کسان د اعدام له سزا سره مخامخ دي.
د بشري حقونو مدافعې ډلې د ایران د امنیتي ځواکونو له خوا د دغو لاریونونو په تړاو د په زرګونو کسانو د نیول کېدو خبر ورکوي.