د ملګرو ملتونو د عمومي اسامبلۍ د لوړې کچې بحثونه راروانه سې شنبه پیلېږي.
سږ کال د کرونا وبا له کبله د نړۍ ګڼ مشران یا په انلاین بڼه په دې غونډه کې برخه اخلي، یا یې هم غونډې ته خپل ثبتي وېډیويي پیغامونه لېږلي دي.
دا د ملګرو ملتونو په تاریخ کې اول وار دی چې عمومي غونډه تر ډېره په مجازي بڼه کېږي.
د ملګرو ملتونو په عمومي غونډه کې د بحث وړ موضوعات په نړۍ کې د کرونا ویروس وبا، نژادپالنه، نابرابري، اقلیمي بدلون، بېوزلي، لوږه، وسلهوالې شخړې او نور مسایل دي.
ملګري ملتونه وايي د دغو چلنجونو په وړاندې مبارزه نړیوال اقدام ته اړتیا لري او د دغه سازمان ۷۵مه غونډه یو مهم چانس دی چې هېوادونه پر دغو ټولو ستونزو په ګډه غلبه حاصله او د راتلونکي لپاره یو چوکاټ وټاکي.
د ملګرو ملتونو عمومي غونډه تېره سې شنبه د سپټمبر پر ۱۵مه پیل شوې، خو د لوړې کچې عمومي بحثونه به راروانه سې شنبه یعنې د سپټمبر پر ۲۲مه پیلېږي.
انتونیو ګوترش
په اجنډا کې د وینا لپاره افغانستان ته د راروانې چهارشنبې ورځې ته وخت ورکړل شوی دی.
د ملګرو ملتونو سرمنشي انتونیو ګوترش په مې میاشت کې د نړۍ له رهبرانو غوښتنه کړې وه چې په عمومي غونډه کې د ګډون په نیت نیویارک ته د سفر پر ځای د لوړې کچې غونډې ته خپل وېډیويي پیغامونه ولېږي.
راروانه سې شنبه د وینا لپاره د امریکا د متحده ایالاتو نوبت تر برازیل وروسته دی، خو ولسمشر ډونالد ټرمپ به په دې غونډه کې د وینا لپاره نیویارک ته نهځي، بلکې د هغه د دفتر د رئیس مارک میدوس (Mark Meadows) په وینا ولسمشر ټرمپ به له سپینې ماڼۍ عمومي غونډې ته وینا وکړي.
ښاغلي میدوس ویلي ولسمشر ټرمپ به په هغه ورځ د ټاکنیز کمپاین په یوه غونډه کې د ګډون لپاره ویسکانسن (Wisconsin) ایالت ته لاړ شي.
ډونالد ټرمپ او مارک میدوس
په پام کې ده عمومي غونډې ته چې د ملګرو ملتونو د ایجاد له ۷۵مې کلیزې سره هممهاله جوړېږي، د ۱۷۶ هېوادونو مشران وینا وکړي.
ډېرې ویناوې به یا په انلاین بڼه وي، یا به د مشرانو ثبت شوي وېډیويي پیغامونه د وینا پر ځای پلې کېږي.
د ملګرو ملتونو هغه غړي هېوادونه به په عمومي غونډه کې په حضوري ډول برخه اخلي چې له وړاندې یې استازي د امریکا په متحده ایالاتو کې وي.
د ملګرو ملتونو عمومي منشي انتونیو ګوترش ويلي دی خواشینی دی چې سږ کال دا چانس نهشته چې د هېوادونو مشران تر یوه چتر لاندې سره راټول شي.
هر کال د ملګرو ملتونو سازمان عمومي غونډې ته زرګونه دولتي چارواکي، ډیپلوماتان او د مدني ټولنې استازي ورځي.
ارشیف، د ملګرو ملتونو عمومي اسامبله
د ملګرو ملتونو د کلنۍ غونډې ترڅنګ په سلګونه وړې او لویې حاشیوي غونډې هم جوړېږي او پر مهمو نړیوالو مسئلو پهکې بحثونه کېږي، خو سږ کال دا هرڅه بدل ښکاري.
د ملګرو ملتونو سازمان ۷۵ کاله مخکې په ۱۹۴۵م کال کې تر دوهمې نړیوالې جګړې وروسته ایجاد شو چې ټولټال ۱۹۳ هېوادونهیې غړي دي.