له ښوونځیو څخه یو شمېر فارغ شوي زده کونکي چې ټاکل شوې سږ کال د کانکور په ازموینه کې ګډون وکړي وایي، د خپل ځان د امنیت په اړه اندېښمن دي.
د ښوونځیو یو شمېر هغه فارغان چې غواړي سږ کال په کانکور ازموینو کې ګډون وکړي وايي، له ډار او اندېښنو سره به ازموینې ته ځي.
د طالبانو حکومت د لوړو زده کړو وزارت په وینا، د سږ کال کانکور ازموینه به د میزان میاشتې په ۱۳، ۱۴ او ۱۵ په ټول افغانستان کې پیل شي.
د ښونځیو دا فارغان وایي، چې د خپل ځان د امنیت په اړه اندېښمن دي.
فرهاد چې سږنۍ کانکور ازموینې ته یې نوم لیکنه کړې وایي، د امنیتي ستونزو له امله د کانکور په ازموینه کې له ګډونه اندېښمن دي.
هغه وویل: "زه او اکثریت هغه کسان چې ټاکل شوې د کانکور په ازموینه کې ګډون وکړو، کله چې ګورو چې امنیتي وضعیت واقعاً خراب دی، نو په ازموینه کې د ګډون په اړه یو ډول وېره او وحشت لرو. په هغو امنیتي ځواکونو چې ټاکل شوې د دې ازموینې امنیت ونیسي، هېڅ ډول اعتبار او باور نه لرو."
د دولسم ټولګي یوه بله فارغه چې دې هم سږنۍ کانکور ازموینې ته نوم لیکنه کړې، خو د امنیتي ستونزو له امله نه غواړي نوم یې راپور کې واخیستل شي وايي، طالبان د نجونو د زده کړو مخالف دي او باور نه لري، چې د کانکور ازموینې امنیت ټینګ کړي.
هغه زیاتوي: "موږ فکر نه کوو چې طالبان دې دا کار وکړي چې د کانکور ازموینې پر مهال زموږ امنیت خوندي کړي، ځکه د طالبانو حکومت دا ثابته کړې چې د نجونو د تعلیم او تحصیل مخالف دي."
که څه هم طالبانو په وار وار دا خبره رد کړې او ویلي چې د اسلامي شریعت پر بنسټ د ښځو او نجونو حقونو ته ژمن دي، خو پر افغانستان یې بیاځلي تر واکمنېدو وروسته چې له کال زیاته موده پرې اوړي له شپږم ټولګی پورته نجونو ته ښوونځي ته د تګ اجازه نه ده ورکړې.
په پوهنتونونو کې یې هم پر نجونو ځینې محدودیتونه لګولي، چې د بېلګې په ډول د هلکانو او نجونو د ټولګیو بېلولو او د نجونو د جامو ډول او رنګ یادونه کولای شو.
خو د طالبانو حکومت د کورنیو چارو وزارت ویاند عبدالنافع ټګور د کانکور ازموینې د امنیت ډاډ ورکوي.
نوموړي ازادي راډیو ته وویل: "موږ د ټولو وطنوالو د امنیت خوندي کولو ته ژمن یو او زموږ امنیتي ځواکونو د وطنوالو امنیت ته متوجه دي. دوی دې ډاډه وي، چې په دې برخه کې به هیڅ ستونزه نه وی."
د امنیت په اړه د کانکور ازموینې د ګډونوالو اندېښنې داسې مهال ډېرې شوي چې تېره اونۍ د کابل په لوېدیځ کې د کاج پر ښوونیز مرکز داسی مهال ځانمرګی برید وشو چې لسګونه زده کونکي، چې ډېری یې نجونې وې د کانکور په یوه ازمایښتي ازموینه کې ګډون کړی و.
په افغانستان کې د ملګرو ملتونو د سیاسي استازولۍ (یوناما) د راپور له مخې، د دې برید د وژل شویو شمیر ۵۳ او د ټپیان هم ۱۱۰ کسانو ته رسېدلی دی.
په دې اړه نور: يوناما: پر کاج ښوونيز مرکز د بريد له امله ۵۳ کسان وژل شوي او ۱۱۰ ژوبل ديتر اوسه کوم کس او یا ډلې د دې برید مسوولیت نه دی منلی او د طالبانو حکومت هم د برید په اړه د خپلو څیړنو له پرمختګه رسنیو او خلکو ته څه نه دي ویلي.