د سوریې موقت ولسشمر احمد الشرع متحدوایالاتو ته رسیدلی او د دوشنبې په ورځ ولسمشر ډونالد ټرمپ سره ګوري.

د سوریې دولتي خبري اژانس راپور ورکړ چې د دغه هیواد ولسمشر احمد الشرع د شنبې په ورځ د یو تاریخي رسمي سفر لپاره متحده ایالاتو ته ورسید.

تردې یوه ورځ مخکې ، واشنګټن هغه د ترهګرۍ له تور لیست څخه لیرې کړ.

شرع، چې ځواکونو یې د تیر کال په وروستیو کې د بشار اسد رژیم نسکور کړ، ټاکل شوې ده چې د دوشنبې په ورځ په سپینه ماڼۍ کې د متحده ایالاتو له ولسمشر ډونالډ ټرمپ سره وګوري.

دا په ۱۹۴۶ کال کې د سوریې تر خپلواکۍ وروسته متحدو ایالاتو ته ددغه هیواد دیو ولسشمر لومړی دا ډول سفر دی.

دسوریې موقت مشر د می په میاشت کې منځني ختیځ ته د متحده ایالاتو د ولسمشر ډونالډ ټرمپ د سفر په جریان کې په ریاض کې د لومړي ځل لپاره له ټرمپ سره ولیدل.

د سوریې لپاره د امریکا استازي ټام باراک د روانې میاشتې په پیل کې وویل چې "هیله مند" دی چې شرع به د اسلامي دولت ډلې یا داعش په وړاندې د متحده ایالاتو په مشرۍ نړیوال ایتلاف کې د شاملیدو لپاره یو تړون لاسلیک کړي.

په سوریه کې یوې ډیپلوماتیکې سرچینې دفرانسې خبري اژانس ته وویل چې متحده ایالات پلان لري چې "د بشري مرستو همغږي کولو او د سوریې او اسراییل ترمنځ پرمختګونو څارلو لپاره" دمشق ته نږدې یوه پوځي اډه جوړه کړي.

لکه څنګه چې تمه کیده د امریکا بهرنیو چارو وزارت د جمعې په ورځ احمد الشرع د تور لیست څخه لیرې کړ.

د وزارت ویاند ټامي پیګوټ وویل چې د شرع حکومت د ورکو امریکایانو د موندلو او پاتې کیمیاوي وسلو له منځه وړلو لپاره د هلو ځلو په شمول امریکايي غوښتنې ترسره کوي.

ښاغلي پیګوټ له تور لیست څخه د شرع د نوم دلیرې کولو په توضیح کې زیاته کړه: "دا اقدامات د بشار الاسد له لیرې کیدو او د اسد درژیم لاندې د ۵۰ کلن ظلم زیاتي له ختمیدو وروسته د سوریې د مشرتابه لخوا د ښودل شوي پرمختګ د قدردانی لپاره ترسره کیږي."

د امریکا د بهرنیو چارو وزارت ویاند وویل چې د امریکا له لیست څخه د احمدالشرع ایستل به "سیمه ایز امنیت او ثبات او همدارنګه د سوریې په مشرۍ او د سوریې په ملکیت کې یوه جامع سیاسي پروسه وهڅوي."

تمه کیږي چې شرع به د سوریې لپاره چې دغه هیواد د ۱۳ کلنې وحشتناکې کورنۍ جګړې وروسته د بیارغونې په برخه کې د پام وړ ننګونو سره مخ دی مالي مرستې وغواړي.

پاکستان کې د ډبرو سکرو کان کې د میتان ګاز د چاودنې له امله لږ تر لږه ۳۴ کسان مړه شوي دي.

پېښه د پنجشنبې په ورځ (د اسد ۸مه) ، کوټې ښار ته نږدې، د یوه کان شاوخوا ۱۲۰۰ متره ژوروالي کې رامنځته شوې ده.

د چاودنې پر مهال په کان کې ۳۶ معدنچیان وو.

د ۲ معدنچیانو د موندلو او ژغورلو لپاره عملیات لا هم روان دي چې تر خاورو او ډبرو لاندې بند پاتې دي.

