د افغانستان د شفافو انتخاباتو بنسټ "ټیفا" وايي، د امنیتي ستونزو ترڅنګ په هېواد کې روان سیاسي کړکېچ، د سیاسي احزابو دریځ د انتخاباتو د کمېسیون د دارالانشاء د رئیس او کمېشنرانو ترمنځ روانه لانجه او تخنیکي مشکلات د راتلونکو انتخاباتو په وړاندې عمده ستونزې بلل کېږي.
د دغه بنسټ رئیس محمد نعیم ایوب زاده د پنجشنبې په ورځ په یوه خبري غونډه کې وویل که راتلونکې انتخابات ترسره هم شي ګڼې ستونزې به ورسره ملې وي.
ایوب زاده: موږ ډېر اندېښمن یو
نوموړي زیاته کړه:
"موږ ډېر اندېښمن یو که په ځانګړي ډول دغه درې مسلو د انتخاباتو د امنیت برابرول، د انتخاباتو لپاره سیاسي تفاهم او د انتخاباتو په وړاندې تخنیکي ستونزو ته پام ونه شي، نو په دغه ډول حالاتو کې انتخاباتو ته تګ به ډېرې ستونزې پیدا او شاید افغانستان د بحران پر خوا بوځي."
ښاغلی ایوب زاده وايي په لویو ولایتونو کې د ناامنیو وروستیو پېښو د انتخاباتو د ترسره کېدو په برخه کې دوی اندېښمن کړي نو ځکه له امنیتي بنسټونو غواړي چې په دې برخه کې هلې ځلې تېزې کړي.
نوموړی وايي، د بنسټ د موندونو له مخې د راتلونکو انتخاباتو لپاره چې کوم ډول پکار ده چمتووالی نه دی نیول شوی.
ښاغلی ایوب زاده ادعا کوي چې د انتخاباتو خپلواک کمېسیون په زیاتره مسایلو کې د حکومت په لارښوونو عمل کوي او د انتخاباتو د څار بنسټونو وړاندې شویو طرحو ته هیڅ ډول پاملرنه نه کېږي، خو د افغانستان جمهوري ریاست له دې وړاندې بار بار ویلي چې هېڅ دولتي ارګان ته د انتخاباتو کمېسیون په چارو کې د لاس وهنې اجازه نه ورکوي.
ټاکل شوې چې د ولسي جرګې راتلونکي انتخابات د مېزان پر ۲۸مه چې ۳۶ ورځې ورته پاتې دي ترسره شي.
د افغانستان د شفافو انتخاباتو بنسټ وايي، د انتخاباتو د شفافیت په برخه کې د یو واضح میکانیزم نه موجودیت، د مهالویش له مخې د رایه ورکونکو د فهرست نه خپرول، په ولایتونو کې د محلي زورواکو او د خیالي مرکزونو شتون، په کمیسیون کې د ښځینه کارمندانو کمښت او په انتخاباتو کې د پراخه درغلیو د موجودیت په اړه د سیاسي احزابو ادعاګانې هغه څه دي چې د انتخاباتو د ترسره کېدو په برخه کې يې جدي اندېښنې رامنځته کړي دي.
په ورته وخت کې د افغانستان د انتخاباتو خپلواک کمېسیون که څه هم په دغه پروسه کې یو شمېر ستونزې مني خو ډاډ ورکوي چې انتخابات به په خپل وخت او په شفاف ډول ترسره شي.
د دغه کمېسیون ویاند او کمېشنر سید حفیظ الله هاشمي د پنجشنبې په ورځ په دې اړه ازادي راډيو ته وویل:
سید حفیظ الله هاشمي
"دوې پروسې ډېرې مهمې وې یوه امنیتي پروسه ده چې موږ له امنیتي همکارانو سره په تماس کې یو، دویمه مسله د انتخاباتي اوراقو او حساسو او غیر حساسو موادو چاپ کول وو چې زیاته برخه يې چاپ شوي، کابل ته رارسېدلي او تر دویم د میزانه پورې به پاتې مواد هم راورسېږي، بسته بندي به شي او د امنیتي پلان سره سم به ولایتونو او مرکزونو ته انتقال شي نو فکر کوم چې ډېرې جدي ستونزې نه دي پاتې."
دا په داسې حال کې ده چې تازه د حزب اسلامي په ګډون یو شمېر سیاسي ګوندونو ګواښ کړی چې په خپل ټول توان هڅه کوي چې د تقلبي انتخاباتو د ترسره کېدو مخه به ونیسي.
په دې اړه نور:
حکمتیار: سیاسي احزاب به په ټول توان د تقلبي انتخاباتو پر وړاندې ودرېږيدغه سیاسي احزاب له حکومته غواړي چې راتلونکې انتخاباب باید د بایومتیریک سیستم په وسیله ترسره شي.
خو ښاغلی ایوب زاده وايي، کمېسیون باید د بایو میټریک په سیستم د انتخاباتو د نه ترسره کېدو په اړه سیاسي احزابو ته قناعت ورکړي ترڅو یاده ستونزه حل شي او د انتخاباتو ترسره کېدو ته لاره حواره شي.
راپور: اکرام الله اکرام