د افغانستان د بشر حقونو سازمان وايي، افغان کارګرو سره د ایران سرحدي ځواکونو قضیه باید د نړیوالو بنسټونو لخوا وڅېړل شي.
د دې سازمان مشر لعل ګل لعل د یکشنبې په ورځ ازادي راډیو ته وویل، د ایران دولت لخوا د بخښنې ترڅنګ باید د دې جنایت ترسره کونکي د قانون منګولو ته وسپارل شي.
تازه د ایران یو شمېر ښوونکو، سیاسي او مدني فعالانو د ایران له دولت څخه غوښتي چې د دې عمل ترسره کولو له امله باید د افغان حکومت څخه رسما بښنه وغواړي.
د افغانستان بشر حقونو سازمان د ایران د یو شمېر ښوونکو ،سیاسي او مدني فعالانو خواخوږي د ستایلو تر څنګ وايي، افغان کډوالو سره د تاوتریخوالي قضیه باید د نړیوالو بنسټونو لخوا په جدي ډول وڅېړل شي.
د دې سازمان مشر لعل ګل لعل دیکشنبې په ورځ ازادي راډيو ته وویل د ایران دولت لخوا د بخښنې ترڅنګ باید د دې تاوتریخوالي عاملین د خپلو کړنو سزا وویني.
هغه زیاته کړه: "زه فکر کوم په بخښنې غوښتلو دا معضله نه حل کېږي، باید دا موضوع د نړیوالې ارګانونو لخوا چې د عدالت نړیواله محکمه هم پکې شامله ده او د ملګرو ملتونو د اړوندو برخو لخوا په جدي ډول وڅېړل شي."
ښاغلي لعل وویل، د افغانانو په وړاندې ایران پخوا هم ورته تاوتریخوالی ترسره کړی دی.
تازه د ایران ۲۵۰ ښوونکو، سیاسي او مدني فعالانو د یوې بیانیې په لاسلیک له افغانانو سره شوی چلند ظلم او جنایت یاد کړی او د ایران له حکومت یې غوښتي چې په دې تړاو رسمي بخښنه وغواړي.
حقیقت موندونکي پلاوي خپلې موندنې له ولسمشر غني سره شریکې کړي
د دې بیانیې لاسلیک کوونکي د ایران کورني او بهرني ښوونکي، سیاسي او مدني فعالان دي.
په دې بیانیه کې راغلي چې موږ لاسلیک کوونکي د ایران دولت څخه غواړو چې د افغانستان حکومت او د قربانیانو له کورنیو د رسمي بخښنې غوښتلو ترڅنګ باید دا فاجعه په هر اړخیز ډول وڅېړي، د داسې پېښو له بیا ځلي تکرار مخنیوي او د عاملینو معلوملو برخه کې مرسته وکړي.
نږدې دوه اوونۍ وړاندې یو شمېر افغان کارګر چې غوښتل یې په قاچاقي ډول ایران ته ولاړ شي د ایراني پوله ساتونکو لخوا د افغانستان او ایران ترمنځ پوله د هرات ګلران ولسوالۍ ذولفقار سیمه کې له وهلو ډبولو وروسته اړ شوي چې ځانونه د هریرود سیند ته واچوي.
وروسته له دې د افغانستان او ایران پلاوی وټاکل شو، د دوی څېړنې د دې قضیي روښانتیا لپاره پیل شوي.
په ورته وخت کې د افغانستان یو شمېر مدني فعالانو لخوا د افغان کارګرو سره د ایراني پوله ساتونکو بد چلند محکوم شوی او دوی د ایران له دولت څخه غوښتي چې د قربانیانو کورنیو ته دې تاوان ورکړي.
عزیز رفیعي
د افغانستان د مدني ټولنې مشر عزیز رفعیي ازادي راډیو ته وویل: "دا یو روښانه او واضح جنایت دی، د دې عمل په وړاندې هر ډول چوپتیا د نړیوالو قوانینو، دیپلوماسي او د ګاونډیوانو ترمنځ ښه نیت تر پښو لاندې کول دي، موږ هیله مند یو چې د ایران دولت د دې مسئله په تړاو بخښنه وغواړي او له افغانانو سره دې د ورته پېښو د نه تکرار ژمنه وکړي."
دې پلاوي ویلي چې چې د دې قضیي په اړه یې ټول اسناد، شواهد ایراني چارواکو ته سپارلي دي.
دې پلاوي د افغانستان ولسمشرۍ ماڼۍ سره هم خپل معلومات شریک کړي دي.
د ولسمشرۍ ماڼۍ په خبر پاڼه کې د پلاوي مشر حمید طهماسي له قوله لیکل شوي چې ۴۶ افغانانو له ډلې ۱۲ وژل شوي، ۱۷ لا درکه او ۱۷ نور ژغورل شوي دي.