په سعودي عربستان کې د حج مراسم پیل شول.
د حج زیارت کوونکي نن مینا ته ځي او سبا د عرفې ورځ ده.
د حج مراسم په پنځو ورځو کې بشپړېږي.
د تېرو کلونو په پرتله سږ کال لږ شمېر مسلمانان د حج مراسم په ځای کوي.
د کرونا ویروس د خپرېدو له کبله سعودي عربستان اړ شوی چې لږ شمېر خلکو ته اجازه ورکړي چې د حج مراسمو ته ورشي.
ارشیف
حج د اسلام یوه له پنځو بناوو څخه ګڼل کېږي او پر هر مسلمان چې مالي توان لري، فرض دی چې په خپل عمر کې یو ځل حج وکړي.
هر کال د نړۍ له ۱۸۰ هېوادونو څخه تر ۲ میلیونه ډېر مسلمانان د حج د مراسمو لپاره سعودي عربستان ته ځي او د نړۍ په دې تر ټولو سترو مذهبي مراسمو کې ګډون کوي.
خو سږ کال د کرونا ویروس د لا زیاتې خپرېدا د مخنیوي لپاره د نورو هېوادونو زیارت کوونکو ته اجازه ورنهکړل شوه چې د حج د مراسمو لپاره سعودي عربستان ته لاړ شي.
دا پرېکړه د دې لپاره شوې چې زیارت کوونکي د کرونا ویروس له خطره خوندي وي. د حج د مراسمو برخوالو ته ویل شوي چې ټولې روغتیايي سپارښتنې په پام کې ونیسي.
مکې ته له رسېدو سره سم د ټولو زیارت کوونکو تبې کتل شوي او تر مراسمو وړاندې قرنطین شوي دي.
د سعودي عربستان د حج او اوقافو د وزارت له پرېکړې سره سم هغه کسان د حج د مراسمو اجازه لري چې عمرونهیې تر ۶۵ کالو کم دي او هېڅراز مزمنه ناروغي نهلري.
د سعودي د حج وزارت د پلان رئيس امر المداح اسوشیټډ پرس خبري اژانس ته ویلي چې چارواکي هغه ټول تدابیر په پام کې نیسي او عملي کوي چې د حج د مراسمو په لړ کې حتي یو تن هم په کرونا اخته نهشي او یا څوک ورڅخه مړ نهشي.
سعودي عربستان یو له هغو هېوادونو څخه دی چې د کرونا ویروس پېښې پهکې ډېرې دي.
کرونا ټسټ ټیوب
د جانز هاپکنز پوهنتون له شمېرو سره سم، په دغه هېواد کې تر اوسه پورې ۲ لکه ۷۰ زره مثبتې پېښې ثبت شوي او له دې ویروس ۲ زره ۷۸۹ تنه مړه شوي دي.
د سعودي عربستان د حج او عمرې د چارو وزارت تېره میاشت وویل، یوازې کم شمېر هغو بهرنیانو ته د حج د مراسمو اجازه ورکول کېږي چې په سعودي عربستان کې اوسي.
راپورونه وايي، د سږني حج په مراسمو کې به د زرو او ۱۰ زرو ترمنځ زیارت کوونکي برخه ولري.