د انتخاباتو د څار یو شمېر بنسټونه د انتخاباتو د قانون تعدیلي طرحې ته په کتو وايي چې حکومت د منلو وړ انتخاباتو ترسره کېدو ته لېوالتیا نهلري.
ټیفا یا د افغانستان د شفافو انتخاباتو بنسټ وايي چې افغان حکومت هڅه کوي د انتخاباتي نظام اصلاح تر نوم لاندې سیاسي مانور ترسره کړي.
د دې بنسټ مشر محمد نعیم ایوبزاده د چهارشنبې په ورځ ازادي راډيو سره په خبرو کې د انتخاباتو په اړه د حکومت اصلاح شوې طرحې ته په کتو وویل چې افغان حکومت اوس هم د منلو وړ انتخاباتو ته لېواله نهدی.
هغه وايي چې د انتخاباتو قانون په وروستۍ اصلاح شوې طرحه کې د انتخاباتو د څار بنسټونو سره مشوره نهده شوې او داسې برېښي چې د انتخاباتي اصلاحاتو کمېسیون وړاندیزونه هم په پام کې نهدي نیول شوي.
د افغانستان د شفافو انتخاباتو بنسټ مشر محمد نعیم ایوبزاده
ښاغلي ایوبزاده زیاته کړه:
"معلومېږي چې حکومت تر اوسه هم د انتخاباتي اصلاحاتو او د شفافو انتخاباتو ترسره کولو لپاره اراده نهلري، بیا هڅې کوي چې یو سیاسي مانور ترسره کړي او عامه افکار وغولوي، حکومت به داسې کار ونهکړي چې افغانانیې د کېدو هیله لري."
دا په داسې حال کې ده چې حکومت د تېرې دوشنبې په ورځ د انتخاباتو د قانون اصلاح شوې طرحې د بشپړېدو خبر ورکړ او وايي چې راتلونکې اوونۍ به د کابینې غونډې ته وړاندې شي.
ارګ وايي چې د اصلاح شوې طرحې له تصویبېدو سره به جمهور رئیس د انتخاباتي نظام د اصلاح په خاطر درېیم فرمان صادر کړي.
د ایوا یا د "افغانستان انتخاباتو څار بنسټ" د مشرتابه شورا غړی شاه محمود مل وروستیو هڅو ته په کتو سره وايي چې د انتخاباتي نظام اصلاح له خپل اصلي لوري بدله شوې ده.
هغه ازادي راډیو ته وویل چې بېلابېلې ډلې په دې پروسه او راتلونکو انتخاباتو کې د مداخلو لټه کوي.
خو د افغانستان جمهوري ریاست وايي چې د انتخاباتو د قانون اصلاح شوې طرحه یو طرفه نهده بلکې له ټولو خواوو سره په مشورې ترتیب شوې ده.
د جمهور رئیس غني ویاند هارون چخانسوري ازادي راډیو ته وویل چې د طرحې له لوستلو مخکې قضاوت غېر عادلانه کار دی.
د جمهور رئیس غني ویاند هارون چخانسوري
ښاغلی چخانسوري وايي:
"له دوستانو څخه زموږ هیله دا ده، که دوی وايي چې دا طرحه یوه اړخېزه ترتیب شوې، خو نه دا طرح د دوی د مخکینو وړاندیزونو او مشورو پر اساس وروستۍ شوې ده، دوی کولای شي وروسته په دې اړه جزئیات وګوري او خپلې ملاحظې وړاندې کړي یا ورباندې بحث وکړي، اول دې طرحه وګوري او وروسته دې ورباندې منصفانه بحث وکړي."
له دې ټولو سره-سره د انتخاباتو څار بنسټونه ټینګار کوي چې که چېرې د انتخاباتو په پروسه کې ریښتیني بدلونونه رامنځته نهشي نړیواله ټولنه به خپلې مرستې کمې او پړه بهیې بیا د حکومت په غاړه وي.
دوی په ټينګار سره وايي چې حکومت باید د پخوانیو ژمنو له مخې په دې اړه اقدمات وکړي او د نړیوالې ټولنې ښه ملاتړ ترلاسه کړي.
راپور: یوسف خان ځدراڼ