د امریکا پوځ وایي، روسیې په لیبیا کې ځان ته د پښې ځای د پیدا کولو په هدف دغه هېواد ته وسلې او الوتکې استولي.
په افریقا کې د امریکا د پوځ قوماندانۍ پر روسیې دا تور پرون پورې کړ.
پر روسیې دا تور په داسې حال کې لګول شوی چې په لیبیا کې ښکېلې خواوې د سِرت ساحلي ښار د کنټرول لپاره یو بل سره په جګړه بوختې دي.
پر روسیې تور دی چې د لیبیا په ختیځ کې د خلیفه حفتر د پوځ ملاتړ کوي، هغه وسلهوال چې په طرابلس کې حکومت سره چې ملګرو ملتونو په رسمیت پېژندلی، جګړه کوي.
د امریکا دفاع وزارت (پنټاګون) داسې تصویرونه خپاره کړي چې په وینا یې د روسیې لهخوا د واګنر ډلې ته چې په لیبیا کې بوخت روس شرکت دی، د تجهیزاتو د استولو دوام ښيي.
د امریکا دفاع وزارت (پنټاګون)
د پنټاګون په وینا د روسیې په بار وړونکو الوتکو کې د واګنر جنګیالیو ته د جنګي جټ الوتکو، زغرهوالو ګاډو، لاریو او د هوايي دفاع د تجهیزاتو لېږد لا هم روان دی.
پنټاګون تر دې مخکې هم مسکو لیبیا ته د جټ الوتکو په استولو تورن کړی او د دې میاشتې په پیل کې یې ویلي و، د واګنر ډلې د لیبیا د پلازمېنې طرابلس دننه او بهر ماینونه ایښي دي.
په افریقا کې د امریکا د پوځ قوماندانۍ همدارنګه ویلي، روسیه په مدیترانې سمندرګي کې د خپل اوږدمهالي حضور لپاره له واګنر نظامي شرکته د یوې نیابتي ډلې کار اخلي.
په افریقا کې د امریکا د پوځ قوماندانۍ د استخباراتو مرستیال جنرال ګریګوري هډفېلډ وایي، لیبیا ته د روسیې لهخوا استول شوي تجهیزات بشري مرسته نهده.
نوموړي په یوه خبرپاڼه کې ویلي، د تجهیزاتو له ډولونو او کچې داسې ښکاري چې مسکو غواړي هلته خپله جګړهییزه وړتیا لوړه کړي.
روسیه تورنه ده چې د لیبیا په ختیځ کې د قوماندان خلیفه حفتر لهخوا د خپلسره اعلان شوي ملي پوځ ملاتړ کوي.
خلیفه حفتر
فرانسه، مصر او متحده عربي امارات هم د خلیفه حفتر د ځواکونو ملاتړ کوي، دغه ځواکونه د لیبیا د هغه حکومت په وړاندې جنګېږي چې ملګري ملتونهیې په رسمیت پېژني.
ترکیه بیا برعکس د لیبیا له حکومته ملاتړ کوي او د همدې حکومت د مرستې لپارهیې دغه هېواد ته سرتېري، بېپیلوټه الوتکې او اجیر سوریایي جنګیالي استولي دي.
قطر او ایټالیا هم دې چاره کې د ترکیې ترڅنګ ولاړ دي.
د مصر پارلمان بیا همدا اوونۍ تأیید کړه که د ترکیې په ملاتړ ځواکونه د سرت ښار خوا ته پرمختګ وکړي، دوی بهیې ځواب کې مستقیمه پوځي مداخله وکړي.
ارشیف، د مصر پارلمان
له دې سره داسې وېره شته چې د لیبیا د سرت ښار پر سر لانجه به د ناټو غړې ترکیې او په سیمه کې د امریکا متحدان په مستقیمه شخړه ښکېل کړي.
امریکا بیا په لیبیا کې د اوربند ملاتړ کوي چې دغلته د لانجې سیاسي هواري ته لاره برابره کړي.
په لیبیا کې کورنۍ جګړه په ۲۰۱۱ کال کې هله پيل شوه چې د ناټو په ملاتړ پاڅون کوونکو د دغه هېواد پخوانی مشر معمر قذافي له واکه لیرې او وواژه.