د اروپايي ټولنې د بهرنیو اړیکو مسوولې کایا کالاس د سوریې د پرمختګونو په اړه په غبرګون کې ویلي، د اسد د دیکتاتورۍ پای یو مثبت او د توقع وړ بدلون دی.

نوموړې دغه‌راز ويلي، دا تحول د اسد د ملاتړکوونکو، روسیې او ایران، د کمزورتیا څرګندونه کوي.

کایا کالاس د یک‌‌شنبې په ورځ په ایکس‌پاڼه کې په یوه پوسټ کې همداراز لیکلي: "زموږ لومړیتوب په سیمه کې د امنیت ټینګښت دی. زه به له ټولو رغنده شریکانو سره په سوریه او سیمه کې کار وکړم."

د بشارالاسد حکومت له ۲۴کلونو وروسته نن يک‌شنبه وپرځېد او نوموړی نن له سوريې وتلی او نامعلوم لوري ته تللی.

د نولس‌‌کلنو ځوانانو د اسیا جام پایلوبه د بنګله‌‌‌‌دېش او هندوستان ترمنځ ترسره شوه، چې د بنګله‌‌‌دېش په اتلولۍ تمامه شوه.

پای‌لوبه نن یک‌‌شنبه د (ډسمبر په ۸مه) نېټه د عربي متحده اماراتو د دوبۍ په لوبغالي کې ترسره شوه، چې بنګله‌‌دېش لومړۍ توپوهنه وکړه او په ۴۹.۱ اور کې یې ټول لوبغاړي له لاسه ورکړل او ۱۹۸ منډې یې وکړې.

د یادې لوبډلې په توپوهونکو کې رضوان حسین ۴۷ او محمد شهاب ۴۰ منډې وکړې.

د هندوستان لپاره بیا په توپ اچونه کې چیتن شرما، یادجیت ګوها او هاردیګ راج دوه دوه لوبغاړي وسوځول.

د هند لوبډلې ونه‌کړای شول چې ورکړل شوی هدف پوره کړي او د ټولو لوبغاړو تر سوځېدو وروسته یې په ۳۵.۲ اورونو کې ۱۳۹ منډې وکړې او د ۵۹ منډو په توپیر یې ماتې وخوړه.

مخکښ هندی توپوهونکی هاردیګ راج و چې ۲۴ منډې یې کړې وې.

د بنګله‌‌‌دېش لپاره بیا په توپ اچونه کې عزیزالحکیم او اقبال‌حسین درې‌درې لوبغاړي وسوځول.

د نولس‌‌‌‌کلنو ځوانانو د اسیا جام سیالۍ د نومبر میاشتې په ۲۹مه نېټه د ۸ لوبډلو په ګډون پیل شوې وې، چې افغانستان په‌‌کې خپلې ټولې ګروپي سیالۍ په بنګله‌‌‌دېش، سریلانکا او نيپال وبایللې او په لومړي پړاو کې له ټورنمنټ بهر شول.

د دیموکراتیکې سوریې ځواکونو قوماندان، چې د امریکا تر ملاتړ لاندې او د کردانو تر مشرۍ لاندې فعالیت کوي نن (یک‌شنبې) د بشارالاسد د رژیم تاریخي وباله او ويې ستایه.

د دیموکراتیکې سوریې ځواکونه د سوریې د شمال‌‌ختیځ پراخې سیمې تر کنټرول لاندې لري.

د دې ځواکونو قوماندان مظلوم عبدي، په یوه پیغام کې، چې په ټلېګرام کې یې خپور کړی، ویلي: "په سوریه کې موږ تاریخي شېبې تجربه کوو، ځکه چې په دمشق کې د استبدادي رژیم د پرځېدو شاهدان یو."

هغه زیاته کړه: "دې بدلون د یوې نوې سوریې د جوړولو لپاره فرصت برابر کړی، چې په ډیموکراسۍ او عدالت ولاړه وي او د ټولو سوریايانو حقوق تضمین کړي."

د اسراییل پوځ نن سهار (یک‌شنبې)، د بشار الاسد د حکومت د سقوط له څرګندېدو وروسته وویل چې، خپل ځواکونه یې په حایله سرحدي سیمه او نورو مهمو برخو کې ځای پر ځای کړی چې د "د جولان لوړو او د هغه ځای د اسراییلي اوسېدونکو امنیت ټینګ کړي."

یاده حایله سیمه د سوریې په قلم‌رو کې د قنیطره په برخه کې موقعیت لري، چې د ۱۹۷۴ کال په پسرلي کې د اسراییل او د هغه وخت د حافظ اسد حکومت ترمنځ د یوې موافقې پر اساس رامنځته شوې وه.

حافظ اسد د بشار الاسد پلار و.

