ګوړه خو هسې هم خوندور خواږه دي، خو کله چې ستا مخامخ په ګاڼۍ کې تازه جوړیږي نو خوند یې لا یو په دوه شي.
امیر حمزه شینواری وايي.
حمزه د خوږ اشنا به درته څه صفت کومه
ګوړه چې له هرې ډډې وڅکې خوږه وي.
کامه ولسوالۍ که له یوې خوا د اوړي په موسم کې د مشهور شیریخ له امله دګڼو سیلانیانو کوربه وي نو د ژمي د موسم له پیل سره سم په کې د دودیزو ګاڼیو اورونه بل، او له ګنیو د خالصې ګوړې بازار ګرم شي.
ګڼ خلک دغلته ځي او د خپلو کورنیو او ملګرو لپاره فرمایشي تازه ګوړه جوړوي.
د ګاڼیو یو شمېر مالکان وايي که څه هم د اقتصادي ستونزو له امله سږ کال د تازه ګوړې پلور کم او د تېرو کلونو غوندې نه دی خو بیا یې هم ورځ چلیږي.
د یوې ګاڼې مسول روح الله ازادي راډيو ته وویل چې د کامې ګوړه د ګنیو له خالص شربت جوړیږي" له نورو سیمو کابل او ولایتونو نه میلمانه راځي، دلته ګوړه جوړوي، کار ښه دې ډېر بد نه دی، زموږ ګوړه خالص د ګني له شربت جوړیږي، ښه پاک چاپریال مو ورته جوړ کړی دی، هر څه د خلکو مخامخ کیږي، د دې ترڅنګ خلک له موږ سره په کې په کار اخته دي د دوی کارونه هم کیږي".
د روح الله په خبره دوی سره سږ کال د یو من تازه ګوړې بیه له پنځه تر پنځه نیم سوه افغانیو ده زیاتوي چې تېر کال دا بیه یو څه لوړه وه.
د ده په خبره اوس مهال په ټوله کامه کې ښايي له شپیته تر اویا ګاڼۍ موجودې وي چې په هر یو کې لږ ترلږه له اوه تر لس کسان کار کوي.
د ګاڼیو مسولین وايي اټکل کوي چې سږ کال په دې ولسوالۍ کې د نورو سیمو پرتله د ګنيو حاصلات زیات دي او ښايي تر راتلونکو دریو میاشتو د ګنیو له شربتونو د ګوړې د جوړلو ګاڼې چالانې وي.
دوی وايي د ورځې په منځنۍ ډول په هره ګاڼۍ کې له پنځوس نیولې تر اویا منه ګوړه تولیدیږي او د ننګرهار په مارکیټونو کې پلور ته کېښودل کیږي.
شمس الرحمان چې له کندهاره ننګرهار او بیا کامې ته تللی وايي هر کال د ګنیو په موسم کې کامې ته ځي او دغلته د خپلې کورنۍ لپاره ځانګړې فرمایشي ګوړه جوړوي، هغه چې ځینې خلک په کې بادام، ممپلي، چهارمغز، پیسته او نوره مغز لرونکې وچه میوه ګډوي.
"د ننګرهار کامې ولسوالۍ ته راغلی یو، دلته ښه د میلې ځای دی، د ګاڼیو وخت دی، دوی درته ګوړه جوړوي، موږ ورته چارمغز او بادام راوړي دوی یې راته له ګوړې سره ګډوي او ډېره فرمایشي او پاکه ګوړه ترې جوړیږي."
د تازه ګوړې یو بل مینه وال صداقت چې له جلال اباد ښاره دغه ولسوالۍ ته د تازه ګوړې د اخیستلو لپاره ورغلی ازادي راډيو ته یې وویل:"موږ خو هر کال په دې موسم کې راځو، ګوړه جوړو، د کامې مشوره ګوړه ده ، نن سبا موسم ډېر ښه دی، د میلي موسم دی، خلک ډېر کامې ته راځي او بله خبره د کامې د ګوړې ده چې ډېره پاکه ګوړه ده هیڅ ډول بل څه په کې نه ګډیږي بلکې پآکه ګوړه ده، ما خپله ګوړه واخیسته."
د کامې ګوړه په افغانستان کې مشهوره ده او په خاص ډول د ژمي په راتګ سره، ډیرې کورنۍ هڅه کوي چې دا ګوړه وپیري.
د ګوړې یو شمېر سوداګر وايي د کامې ګوړه چې بیلابیله مغز لرونکي وچه میوه ورسره ګډیږي د تحفې په ډول تر امریکا او اروپا رسیږي.
خو دوی وايي که د طالبانو حکومت په دې موسم کې له پاکستانه د ګوړې په وارداتو بندیز ولګوي نو د دوی د تولیداتو بازار به ورسره لا وغوړیږي.