د افغان ولسمشر محمد اشرف غني فوق العاده استازی محمد یوسف غضنفر د کرونا ویروس له امله ومړ.
په اقتصادي، د سوداګرۍ د پراختیا او د بې وزلۍ د راکمولو په چارو کې د افغان ولسمشر فوق العاده استازی محمد یوسف غضنفر د کويډ ۱۹ ناروغۍ له امله تېره شپه په حق ورسېد.
د مرحوم غضنفر یو نږدې خپل فریدون الهام ازادي راډيو ته وویل، چې نوموړی په کرونا ویروس اخته شوی و.
د ښاغلي الهام په خبره نوموړی د ترکیې په پلازمېنې انقره کې تر درملنې لاندې و، چې تېره شپه د کابل په وخت ۹ بجې یې ساه وکړه.
محمد یوسف غضنفر د عبدالغفار زوی په ۱۳۴۴ لمریز کال د بلخ ولایت په مرکز مزارشریف ښار کې زېږېدلی و.
نوموړي لوړې زده کړې نه درلودې، خو لوی سوداګریز شرکتونه یې رهبري کول، چې غضنفر بانک د دغه سوداګریزې ټولګې یوه برخه ده.
له ښاغلي غضنفر ۶ لوڼې او ۲ زامن پاتې دي.
محمد یوسف غضنفر څو کاله وړاندې سیاست ته مخه کړه او د ولسي جرګې د پنځلسمې دورې وکیل پاتې شوی.
نوموړي د ۱۳۹۸ کال د جمهوري ریاست په ټاکنو کې له محمد اشرف غني ملاتړ وکړ.
ښاغلي غني د لوړې په مراسمو کې نوموړی په اقتصادي، د سوداګرۍ د پرختیا او د بېوزلۍ د راکمولو په چارو کې خپل فوق العاده استازي وټاکه او د مرستیالانو له امتیاز برخمن و.
په دې ترتیب سره ښاغلي غضنفر د محمد اشرف غني د ټیم په جوړښت کې څلورم کس ګڼل کېده.
اوس پوښتنه داده چې ایا د مرحوم غضنفر ځای ناستی به وټاکل شي؟
که څه هم له وخت وړاندې ده چې حکومت په دې اړه نظر څرګند کړي، خو حقوق پوهان وايي، چې د ښاغلي غضنفر د ځای ناستي ټاکل حتمي خبره نه ده.
ودیر ساپی
د حقوقي چارو کارپوه ودیر ساپي ازادي راډيو ته وویل، خو که ولسمشر وغواړي کولای شي، د غضنفر له کورنۍ یو څوک په دې سمت وټاکي.
هغه زیاتوي: "که ولسمشر وغواړي د نوموړي له کورنۍ یا د هغه له سوداګریزې ډلې یو څوک وټاکي کولای شي، خو حتمي نه ده، ځکه چې د اساسي قانون په چوکاټ کې د مرحوم غضنفر سمت نشته."
افغان ولسمشر د خپل دفتر رئیس ته دنده سپارلې، څو د محمد یوسف غضنفر د جنازې او خاورو ته سپارل مراسم په ځانګړي دولتي مراسمو سره ترسره کړي.
د ښاغلي غضنفر د مړینې په اړه د محمد اشرف غني په پیغام کې راغلي: "محمد یوسف غضنفر د افغانستان د ابادۍ او اړمنو او بېوزله خلکو د مرستې جدي کارونه پيل کړي و او ویاړم چې داسې نیک او د خلکو خدمتګار شخصت مې ترڅنګ و."
دا په داسې حال کې ده، چې په تېرو ۲۴ ساعتونو کې د کرونا ویروس له امله د افغانستان په دولتي روغتونونو کې ٧ اته مړه شوي، ٣٤٧تنه نوي پرې اخته شوي او نږدې ٢٠٠٠ تنه ارې روغ شوي دي.
په دې سره ټوله کې په افغانستان کې د کرونا ویروس له امله د مړو کسانو شمېر ٨٢٦ ته پورته شو، له ٣٢ زره زیات کسان پرې اخته شوي او نږدې ٢٠ زره کسان ترې روغ شوي دي.