اسراییل په ۱۹۶۷ کال کې د شپږ ورځنۍ جګړې په ترڅ کې د جولان لوړو یوه برخه نیولې وه.

د دې موافقې له‌‌مخې، حایل سیمه د (اندوف) په نوم د ملګروملتونو د ځواکونو تر څارنې لاندې راوستل شوه.

د ملګروملتو سوله‌‌‌‌ساتي ځواک له تېرو ۵۰ کلونو راهیسي په‌‌دې سیمه کې مېشت دی.

د بریتانیا صدراعظم کییر سټارمر به د خلیج هېوادونو ته خپل څو ورځنی سفر نن یک‌شنبه پیل کړي.

دا به چې له کله نوموړي د بریتانیا د صدراعظم په توګه خپله دنده پیل کړې، سیمې ته د هغه لومړی رسمي سفر وي او د دغه سفر پر مهال له متحده عرب اماراتو او سعودي عربستان سره د پیاوړو اقتصادي او دفاعي اړیکو د ټینګولو هڅه کوي.

د بریتانیا حکومت پرون په یوه اعلامیه کې ویلي، د سټارمر د سفر هدف د پانګونې پیاوړي کول او د دفاعي او امنیتي شراکت ژور کول دي.

سټارمر په جولای میاشت کې د بریتانیا چې د نړۍ شپږم لوی اقتصاد ګڼل کېږي د صدراعظم په توګه وټاکل شو.

د اوکراین ولسمشر ولودیمیرزيلينسکي پرون شنبې د (ډسمبر ۷مه) د امریکا له منتخب ولسمشر ډونالډټرمپ او د فرانسې له ولسمشر امانویل ماکرون سره په پارس کې د اوکراین د جګړې په اړه په یوې کتنه کې خبرې‌اترې کړې دي.

زيلينسکي دا درې اړخیزې خبرې اترې "ښې او ګټورې" بللي او ویلي دي، په اوکراین کې د جګړې د امکاناتو او د "عادلانه سولې" په اړه یې له ماکرون او ټرمپ سره خبرې ښې وې.

زيلينسکي چې د فرانسې په پلازمېنه پارس کې د نوتردام کلیسا په پرانيستې مراسمو کې یې ګډون کړ و، هڅه کوي د روسیې پر وړاندې جګړه کې د لوېديځو هېوادونو لا ډېر ملاتړ ترلاسه کړي.

د نړۍ په لسګونه لوړپوړي چارواکي د نوتردام کلیسا په پرانيستو مراسمو کې د ګډون په موخه پارس ته تللي دي.

په پارس کې د نوتردام کلیسا په ۲۰۱۹ کال کې له اور لګېدو وروسته چې کاملا سوځېدلې وه، د نړۍ له ګوټ‌‌‌ګوټ څخه د شاوخوا یو میلیارد ډالرو په مرسته بېرته رغول شوې ده.

په زرګونو لاریون کوونکي پرون شنبې د (ډسمبر ۷مه) د ګرجستان په پلازمېنه تبلیسي کې د حکومت د هغې پرېکړې د ننګونې په موخه سړکونو ته راوتلي چې، په اروپايي ټولنه کې د دې هېواد غړیتوب ځنډوي.

دا لاریونونه چې له څو ورځي راهیسې د تبلیسي په ګډون د ګرجستان په نورو لویو ښارونو کې روان دي، لاریون کوونکي په‌کې د پولیسو له‌‌‌خوا له تاوتریخوالي سره مخامخ شوي دي.

ډېرشمېر لاریون کوونکي د امنیتي ځواکونو له توقفه د هغوو لاریون کوونکو خوشې کېدل غواړي، چې په وروستیو ورځو کې نیول شوي.

د ګرجستان پولیسو تېره شپه ۴۸ لاریون کوونکي ونیول.

د ګرجستان د بلوا ضد پولیسو پرون سهار وویل، د تبلیسي په جمهوریت میدان کې یې څو بلواګر نیولي دي.

تېره اوونۍ په ګرجستان کې واک ګوند اعلان وکړ چې، له اروپايي ټولنې سره د "ګرجستان هیلې" د یوځای کېدو خبرې‌اترې چې پر بنسټ یې تر ۲۰۲۸ کال پورې دا هېواد له اروپايي ټولنې سره الحاق کوي، دروي.

دغې اعلان په ګرجستان کې د خلکو غوسه راپارولې او تبلیسي په ګډون په يوشمېر ښارونو کې خلک سړکونو ته راوتلي دي.

د پاکستان نړیوال هوايي شرکت یا پي‌آی‌اې PIA د جنورۍ میاشتې له لسمې بېرته اروپا ته الوتنې پیلوي.

