په کندوز کې د بې پولې ډاکترانو پر یو روغتون د برید په اړه د امریکا د دفاع وزارت د څېړنو یو راپور ښيي چې د امریکا ځانګړي ځواکونو چې له افغانانو سره یې همکاري کوله څو ځل له خپلو قوماندانانو څخه غوښتي وو چې په جګړه کې د ګډون حد دې ورته روښانه کړي.
امریکايي پوځي پرسونل چې تېر کال یې د کندوز په سختو جګړو کې یو روغتون په هوايي بریدونو کې په نښه کړ ویلي، هغه مهال په سیمه کې ګډوډي وه او د دوی ماموریت هم بشپړ روښانه نه و.
امریکايي پوځیان وايي د بې پولې ډاکترانو دا روغتون یې په تېروتنه په نښه کړی دی.
په کندوز کې د دې خونړۍ پېښې په اړه د پینتاګون د څېړنو راپور د دوشنبې په ورځ خپور شو.
دا راپور ښيي چې د امریکا د ځانګړو ځواکونو هغه افسران چې له افغانانو سره يې د سلاکارانو په توګه همکاري کوله تر سختو ډزو لاندې راغلي وو.
په دې راپور کې د امریکا د ځانګړو ځواکونو د یو افسر له خولې چې نوم یې نه دی یاد شوی ویل شوي، څو ځل یې له خپل قوماندان څخه غوښتي وو چې تر کومه حده کولی شي د کندوز ښار په بېر ته نیولو کې له افغان ځواکونو سره همکاري وکړي؟
تر دې مخکې د امریکا د دفاع وزارت د یو مخکیني راپور پر بنسټ په کندوز کې پر یو روغتون د برید له کبله رامنځ ته شوي تراژیدي د سختې جګړې په ترڅ کې د یو لړ تېروتنو نتیجه وه.
چې په کې د امریکا یوې سي ۱۳۰ ډوله الوتکې په تېروتنه روغتون داسې یوه ودانۍ ګڼلې وه چې ګوندې د وسله والو طالبانو له خوا اشغال شوې ده.
د بې پولې ډاکترانو پر دې روغتون برید کې د روغتون د کارکونکو او ناروغانو په شمول ۴۲ کسان وژل شوي او ۳۷ نور ټپیان شوي وو.
د لومړنیو څېړنو له مخې ویل شوي وو چې اصلاً باید په کندوز کې پر یوې بلې ودانۍ برید شوی وی خو د سي ۱۳۰ الوتکې د نقشې اخیستنې سیسټم کې تېروتنه د دې سبب شوه چې برید پر روغتون وشي.
د بې پولو ډاکترانو سازمان دا له نړیوالو اصولو او بشري حقونو څخه یوه څرګنده سرغړونه بللې وه او په اړه یې د څېړنو غوښتنه کړې وه.
د امریکا د دفاع وزارت ویلي، دا یو جنګي جنایت نه دی ځکه برید په قصدي توګه پر ملکي هدف نه دی شوی بلکې د تېروتنې نتیجه ده.
په کندوز کې پر دې روغتون د برید په ارتباط د امریکا دفاع وزارت د خپلو۱۶پوځیانو په وړاندې انظباتي اقدمات کړي او ډېر هغه کسان چې مجازات شوي د امریکا د پوځ د ځانګړو ځواکونو غړي دي.