د ملي امنیت ریاست مسؤلین وايي، داعش او طالب وسلهوالو په ننګرهار کې ډېر لوی پلانونه درلودل چې امنيتي ځواکونو د ولسونو په همکارۍ ورته شنډ کړي.
د ننګرهار د ملي امنیت ریاست مرستیال جميعالله نورستاني د سې شنبې په ورځ «۱۳۹۶ کال د لیندۍ ۰۷» په خوګياڼو ولسوالۍ کې رسنیو ته وويل چې داعش وسلهوالو پلان درلود چې د تورې بوړې ساحه ونيسي او همدا ځای د خراسان ولایت مرکز اعلان کړي.
دی وايي:
"په تېرو نهو میاشتو کې داعشيانو تبليغ کاوه او دا يې پلان وو چې د شینوارو سیمو نه خوګياڼو زون ته راشي او توره بوړه ونيسي او دا ځای د خراسان ولایت مرکز اعلان کړي او له دې لارې په حصارک، لوګر او نورو سیمو کې خپل فعالیتونه پراخ کړي چې دا پلانيې موږ شنډ کړ."
نوموړی وايي، بلخوا وسلهوالو طالبانو هم پلان درلود چې حصارک او شيرزاد ولسوالۍ د خپلې ولکې لاندې راولي او له پاکستانه د پېښور شورا حصارک ولسوالۍ ته رانتقال کړي چې امنيتي ځواکونو د دوی دغه پلان خنثی کړ.
دی زیاتوي:
"طالبانو هم د سږ کال لپاره پلان لاره چې حصارک او شیرزاد ولسوالۍ تر خپلې ولکې لاندې راولي او دلته د پېښور شورا را انتقال کړي او په حصارک کې د ثوق او ادارې مرکز د شرقي زون لپاره فعاله کړي چې خوشبختانه د دوی دا پلان هم شنډ شو او ډېر زیات تلفاتيې ورکړل."
په همدې خبري ناسته کې د ننګرهار والي محمد ګلاب منګل په خوګياڼو ولسوالۍ کې د داعش او طالب وسلهوالو ترمنځ د خپلمنځي نښتو په تړاو وويل چې اوسنۍ جګړه په هغو سیمو کې شوې چې هلته طالبان فعاله وو.
دی وايي، په دې ولایت کې د دواړو وسلهوالو ډلو د فعالیت ساحه تر پخوا کمه شوې او ډېری سیمې د امنيتي ځواکونو لاس ته لوېدلي.
ښاغلي منګل زیاته کړه:
"موږ ټول په دې اعتراف کوو چې ځينې غرنۍ لیرې پرتې سيمې د وسلهوالو په لاس کې وې، اوس هلته جنګونه رامنځته شوي چې هلته پخوا دولتي حاکميت یا کمزوری و او یا هم نهوو، خو اوس هغه سیمې هم د امنيتي ځواکونو لاسته راغلي او دا سیمې به ساتل کېږي."
که څه هم د ننګرهار ولایتي ادارې په خوګياڼو ولسوالۍ کې د دواړو ډلو د ځپلو په هدف د تازه عملياتو د پيل خبره کړې، خو تر اوسه په یادو سیمو کې د امنيتي ځواکونو لهخوا عمليات نهدي پيل شوي.
د ولایتي ادارې د معلوماتو له مخې د یادو وسلهوالو ډلو د خپلمنځي نښتو له امله د خوګياڼو ولسوالۍ څخه په زرګونه کورنۍ نورو سیمو ته کډه شوي چې له دې ډلې څه باندې درې زره کورنیو سره مرسته شوې، پنځه زره کورنۍ سروې شوي او د پاتې نورو کورنیو سروې روانه ده.
راپور: شاهمحمود شینواری