په سیمه کې د کانونو د چارو یوه لوړپوړي حکومتي چارواکي، عبدالغني بلوچ، ویلي دي: «د میتان ګاز د زورورې چاودنې له امله یوبل ته نږدې دوه کانونه ، سخت زیانمن شوي دي.»

تیره شپه زرګونه کډوال د مراکش له لارې د افریقا په شمال کې دهسپانیې ترواک لاندې سبته ښارګوتي ته داخل شول.

د هسپانیې د پولیسو یوې سرچینې د جمعې په سهار فرانس پریس خبري اژانس ته وویل چې په وروستیو ورځو کې شاوخوا ۴۰ زره کډوال له مراکش څخه دغې سیمې ته په داسې حال کې ننوتي دي چې ټاکل شوې وه د هسپانیې صدراعظم پیدرو سانشیز هلته ورسیږي.

د سرچینې په وینا، «د ټولې شپې په اوږدو کې د کډوالو د ورتګ بهیر په دوامداره توګه روان و.»

د هسپانیې پولیس سبته ښارګوتي ته د کډوالو د ورتګ دغه څپه د ۲۰۲۱ کال راهیسې دغه ښارګوتي ته د کډوالو ترټولو لویه څپه ګڼي.

اکثر دغه کډوال ځوانان او تنکي ځوانان دي چې سبتې ته د ورتګ په لار ددوی د ۱۸ کسانو مړینه تراوسه رپورټ شوې ده.

هسپانیه یو له هغو هیوادونو څخه دی چې دافریقا کډوال هلته په ورتګ سره هڅه کوي د اروپايي اتحادیې ځمکو ته داخل شي.

د ایران پوځ وايي د جمعې په سهار یې په کویټ کې د احمد الجابر پر اډه د بې پیلوټو الوتکو برید کړی دی.

د ازادي راډیو د ایراني څانګې ،راډیو فردا ،د رپوټ په اساس دایران د پوځ اعلامیه وايی چې په برید کې" دامریکا جنګي الوتکې،د ارتباط سیستمونه، او دامریکا د پوځ دتجهیزاتو زیرمتونونه په نښه شوي دي."

د ایران پوځ وايي چې دغه برید یې په ایران باندې دامریکا د چهارشنبې د شپې د بریدونو په ځواب کې کړی دی.

سیمه کې د امریکا د پوځ مرکزي قوماندانۍ ( سنتکام ) او د کویټ حکومت د ایران ددغې ادعا په اړه تراوسه څه نه دي ویلي.

د امریکا ولسمشر ډونالډ ټرمپ وايي چې د «سولې پلاوی» د غزې په تړانګه کې د حماس او نورو وسلوالو ډلو د بې‌وسلې کولو لپاره یوې هوکړې ته رسېدلی دی.

حماس د اروپايي ټولنې او د امریکا د متحده ایالاتو له خوا د ترهګرې ډلې په توګه پیژندل شوې ده.

ډونالډ ټرمپ د پنجشنبې په ماښام (د اسد ۸مه) په خپلې ټولنیزې شبکې «ټروت سوشیل» کې ولیکل چې: «دا هوکړه یو مهم ګام دی، څو غزه بالاخره د یوې نوې فلسطینۍ ادارې تر واک لاندې راشي؛ داسې اداره چې د فلسطیني خلکو د مرستې لپاره به د سولې له پلاوي سره نږدې همکاري وکړي.»

د امریکا ولسمشر دغه هوکړه تاریخي او«د تلپاتې سولې او امنیت پر لور یو ستر ګام» بللی ده.

د سولې د پلاوي په نوم میکانیزم داسرائیل او حماس ترمنځ له اوربند وروسته، چې د ډونالډ ټرمپ په منځګړیتوب رامنځته شو، د اوربند د څارنې او د غزې د ادارې لپاره جوړ شوی دی.

یاد پلاوي هم په خپله اېکسپاڼه کې تایید کړې چې حماس «په غزه کې د اوربند د راتلونکو پړاوونو د پلي کولو لپاره یوه مفصله تګلاره منلې ده.»

