داعش یا د اسلامي دولت وسلهوال له شینوارو وروسته د سپینغره د لمنې په یوه بله ولسوالۍ خوګیاڼو کې دي.
د دې ډلې وسلهوال له تېرو څو ورځو راهیسې د خوګیاڼو د وزیرو او هغو شااوخوا سیمو کې چې وسلهوال طالبان پهکې فعال وو، له طالبانو سره په توده جګړه بوخت دي.
د ننګرهار د والي ویاند عطاالله خوګیاڼي تېره شپه ازادي راډیو ته وویل چې جګړه لا هم په هغو سیمو کې چې پخوا د وسلهوالو طالبانو په ولکه کې وې، روانه ده.
د ننګرهار د والي ویاند عطاالله خوګیاڼی
دی وايي:
"جګړه په هغو سیمو کې اوس هم د دوو وسلهوالو ډلو ترمنځ روانه ده چې مخکې تر دې پهکې وسلهوالو طالبانو فعالیت درلود. اوس داعش وسلهواله ډله غواړي چې په دې سیمو کې ځان ته ځای پیدا کړي."
که څه هم د افغانستان دفاع وزارت او د ننګرهار سیمهییزه اداره په سیمه کې د وسلهوالو ډلو پر ضد د عملیاتو د پیل خبره کوي، خو ځايي خلک وايي، تر اوسه پورې یې د جګړې سیمې ته نږدې د افغان امنیتي او دفاعي ځواکونو خوځښتونه نهدي لیدلي.
د وزیرو د سیمې یو اوسېدونکي نقیبالله چې د جګړې له کبله له خپل کلي د خوګیاڼو د ولسوالۍ مرکز ته کډه شوی ازادي راډیو ته وویل، تر اوسهیې افغان امنیتي ځواکونه نهدي لیدلي چې د جګړې سیمې ته نږدې ورغلي وي.
له خوګیاڼو راکډه شوي خلک
دی وايي:
"دولت د ولسوالۍ له مرکزه بېخي خوځېدلی نهدی. موږ د پولیسو او اردو کوم موټر نهدی کتلی چې د جګړې د سیمې خوا ته تللی وي. بس له جلالاباده تر ولسوالۍ پورې د پولیسو موټر وخت نا وخت ښکاري، خو له ولسوالۍ پورته د جګړې سیمې ته دولتي ځواکونه نهدي ورغلي."
خو د ننګرهار ولایتي چارواکو او په کابل کې د دفاع وزارت چارواکي وايي، په سیمه کې یې عملیات پیل کړي، هوايي بریدونه دوام لري او د ګډو ځواکونو لهخوا ځمکني عملیات په جریان کې دي.
د ازادي راډیو خبریال د دفاع وزارت له ویاند جنرال دولت وزیري سره د سیمې د خلکو هغه ادعا چې وايي، د داعش او طالبانو جګړه دوام لري او سیمه کې تر اوسه افغان امنیتي او دفاعي ځواکونه نهشته، شریکه کړه.
د دفاع وزارت ویاند جنرال دولت وزیري
ښاغلي وزیري وویل:
"قوتونه راټول شوي، د خوګياڼو پر خوا تللي، زموږ هوايي ځواک هم په جریان کې دی او د کمانډو ځواکونو هم وظیفه اخیستې. هلته لوی عملیات ترسره کېږي، حکومت او وسلهوال پوځ دغلته د داعش ځپلو ته ژمن دی او څو ورځې وروسته به تاسو سیمه کې داعش ونهګورئ."
بلخوا د خوګیاڼو د وزیرو له تنګي او شااوخوا سیمو څخه د روانې جګړې له کبله په زرګونه کورنۍ د خپلو کورونو پرېښودو ته اړ شوې دي.
د ننګرهار د والي ویاند عطاالله خوګیاڼي ازادي راډیو ته وویل، تر اوسه تر پنځه نیم زرو زیاتې کورنۍ د کډوالو د چارو د ادارې لهخوا سروې شوې دي او شااوخوا درې نیم زره بېځایه شویو کډوالو ته لومړنۍ مرستې رسېدلي دي.
په سیمه کې د جګړو له کبله یو شمېر بېځایه شویو خلکو ازادي راډیو ته وویل، د بېځایه شويو خلکو شمېر تر دې ډېر زیات دی او ډېرو کمو کسانو ته مرستې رسېدلي.
نقیبالله چې خپله د خوګیاڼو ولسوالۍ مرکز ته کډه شوی ازادي راډیو ته وویل، په زرګونه کورنۍ له ښځو او ماشومانو سره، د سړکونو پر غاړه په دښتو کې بېسرپناه پراته دي او د سپینغر د لمنې سړه هوا دغلته د بېځایه شویو کورنیو لپاره بله ستونزه ده چې په ځانګړي توګهیې د ماشومانو روغتیا ته جدي خطر پېښ کړی دی.
د افغانستان د ملي امنیت پخواني رئیس رحمتالله نبیل پر خپله فېسبوک پاڼه کې ویلي:
"که د داعش مخه په خوګیاڼو کې ونهنیول شي او خوګیاڼي د دوی څخه پاک نهشي، ممكن د دوى پلان به دا وي تر څو حصارک، ازره، سرخرود، سروبي، خاک جبار او د کابل-ننګرهار لویه لار د نا امنیو سره مخ کړي."