اسراییل وایي، د لبنان د حزبالله ډلې د پخواني مشر حسن نصرالله ځای ناستی یې په غالب ګومان په یوه برید کې وژلی دی.
د اسراییل دفاع وزیر یواف ګالانت پرون سهشنبې ادعا وکړه چې د حزبالله د مشر ځای ناستی په غالب ګومان وژل شوی دی.
نوموړي وویل، د ایران له ملاتړه برخمنه سختدریځه حزبالله ډله چې یوه سیاسي ډله هم ده او د لبنان د جنوب پر ډېرې برخې کنټرول لري، له مشرتابه څخه بېبرخې ده.
د ازادې اروپا/ازادي راډیو د خبر د مرکزي څانګې د راپور لهمخې، د اسراییل دفاع وزیر د شمال لپاره د پوځ د قومندانۍ په مرکز کې افسرانو ته په خپلو څرګندونو کې وویل، د حزبالله مشر حسن نصرالله ووژل شو او ډېر احتمال شته چې د هغه ځای ناستی به هم وژل شوی وي.
هغه پهدې اړه نور جزییات ورنهکړل، خو زیاته یې کړه چې هغوی نور تصیم نیونکی نهلري او هیڅوک نهلري چې اقدام وکړي.
حزبالله چې د امریکا د متحدهایالتونو لهخوا د یوې ترهګرې ډلې په توګه پېژندل شوې، خو اروپایي ټولنې یې یوازې پوځي څانګه په تور لېست کې شامله کړې، ډېر ګومان کېده چې هاشم صفيالدین به چې د حسن نصرالله ترورزی دی، د خپل مشر په توګه ونوموي.
خو د اکتوبر له دوهمې راهیسې د اسراییل له یوه برید وروسته د هغه برخلیک څرګند نهدی.
حزبالله د هغه د برخلیک په اړه تر اوسه رسمي څرګندونې نهدي کړي، خو د دې ډلې یوشمېرغړیو د خپلو نومونو نه ښودلو په شرط یو شمېر رسنیو ته ویلي چې له دغه برید وروسته له نوموړي سره اړیکې پرې شوې دي.
صفيالدین متحدهایالتونو په ۲۰۱۷م کال د یوه نړیوال ترهګر په توګه اعلان کړی دی.
د راپور لهمخې، صفيالدین له حزبالله شیعه ډلې سره په ۱۹۸۰مه لسیزه کې د هغې له تاسیس وروسته یوځای شو.
نوموړي د حزبالله د اجرایوي ارګان چې د دې ډلې سیاسي چارې تنظیموي، د مشر په توګه دنده مخته وړې.
که د نوموړي وژل رسماً تایید شي دا به د اسراییل په برید کې د حسن نصرالله له وژل کېدو وروسته د حزبالله لپاره یوه سخته ضربه وي.
دغه شیعه ډله په وروستیو میاشتو کې ډېره نوره هم ځپل شوې.
د اسراییل په بریدونو کې یې د مشرتابه ډېر جګپوړي غړي وژل شوي، د پوځي وړتیاو ډېره برخه یې ویجاړه شوې او مخابراتي سیسټم یې هم ګډوډ شوی دی.
صفيالدین چې د لبنان په جنوب کې زېږیدلی، هم لکه د پخواني مشر په څېر له ایران سره نژدې اړیکې پاللي دي.
هغه د ایران په قُم ښار کې چې د شیعهګانو مذهبي مرکز بلل کېږي، زدهکړې کړي او ورور یې هم په ایران کې د حزبالله استازیتوب کوي.
همدارنګه د صفيالدین زوی د ایران د سپاهپاسداران انقلاب ځواک د پخواني قومندان قاسم سلیماني چې په ۲۰۲۰م کال کې په بغداد کې د امریکا په یوه هوایي برید کې ووژل شو، له لور سره واده کړی دی.