جرمني دروان ۲۰۲۶ کال په لومړیو شپږو میاشتو کې څه دپاسه ۹ زره او شپږ سوه کسان له هیواد ویستلي دي.

دا شمیر د تیرکال د همدې مودې په پرتله کم دی.

تیرکال جرمني په همدې موده کې ۱۱ زره او ۸۰۰ کسان ستانه کړي وو.

دا شمیرې د جرمنې د کورنیو چارو وزارت د معلوماتو پربنسټ خپرې شوي دي.

جرمني په دې وروستیو کې افغانستان ته هم د ایستل شویو کسانو الوتنې بیا پیل کړې دي، هغه اقدام چې د طالبانو له حکومت سره د همغږۍ اړتیا له امله د منتقدانو له سختو نیوکو سره مخ شوی دی.

تیره سه شنبې د جرمني د لایپزیګ هوايي ډګر څخه یوه ډله افغانان په یوې چارتر الوتکه کې کابل ته واستول شول.

د کینیا چارواکي وايي، په تېره یوه میاشت کې د تانزانیا پولې ته نږدې د امبوسیلي په ملي پارک کې ۱۵ پیلان ښايي د سیانایډ د مسمومیت له امله مړه شوي وي.

سیانایډ یو ډول کیمیاوي مواد دي چې په کروندو کې د نباتي آفتونو د له منځه وړلو لپاره کارول کېږي.

د کینیا د وحشي ژوو ادارې ویلي، لومړنۍ څېړنې ښيي چې امکان لري دغو پیلانو د شاوخوا کروندو هغه بانجان خوړلي وي چې په قوي افت‌وژونکو درملو ککړ شوي وو.

چارواکي وايي، څېړنې روانې دي څو معلومه کړي چې دا مسمومیت په تصادفي ډول رامنځته شوی که قصدي.

د امبوسیلي ملي پارک په افریقا کې د پیلانو د اوسېدو تر ټولو مشهورو سیمو څخه شمېرل کېږي.

د بریتانیا حکومت وايي چې د چهارشنبې په ورځ ۷۵۲ کډوال د مانش کانال له لارې په وړو کښتیو کې بریتانیا ته رسېدلي، چې دا په ۲۰۲۶ کال کې تر ټولو لوړه ورځنۍ شمېره ده.

د بریتانیا د کورنیو چارو وزارت وايي، سره له دې چې د یوې ورځې شمېر لوړ شوی، خو د روان میلادي کال په لومړیو شپږو میاشتو کې له همدې لارې د اوښتونکو کډوالو شمېر د تېر کال د ورته مودې په پرتله ۴۱ سلنه کم شوی دی.

د بریتانیا حکومت وايي د انساني قاچاق د شبکو پر ضد له اروپايي هېوادونو سره همکاري د کډوالو د شمېر په کمېدو کې اغېزمنه وه، خو د «ریفورم بریتانیا» په نوم ګوند بیا باور لري چې دا کموالی تر ډېره د هوا له شرایطو سره تړاو لري.

بلخوا، فرانسوي چارواکو ویلي چې د مانش کانال څخه د اوښتو په هڅه کې په دوو بېلابېلو پېښو کې څلور کډوال مړه شوي دي.

د بښنې نړیوال سازمان له اروپايي ټولنې او غړو هېوادونو یې غوښتي چې له طالبانو سره د افغان کډوالو د ستنولو په برخه کې همکاري ودروي.

د سازمان د چهارشنبې ورځې اعلامیه وايي چې د طالبانو تر واک لاندې افغانستان د هغو کسانو لپاره چې په زور ورستنېږي، خوندي ځای نه دی.

یاد سازمان وايي چې طالبانو واک ته له ستنیدو وروسته د وګړو د حقونو ډېر قوانین او حمایوي چوکاټونه له منځه وړي او د تبعیضي فرمانونو او پالیسیو له لارې یې د خلکو، په ځانګړي ډول د ښځو، نجونو او قومي او مذهبي لږکیو، اساسي حقونه محدود کړي دي.

په اعلامیه کې راغلي چې دغه محدودیتونه له نورو سزاګانو لکه په دُرو وهلو، خپل ‌سرو نیونو، جبري ورکېدنو، شکنجې او د بشري حقونو له نورو جدي سرغړونو سره مل دي.