دا الوتنې وروسته له هغې پیلېږي چې پر دغه هوايي شرکت د اروپايي ټولنې د چارواکو څلور کلن بندیز پای ته رسېږي.

پي‌آی‌اې نن شنبه په یوه اعلامیه کې ویلي چې د دوی لومړۍ الوتنه به د جنورۍ پر لسمه د اسلام‌اباد او پاریس ترمنځ وي.

پر دغه هوايي شرکت تور دی چې د ګڼو پیلوټانو لایسنسونه یا جعلي یا مشکوک دي.

د دغه شرکت په وینا په لومړیو کې به په اوونۍ کې دوې نړیوالې الوتنې کوي، خو وروسته به په تدریجي ډول زیاتېږي.

اروپايي ټولنې ته د پي‌آی‌اې هوايي شرکت پر الوتنو په ۲۰۲۰م کال کې بندیز لګول شوی و.

دا بندیز وروسته له هغې ولګول شو چې د دغه شرکت یوه الوتکه په کراچۍ کې پر یوه کوڅه راکوزه شوه او نږدې ۱۰۰ کسان یې ووژل.

په لومړیو کې د پېښې علت د پیلوټانو انساني اشتباه او هوايي ټرافیک یاد شوی و، خو وروسته ادعاوې وشوې چې د دغه شرکت د یو پر درېیمه پیلوټانو لایسنسونه یا جعلي یا مشکوک دي.

د ایران د بهرنیو چارو وزیر عباس عراقچي پرون ویلي، هېواد به یې د اړتیا تر وخته د سوریې ملاتړ ته دوام ورکړي.

دا څرګندونې داسې وخت کېږي چې د سوریې د ولسمشر بشارالاسد ځواکونه د یاغیانو د عملیاتو پر وړاندې په مقابله بوخت دي.

د ایران د بهرنیو چارو وزیر عباس عراقچي پرون د عراق پلازمېنې بغداد ته د سفر پر مهال ویلي، د ایران اسلامي جمهوریت تل د سوریې ملاتړ کړی او په هر قیمت به د سوریې د حکومت له غوښتنې سره سم، د اړتیا تر حده دغه ملاتړ ته دوام ورکړي.

بلخوا د عراق د بهرنیو چارو وزیر فواد حسین پرون ویلي چې هېواد یې باید له هرې حملې خوندي وساتل شي.

حسین، چې له خپل ایراني سیال سره په یوه کنفرانس کې خبرې کولې د سوریې تحولاتو ته په پام ویلي چې دی یو وار بیا د عراق د قلمرو او سرحدونو پر خوندیتوب ټینګار کوي.

هغه ویلي چې د عراق امنیتي ځواکونو د تیارسئ په حال کې دي.

په همدې حال کې د ترکیې د بهرنیو چارو وزیر نن په دوحه کې د روسیې او ایران د بهرنیو چارو له وزیرانو سره په سوریه کې د نوې جګړې پر حل لارو خبرو ته کېني.

دا درې واړه هېوادونه له ۲۰۱۷م کال راهیسې د استانې پروسې په چوکاټ کې شریکان دي او که څه هم د بېلابېلو جهتونو ملاتړ کوي، خو هڅه کوي چې د سوریې کورنۍ جګړې ته حل لار پیدا کړي.

په سوریه کې یاغیانو او د اپوزیسیون ځواکونو د حلب او حما پر لوري مخکې تګ ته دوام ورکړی او حمص ته نږدې شوي او د درعا ښار ۸۰ فیصده برخه یې هم نیولې ده.

اسرائیل پرون جمعه هغه ادعاوې رد کړې چې ګواکې د غزې په شمال کې یې پر یوه روغتون حمله کړې وي، یا ور داخل شوې وي.

دغه پوځ وايي، روغتون ته نږدې یې عملیات کړي دي.

تر دې مخکې د روغتون مشر او ژغورندویانو د اسراییل پوځ پر دغه روغتون په چاپې اچولو او ورباندې په حمله تورن کړی و.

د اسراییل پوځ په یوه اعلامیه کې ویلي چې پر کمال عدوان روغتون دوی نه حمله کړې نه یې په کې دننه پوځي عملیات کړي دي.

خو پوځ ویلي چې د روغتون د مربوطاتو په ګډون به د تروریستانو د تاسیساتو او تروریستانو خلاف خپلو عملیاتو ته دوام ورکړي.

تر دې مخکې د غزې د ملکي دفاع بنسټ ویلي وو چې د جمعې په ورځ ۲۹ کسان هغه وخت ووژل شول چې د روغتون په شاوخوا کې د اسراییل پوځ عملیات وکړل.

کمال عدوان د غزې په شمال کې یوازېنی فعال روغتون ګڼل کېږي.