یوشمېر معترضو ښځینه بنسټونو په یوه ګډ لیک کې د ناروې له لوري طالبانو ته د افغانستان د قونسلګرۍ د سپارلو پر پرېکړه اعتراض کړی.
په دې لیک کې، چې یوه کاپي یې ازادي راډیو ته هم استول شوی، ویل شوي چې ۳۳ سازمانونه د ناروې د حکومت پر دې پرېکړې ژوره اندېښنه لري او جدي اعتراض کوي، چې د افغانستان قونسلګري طالبانو ته سپاري.
د دې سازمانونو په وینا، طالبان ښځې له ټولنیز ژوند څخه په بشپړ ډول حذفوي، تعلیم منع کوي، مدني ازادۍ تر فشار لاندې راوړي، او سیستماتیک جنسیتي تبعیض پلي کوي، چې ټول د بشري حقونو ښکاره سرغړونې دي.
لیک زیاتوي، د طالبانو د استازو رسمي حضور په هر نوم چې وي، په نړیواله کچه د هغوی د تدریجي مشروعیت لپاره دروازې پرانیزي.
دې سازمانونو د ناروې له حکومته غوښتنه کړې، چې طالبانو ته د افغانستان د قونسلګرۍ د چارو د سپارلو بهیر ودروي.
دا په داسې حال کې ده، چې د طالبانو د بهرنیو چارو وزارت د شنبې په ورځ اعلان وکړ، چې په ناروې کې به د افغانستان سفارت د دوشنبې له ورځې (نن) د قونسلګرۍ خدمات پیل کړي.