دبښنې نړیوال سازمان خبرداری ورکړی چې د افغان کډوالو د بېرته ستنولو په اړه له طالبانو سره هر ډول هوکړه د اروپايي ټولنې له نړیوالو بشري حقونو او د کډوالو د حقونو له ژمنو، په ځانګړي ډول د جبري نه ستنولو له اصل سره په ټکر کې ده.

دغه سازمان وايي چې د افغانانو جبري ایستل هغوی د بشري حقونو د نقض، نیول کېدو، شکنجې او د بشري ناورین له خطر سره مخامخ کولای شي.

دبښنې نړیوال سازمان له اروپايي ټولنې غوښتي چې د کډوالو د ایستلو پر ځای دې په افغانستان کې د بشري حقونو د پراخو سرغړونو د پای ته رسولو لپاره هڅې زیاتې کړي.

د اروپا کمیسیون د چنګاښ په دویمه نېټه په بروکسل کې د طالبانو د یوه پلاوي کوربه و،څو د افغانانو د ایستلو او بېرته ستنولو په اړه تخنیکي خبرې وکړي.

د پاکستان د بهرنیو چارو وزارت ویاند اعلان کړی چې د ۱۶ زره افغان کډوالو، په ځانګړي ډول د ښځو، ماشومانو ،سپین‌ ږیرو او سپین سرو، د استوګنې موده یې غځولې ده.

طاهر اندرابي د پنجشنبې په ورځ، د اسد په ۷مه، یوې خبري غونډې ته وویل چې د دغو کډوالو د استوګنې موده د بشري دلایلو له مخې تمدید شوې ده.

هغه زیاته کړه چې هم‌مهاله د نږدې ۹۰ زره نورو افغان کډوالو دوسیې هم تر څیړنې لاندې دي او هغه کسان چې قانوني اسناد ونه لري، له پاکستانه به وایستل شي.

دا په داسې حال کې ده چې پاکستان د افغان کډوالو د ایستلو بهیر چټک کړی دی. د بې پولې ډاکترانو سازمان (MSF) د سې‌شنبې په ورځ د افغان کډوالو د وضعیت په اړه اندېښنه څرګنده کړه او ویې ویل چې هغوی د نیول کېدو، د کار له لاسه ورکولو او جبري ایستلو له وېرې سره ژوند کوي. دغه سازمان له پاکستانه وغوښتل چې د افغان کډوالو جبري ایستل ودروي.

د بې پولې ډاکترانو په وینا، د نیول کېدو وېره د دې لامل شوې چې ډېر کډوال روغتیايي مرکزونو ته تګ او د درملنې ترلاسه کول وځنډوي، یا ترې په بشپړه توګه ډډه وکړي.

پاکستان د ۲۰۲۳ کال له سپټمبر راهیسې د «غیرقانوني بهرنیانو د بېرته ستنولو پلان» په چوکاټ کې د افغان کډوالو د ایستلو لړۍ پیل کړې او تر اوسه یې له ۲.۵ میلیونو څخه ډېر افغانان بېرته افغانستان ته ستانه کړي دي.

د اسلامي دولت ډلې داعش خراسان څانګې په بدخشان کې د طالبانو د اطلاعاتو او کلتور د مشر ذبیح الله امیري د وژنې مسؤلیت ومانه.

امیري د سې شنبې په ورځ د بهارک-فیض آباد سړک په اوږدو کې د دوو موټرسایکل سپرو وسله والو له خوا تر برید لاندې راغی او ووژل شو.

د طالبانو حکومت مخکې ویلي و چې یو بریدګر د امیري د ساتونکو له خوا په ډزو ووژل شو او بل ټپي او ونیول شو.

ذبیح الله امیري د هلمند د طالبانو د والي امان الدین منصور وراره دی.

بدخشان په دې وروستیو کې د څو امنیتي پیښو شاهد و، چې پکې د څو ساعتونو لپاره د یفتل پایین ولسوالۍ د مرکز سقوط او په زیباک ولسوالۍ کې نښتې شاملې دي.