- ایشین لایټ انټرنشنل
له لندن څخه خپرېدونکې ایشین لایټ انټرنشنل ورځپاڼې په زابل ولایت کې د وسلهوالو کسانو لهخوا د افغان سرتېرو د ډلهییزې وژنې د خونړۍ پېښې په اړه یو مطلب خپور کړی.
افغان چارواکو د زابل د پېښې پړه پر طالبانو اچولې او وايي، د دې ډلې نفوذي کسانو د جمعې په ورځ سهار وختي د زابل مرکز کلات ته نږدې د کابل-کندهار پر لویه لاره د ملي پولیسو او ملي اردو پر ګډې پوستې حمله وکړه او ۲۴ سرتېري یې ووژل، خو طالبانو د دې حملې مسؤلیت نهدی منلی او وايي چې په دې اړه څېړنه کوي.
ایشین لایټ ورځپاڼه له دې پېښې یوه ورځ مخکې د افغان حکومت لهخوا د اوربند د وړاندیز یادونه کوي او لیکي د افغانستان د دفاع سرپرست وزیر اسدالله خالد د پنجشنبې په ورځ په داسې حال کې چې د کورنیو چارو سرپرست وزیر مسعود اندرابي یې څنګ ته ولاړ و، په یوه وېډیویي پیغام کې وویل، د کرونا ویروس د مخنیوي لپاره د اقداماتو په ترڅ کې حکومت د اوربند وړاندیز کوي څو د هېواد په ګوټ ګوټ کې د دې ناروغۍ پر وړاندې وقایوي تدابیر ونیسي او د ناروغانو علاج وکړي.
خو ورځپاڼه لیکي چې طالبانو دې وړاندیز ته ځواب ونهوایه او په بله ورځیې دا حمله وکړه.
ایشین لایټ انټرنشنل د زابل د برید په درشل کې په ستراتېژیکو او عامه چارو کې د ولسمشر د سلاکار وحید عمر د څرګندونو یادونه کوي چې ویلي یې و، که طالبان د حکومت دوه شرطونه چې لومړی د بینالافغاني خبرو پیل او دوهمیې په تاوتریخوالي کې د پام وړ کموالي راوستل دي ونهمني، نو زندانیان بهیې خوشې نهشي.
- ګلف ټایمز
له دوحې څخه خپرېدونکې انګلیسي ژبې ګلف ټایمز ورځپاڼې د قطر د بهرنیو چارو وزارت د هغه بیان جزئیات خپاره کړي دي چې په زابل کې پر افغان ځواکونو برید پهکې غندل شوی دی.
په افغانستان کې د سولې راوستو موافقه نږدې درې اوونۍ مخکې د قطر په منځګړیتوب، د دې هېواد په پلازمېنه دوحه کې د امریکا او طالبانو ترمنځ لاسلیک شوه.
ګلف ټایمز لیکي چې د قطر د بهرنیو چارو وزارت د زابل حمله غندلې او د پېښې د قربانیانو له کورنیو او افغان حکومت او خلکو سرهیې خواخوږي څرګنده کړې ده.
د ورځپاڼې د راپور له مخې د قطر د بهرنیو چارو وزارت په خپل بیان کې ټینګار کړی چې تاوتریخوالی او ترورېزم انګېزه او دلیلیې چې هر څه وي، د منلو وړ نهدي او قطر په دې برخه کې قاطع دریځ لري.
- دې نشنل
له ابوظبي خپرېدونکې انګلیسي ژبې ورځپاڼه دې نشنل لیکي چې د زابل حمله په افغانستان کې د سولې پروسه پېچلې کوي.
ورځپاڼه د نړیوال بحران ډلې د کارپوه اندریو واتکینز له قوله لیکي چې وايي، طالبان د خپل نفوذ د پراخولو لپاره لاهم پر تاوتریخوالي د لومړنۍ وسیلې په توګه اتکا کوي.
ښاغلي واتکینز دې نشنل ورځپاڼې ته ویلي چې پر افغان ځواکونو دا ډول حملې به د ولسمشر اشرف غني لپاره د سولې د هڅو پر مخ بیول په داسې حال کې چې د سولې پر وړاندې لومړنی خنډ یعنې د طالب بندیانو خوشې کول پر ځای پاتې دی له سیاسي پلوه لا ستونزمن کړي.